2 KORINTIANGKVDVNG 1 - ANU LUGOD N. T. (BSI)

¹ Poulbv, Ru:ncpvnckc mcngkampc Kristo Jisukc mclvgla agom lunc, odokkc Timoti:bv ngoluk bvrodc, sc:kobulu Korintodo, Ru:ncpvnckc kumnc airu:nc tani: Akhaiang appv:do du:ji mondoli:kvdv:do:pc.

² Nolukkolo:pc ngoluk Abu Ru:ncpvnckolokkc mc:po mcngancm odokkc Ru:tum Jisu Kristokolokkc ayangcmna: mcngancm bika:langka.

Poulbv Ru:ncpvncmc Aipai Binam

³ Ngoluk Ru:tum Jisu Kristokc Ru:ncpvncbv odokkc Abudc akhirba:d pa:ncpc ika:langka, aya:lok Abudc odokkc appvng ni:namlok Ru:ncpvncdc,

⁴ sc:kobv ngoluk ipusire: pa:do appv:lo ngolum ni:dagji, odomvlo sc:kobulu atv ipusire: pa:ycmvlo ngolu ni:la:ycpc, oko ni:namdokki ngolum avycsin Ru:ncpvnckc ni:namdokki ni:doji.

⁵ Kapila:nc ngolu kapc pv:namkopc Kristokc ipusire:ycm ikosudonc, cdcmpila Kristokokki ngolu pv:sepv:yepc ni:namscmci pa:mvndo.

⁶ Ngolu jodi ipusire: pa:du:mvlo, cdc noluk asin mc:pcnam lcgangc odokkc motunam lcgangc; odokkc ngom jodi asincm mc:pomodu:mvlo, cdc noluk asin mc:po lcgangc, okodcm nolu pangkvsudu:nc cdvlo nolu mentumsudanna c:mo:pin ipusire:dcm pa:la du:donc cdc ngoluk ipusire: pa:namdcmmvng.

⁷ Noluk lcgang ngoluk mc:la du:namdc cngunmang; Kapila:nc ngolu kindag jc nolu kapc ngolu ipusire: pa:namkvdv:dcm ka:dumsudonc, nolusin ngoluk mc:polo mc:pomvnyc.

⁸ Kapila:nc ngolu nolum kinma:ncpc itoka cmna mc:mang bvrokvdvnga, Asiangolo ngoluk ipusire: pa:namdok agomcm; kapila:nc ngo cdcmpc pv:namkopc jo:la:ma:dopc moduptonc jc ngolu turra du:namdcmci mc:la mc:tcrsutungaboi.

⁹ Kapila:nc, ngolu mc:to jc ngolum mokedopc lulvg agomcm pa:tobong; cmpige:la cdc ngolum ngoluk avkolo mc:rasudopc imoge:mang cmna cmpige:la Ru:ncpvnckolo sc:kobv sinncm turmodokunc bvkkolo:pak.

¹⁰ Bv ngolum cdcmpc sipcnc pcsonamdokkc moturto, odokkc Bv ngolum moturyc; Bvkkolo ngoluk mc:tincm tolvgto jc Bv lckoda ngolum moturyc.

¹¹ Nolusin ngoluk kumna kumdumsupa:ru:yc, odomvlojen bojcrung kumnamdok akirba:dcm bila kumnamcm arc pangga:lok ngoluk lcgangc bojcrung aipai biyc.

Poulkc Ager Tarungc Angunam

¹² Kapila:nc ngoluk lubosula lusunamdc scmpc, ngoluk mc:namsagnamdok lukanbinamdc jc mo:pvso ilang gvla lcngkanto, odokkc nolum odokkcsin bojcyangko, angun ngunnamki odokkc Ru:nckc dormo kancpc asin ansvngki, mo:pvsok kinnam pa:namkimang cmpige:la Ru:ncpvnckc ayangkokki.

¹³ Kapila:nc ngolu okkom pola:dang odokkc mcngkindag; Ngo mc:dag nolu pv:namkopc mcngkindag, nolu kapc inyopko mcngkindagji,

¹⁴ jc nolu ngolukokki bottapc mc:sula:ycpc ngolu kapc nolukkokki mc:la:dagji, Ru:tum Jisukc Longcdo.

¹⁵ Lcga:dc ngo scm kindagrungai, ngo nolukkolo:pc gvpongarpc gvpc cmtungai, odomvlo jen nolu mc:pom lcnyikopc pa:ycpc cmna;

¹⁶ ngo nolum ngok Makedonia:pc gvdodcm gvka:la ka:lv:tagai, odokkc nolukkolo:pc Makedonia:dokkc gvlatlangkula odokkc ngok Judia:pc gvko lambcdok ngom gvlvgkosupc.

¹⁷ Ngo cdcmpc gvpc mc:dodcm ngo ngedkup-ngedlatdunganci? Ngok ager tarungcm rcngamsok tani:ycmpc idonci, C: cmna odokkc Ma: cmna lupc vgcmpc mosv:sula?

¹⁸ Aroru:pc kapc Ru:ncpvncbv mc:jvg jvrvgdagnc, ngoluk nolum lunam agomkvdv:dc C: odokkc Ma: cmtomang.

¹⁹ Kapila:nc Ru:ncpvnck Awodc, Jisu Kristobv, sc:kom ngolu noluk ara:lo lutadbitonc, Silbanubv odokkc Timoti:bv odokkc ngo, ngolu C: odokkc Ma: cmmangai; cmpige:la Bvkkolo cdc lo:dcm c:vyc.

²⁰ Kapila:nc Ru:ncpvnckc pesubinam appv:dc buluk c:vdcm Bvkkolo pa:dag. Cdcmpila:yam Bvkkoki ngolu Amendcm ludo, Ru:ncpvnckc amin gvnam lcgangc.

²¹ Cmpige:la cdc Ru:ncpvncbv:mvn sc:kobv nolukkokokki aiyo:pc du:moncdc, odokkc ngolum togc:lvgto;

²² Bvk tubjedcm ngolukkolo tublvgto odokkc Bvk Yallom ngoluk asin ara:bo bino:la arorungc cmna bito.

²³ Cmpige:la ngo Ru:ncpvncmc ngok birudi:pc lukan lubidopc gogdo– cdc nolum aya:pc mc:namc du:langci ngo Korinto:pc gvma:pc dung.

²⁴ Cdc cdcmang jc ngolu noluk mc:jvgdok tayc:do ru:tumpc imang; ngolu noluk lcdulo agercm gerto noluk mc:ponam lcganc, kapila noluk mc:jvglo nolu kvnggv:la dung.