1 TIMOTI: 5 - ANU LUGOD N. T. (BSI)

Mc:jvgnckvdv:do:pc Gvpc-ipcnanam

¹ Abv:ya:nc tani:ycm aima:pc luyoka cmpige:la bvm luyircm nok abu anckonmpc lulangka; ame:ya:nc tani:ycm bvrrompcbulu ila:sa:langka,

² abv:ya:nc nc:ngcm anncmpcbulu, ame:ya:nc nc:ngcm bvrmangcmpc, appvng napvnarcngki.

³ Tumbbonc:ng kvdv:dcm mcnggclangka sc:kobulu aroru:pc tumboji. Tumbonc:ng kolokkc jodi ommangc cdcmanggom nati:ommangc dung.

⁴ Bulu kinpo:danna dormo agercm buluk avkc cra:do:pc kinpo:motoka odokkc buluk anc abukvdv:do:pc asudko pa:latmotokuka; kapcnc Ru:ncpvnckolo cdcna torvgsupcnamdc.

⁵ Sc:kobv aroru:pc tumbonc:ngcji, odokkc atcro:pc lc:paktonc, bvk mc:tincm Ru:ncpvnckolo mc:tintobong odokkc kumna konamno odokkc kumnam kvdv:dcm longc yumcpc itvdag;

⁶ cmpige:la sc:kobv avyc-avycm kindag cmna mc:sudag bv turra du:du:do sinnc.

⁷ Scm lulvgtoka, odomvlo jen bulum aisi:ma:p nindai kama:ycpc.

⁸ Jodi sc:kaiyc bvk ope:ncgvngcm o:koi bisumang, odokkc anguru:pc bvk avkc cra:dcm, bv mc:jvgdcm mcpakto odokkc mc:jvgma:ncmyamsin aiya:mang.

⁹ Tumbo nc:ng kvdv:dcm amincm adgabmotoka jodi bv dv:tag yvngkcngko adji:ya:mvlo, milbong akko:lok nc:pc ige:la;

¹⁰ odokkc bv ainc ager lcgangc aipc aidag cmna lunampc ipc lagiyc, kapc akonc ommangcm usa:basa:toji, mibo-bonamcm lcngkantoji, aipc kumnc tani:kvdv:dok allcm vrbitoji, odokkc appvng agerlo aincm ipc avdc tolvgsutoji.

¹¹ Cmpige:la ame:nc nc:ngkvdv:dcm amincm adgabyok; kapcnc cdvlo bulu Kristokc birudi:pc mc:ma:ycnc bulu midangcm molv:dag,

¹² odokkc cdcmpila bulum aimang cmna lula mokenammcm pa:dag buluk asin tolvgla lugcsunamdcm lupaksula.

¹³ Cdcmpila:sin, bulu lo:si-lo:bagla du:ncpc dungkaisudag, buluk kumrvkc okum okumlo:pc cmmumpc gvgong gvgo:la, odokkc lo:si-lo:bagncppong imang cmpige:la do:ying kvgo:la odokkc jasisugo:la, okodcm bulu lupcma:nama:ji lugo:la.

¹⁴ Cdcmpidag ngo lupc ame:nc tumbokvdv:dc midangcm mopcnammc, ommangcm pa:toka, buluk okum crangkvdv:dcm ka:sv:mosvpcnamc, odokkc ngolum mirudc okkomsin nindaila:ma:dopc itoka.

¹⁵ Kapcnc akke Satan lcdulo gvyotla gvmvncika:bong.

¹⁶ Jodi mc:jvgnc nc:ng akoncilokkc ope:yc dung sc:kobv tumbodagji, bvm bulum idum-gvdumsumotoka; mondoli:dcm jo:namko bvgcmdopc jo:moyoka, odomvlojen cdc aroru:pc cdc sc:kobulu tumboji bulumong idum-gvdumsudopc.

¹⁷ Abv:nc aipc sc:kobulu ka:svmosvncji mcnggcnammcm anyikopc pa:motoka, anggoscscmpc cdc sc:kobv pogo:bikolo odokkc lutadgo:bikolo agerpc gerdoji;

¹⁸ kapcnc astro:dc lutag, “Nolu vboso:bom nappangcm a:m moronang samdom raktupyok,” odokkc “Ager gerncdc bvk gerrcdcm pa:pa:do.”

¹⁹ Cdvlosin abv:nc tani: birudi:pc atvko lujcmycmvlo anyikoba: awumko lukanbinnc du:tc:ma:sisscm tada:yok.

²⁰ Kapcnc cdc sc:kobulu pa:bcm itvdanna du:donc, bulum appvngkc kangkolo ge:langka, odomvlo jen akedc pcsola du:ycpc.

²¹ Ru:ncpvnckclang Kristo Jisukc odokkc balenna la:nam taycng among lutadlunc kvdv:dok kangkolo ngo nolum lujcmna ludung sc lujvgluro kvdv:scm sckkcpcsin kcmvnsuma:pc lukamdcmpc tadlangka, akonongcm ka:bila okkomsin ibi-gvbima:pc.

²² Alagcm pigabla ager togc:lvgnam kvdv:dcm mcngctyoka, cdcmanggom akontani:lok pa:bcm imvnyoka; no avycm narc:pc lc:sulangka.

²³ Assiongcm tv:tvla du:mapc, cmpige:la nok aki:dok lcgangc asudo:ko draikang alangcm tv:lang nok lckko:-lckko:lo kinamdok lcgangc.

²⁴ Tani: akelok pa:pkvdv:dc ka:begdannamc, kcba:-ba:namlo:pc lukandag, cmpige:la akelok pa:bc lcdupc lendag.

²⁵ Cdcmv:pc ainc agerkvdv:dcm ka:pa:dag; odokkc cdcmbulum cdvlo ka:pa:ma:sin; cdcbulu lc:sila du:la:mang.