1 PITOR 5 - ANU LUGOD N. T. (BSI)

Ru:ncpvnckc Tani: Kcrc:dc

¹ Cdcmpila ngo noluk ara:dok abv:nc kvdv:dcm abv:nckoncmpc lusvngcm ludo, odokkc Kristokc ipusire:ycm pa:mvnnamdok lukanbincpc ila cdc amin gvkupcnc lendoku longcdok pa:tc:mvnncpcsin ila.

² Ru:ncpvnckc kcrc:dcm ka:sv:mosv:toka cdc nokkcpc nom kanggabma:namdcm, ke:ke:more:pcmang cmpige:la mc:lvgsula,

³ anyi:sunam arcpa:nam lcga:mang cmpige:la airu:pc ilvng gvlv:la, ru:tumpc ila cdc nok ka:pcnam kvdv:dok tayc:do cmpige:la kcrc:dok gvgcnc akopc ila:pak.

⁴ Odokkc cdvlo cdc Me:r soben kanggabncdok bottarya:ncdc lcngkansuycnc nolu cdvlosin yogma:nc amin gvnc dumlupdcm pa:yc.

⁵ Cdcmv:pc nolu cdc ame:ya:nkvdv:dc abv:nckvdv:dok lukamcm tadtoka. Nolu avyc avycm attarpc gctoka, kapcnc, nolu appvngc asinc akonc akoncm ansv:la “Ru:ncpvncbv bottapc mc:sunckvdv:dcm motumdag, cmpige:la asinc agamnckvdv:dcm ayangcm bidag.”

⁶ Avyc nolu asinc ansv:sulangka cdcmpidag Ru:ncpv:nckc kvnggv:pc ilang gvla:nc alak kcvgdo, jc ayir a:dodo Bv nolum pu:pojarpomoycpc.

⁷ Bvkkolo noluk mcng kvnmc:mvn appv:dcm togc:lvgtoka, kapcnc Bv nolum kasv:mosv:dag.

⁸ Asinc agamnangka, ansula du:langka. Noluk miru uidc ngvrgo:nc inggompc, sc:kaiycm gampc ngvrgo:la dung.

⁹ Bvm morasutoka, noluk mc:jvglo kvnggv:tarv:la, kinsula jc cdc ipusire: ikv-kangkvnamkvdv:dcm rcngam appv:so noluk bvrra:pc mc:namdo madag.

¹⁰ Odokkc nolu adjio:ko ipusire:ycm pangge:la, appvng ayanglok Ru:ncpvncbv, sc:kobv nolum cdc Kristokc lo:dv longkvpc amin gvnamdo:pc gogtonc, Bv avdc mopvtyc, mogabyc, odokkc nolum kvnggv:moyc.

¹¹ Bvkkcpc migom donamdc lo:dv longkvpc ika:langka. Amen.

Kumtcrpc Kumtadsunam

¹² Silbanu kolokkc, aipc mc:jvg jvrvgnc bvrokopc kapc ngo mcnggabdagnc bvm, ngo nolukkolo:pc andcngo:pc adtobong, luyirra lula odokkc lulenbila jc cdc Ru:ncpvnckc aropc ayangdc; oddong nolu du:di:di:la du:toka.

¹³ Cdc sc:kobv Babilonolo du:nc, sc:kobv balenna lc:nampc idagnc, nolum kumtadsunamcm mclvgtag; odokkc cdcmv:pc ngok awo Markbv:sin.

¹⁴ Akoncm akonc aya:pc mc:nam dosuknam kokki kumtadsutoka. Cdc Kristokolo du:nam mcnganc noluk appvngkolopc.