1 TISSALONIANG 2 - ANU LUGOD N. T. (BSI)

Poulkc Tissaloniangdo Ager Gernam

¹ Kapila:nc nolu av avkvdv:dc kindag, bvrokvdvnga, jc ngolu nolum gvla ka:namdc cmmummangai;

² cmpige:la ngo Pilipi:do cmpci du:gcm gvttoibong odokkc anyv:sudopc ittoibong, kapc nolu cmpci kindagji, ngolukkolo asina:ngc pvtanammc ngoluk Ru:tumkolo dungai nolum Ru:ncpvnckc tadponc lutaddcm lubipc kvnggv:pc birudi:ko kcra:lo.

³ Kapila:nc ngoluk kumna lunamdc imurgvmurlokkc cdcmanggom napv-narc:manamlokkc lenncmang, cdcmanggom cdcm lume:lula lunamki lunammang;

⁴ Cmpige:la kapc ngolum tadponc lutaddcm togc:lvgdopc Ru:ncpvnc bvkkokki tolvgtonc, cdcmpila ngolu agomdcm ludo, tani:kvdv:dcm mc:lvgsumopc cmna imang, cmpige:la Ru:ncpvncmc mc:lvgsudopc sc:kobv ngoluk asinkvdv:dcm anka:la ka:dagji,

⁵ Kapcnc ngolu cdvlosin lume:pc lubonsula lunam agomcm lumang, kapc nolu kindagji cdcmanggom dorvnam lcgangc gcnambomnamcm, kapc Ru:ncpvncbv lukanbinnc.

⁶ Cdcmanggom ngolu tani:kvdv:dokkcm amin gvnamcm makanci, nolukkcmyc cdcmanggom amikolokkcmyc, ngolu Kristokc mclvgla ager germonc cmna lujcmna lula:ya:pcgom.

⁷ Cmpige:la ngolu asin ansv:dagai noluk ara:lo, ka:sv:mosv:nc nc:ngc bvk ommangcm mosv:nammcmpc.

⁸ Cdcmpidag, nolum asinc kvnggv:pc aipc mc:la ka:lv:namdokki, ngolu Ru:ncpvnckc bipc cmna mc:mangai cmpige:la ngolu av avkvdvngcmsin, kapila:nc nolu ngolukkcpc airu:pc aipc mc:nampc ikang.

⁹ Kapcnc nolu ngoluk ager gernamclang kvnggv:pc ager gernamcm kindag, bvrokvdvnga; ngolu yummcmnang longgcm agercm gerto, odomvlo nolukkolok sc:komsin jo:namko jo:dopc ima:dopc, cdvlo ngolu Ru:ncpvnckc tadponc lutaddcm nolukkolo lubitoji.

¹⁰ Nolu lukan binckvdvdc, odokkc Ru:ncpvncbv:sin, kapc cddvko angunnc odokkc dormokannc odokkc lujck kama:na:ji ngoluk nolukkolo:pc inam-sa:nam kvdv:dc;

¹¹ Kapcnc nolu kindag kapc, bvk ommang kvdv:dok lcdulo abukoncmpc,

¹² ngoluk appvngcm asincm pvtadopc lusv:toji odokkc nolum lugaplvkkaji Ru:ncpvnckc arckadopc turnamko turdopc, sc:kobv nolum Bvk avkc migom dokodo:pc gogdagji odokkc amin gvnamdo:pc.

¹³ Odokkc ngolusin Ru:ncpvncmc aipai bidung odok lcgangc mcma:ru:pc, jc cdvlo nolu Ru:ncpvnckc agomdcm torvgsutoji okodcm nolu ngolukkolokkcm tattoji, nolu cdcm tani:lok agomcmpc, torvgsutomang cmpige:la cdc okka:ji cdcmpc, Ru:ncpvnckc agomc, okodc noluk ara:do mc:jvgnckvdv:dcm ager gerra du:ji.

¹⁴ Kapcnc nolu, bvrokvdvnga, Ru:ncpvnckc mondoli:dok iko-gvkolo imvngvmvnncpc ikang Kristo Jisuk okodc:bulu Judia:do du:nc; kapila:nc nolu c:mo:pinc ipusire:ycm pangkvsuto noluk avkc do:lu: tani:kvdv:dokkc kapc bulu Jiwukvdv:dokkc ikaji.

¹⁵ Sc:kobulu anyipakdcm Ru:tum Jisumc odokkc lungor lunckvdv:dcm moketoji, odokkc ngolum la:paktoji,

¹⁶ odokkc Ru:ncpvncmc mc:nyi:motoji odokkc appvng tani:ycm motumtoji ngolum Angu tani:kvdv:dcm lumoma:dopc jc bulu turdopc–cdcmpc kapc buluk pa:pkvdv:dcm kvnamdcm pv:modopc. Cmpige:la Ru:ncpvnckc aglv:la mokenamdc lcddarpc pvngangkang!

Poulkc Bulum Lckoda Kangkupc Cmna Mc:nam

¹⁷ Cmpige:la ngolu nolum mcpansutonc, bvrokvdvnga, adjio:kopc, tani:pc asinkokkimang, ngolu kvnggv:pc anna ka:to odokkc kvnggv:pc nolum dumsi migmom kcra:pc ka:rvgmvnsulv:to;

¹⁸ Kapila:nc ngolu nolukkodo:pc gvpc mc:dagai–ngo, Poulbv, lckko lckko:lo cmpige:la Satandc ngolum motumto.

¹⁹ Kapila:nc ngoluk mc:tinamdc okodcn cdcmanggom mc:ponamdcm cdcmanggom bottapc lubonsunamdok dumlubc ngoluk Ru:tum Jisukc kcra:do Bvk gvdokudo?

²⁰ Cdc noluma:lang? Kapila:nc nolu ngoluk amin gvnamc odokkc mc:pobatnamc.