1 TISSALONIANG 1 - ANU LUGOD N. T. (BSI)

¹ Poulbv, Silbanu:bv, odokkc Timoti:bv, Tissaloniang kvdv:dok mondoli:do:pc Ru:ncpvnc Abukolo odokkc Ru:tum Jisu Kristokolo: Nolukkolo:pc ayangc odokkc mcnganc.

Tissaloniangkvdv:dok Turnamclang Mc:jvgc

² Ngolu lo:dcm Ru:ncpvncmc noluk appvng lcgangc mcma:ru:pai, aipc bido, nolum minna ngoluk kumdom,

³ ngoluk Ru:ncpvnc odokkc Abukc kcra:la noluk mc:jvglok agerkvdv:dcm odokkc aipc mcnamlok kvnggv:pc ager gernamcm odokkc mcma:ru:pc mc:tinnammcm ngolu Ru:tum Jisu Kristokolo mc:pa: mc:pa:la.

⁴ Kapila:nc ngolu kindag, Ru:ncpvnckokki mc:bomsunam bvrrangkvdvnga, jc Bv nolum balenna la:to;

⁵ kapcnc ngoluk tadponc lutaddc nolukkolo:pc agomongkokki pvnga:mang, cmpige:la kvnggv:pc ilang gvla:lo:sin odokkc Angunnc Yalodo odokkc pv:namko aropakpc mc:namc bi:danna. Nolu kindag kapinc tani:pc ngolu noluk kcra:lo lcngkansubikaji noluk lcgangc.

⁶ Odokkc nolu ngolukkclang Ru:tumkc iko gvkolo gvmvnncpc ikang, kapila:nc nolu kvnggv:pc du:glo agomdcm torvgsuto, Angunnc Yalodokki mc:pomola.

⁷ Cdcmpila nolu mc:jvgnc appv:lok ara:lo Makedoniangdo:lang Akaia:do kanggotpc ikang.

⁸ Kapila:nc nolukkolokkc Ru:tumkc agomdc Makedoniang do:pclang Akaiango:do:pc gvtomang, cmpige:la noluk Ru:ncpvnckolo mc:jvgdc appv:lo:pc gvngapkang, cdcmpcjc ngolu okkomsin lupcnampc itomang.

⁹ Kapila:nc bulu av avkvdv:dc ngoluk agomcm lutadto kapinc torvgsunamc ngolu nolukkolo pa:toji, odokkc kapc nolu Ru:ncpvnckolo:pc gvlattokuji moimang monamkvdv:dokkc.

¹⁰ Turra du:nc odokkc aro Ru:ncpvnckolok agerko gerpc, odokkc tayc:tokkcm Bvk Awodok lcgangc toya:la du:pc, sc:kom Bv sikolokkcm turmotokuji, Jisumc sc:kobv a:pcnc palvg lvgnamdokkcm ngolum mopvtyckuji.