1 PITOR 4 - ANU LUGOD N. T. (BSI)

Angupc Turnam

¹ Odokkc odcmpila Kristobv adinamvrro ipusire:ycm pa:la, nolu av avyc cdc mcngkamdcm mc:sutoka, kapcnc sc:kobvi adinamvrdo du:gcm gvtonc pa:bcm mcpaktokubong,

² lcdukc ayir appv:dcm adin amvrdo cdvlosin tani: mc:bo-ka:bokima:bong cmpige:la Ru:ncpvnckc mcngkamki turpc cmna.

³ Cdc gvpaknc ayirdcm cdc pvngka:bong okodcm Ru:ncmc kinma:nc tani: kvdv:dc ilv:dagaji, ka:bomc:boge:la aglvngc sa:namkvdv:dc, tvngvrdowursunamc, tvngvrsula madgo:nammc, tv:la jcnggumnammc, odokkc lujvgluro lunam kama:pc monam moimang kumnamc.

⁴ Bulu mcngabla:mang jc nolu su:pak bulum jonsuma:bong cdc c:mo:pinc aisi:ma:pc igong-gvgongdcm imvnmang odokkc bulu nolum aimang cmna ge:la ludag;

⁵ cmpige:la bulu Bvm isabcm bipa:ycku sc:kobv cdc turnckvdv:dcmnang sinckvdv:dcm kcbangcm bangkupc cmna mosv:sudagji.

⁶ Kapcnc cdcmpila:na cdc tadponc lutaddcm sinckvdv:dcmsin lutadbikanc, jc tani:kvdv:dcmpc adin amvrro kcbangcm ba:daggomsinci, bulu Ru:ncpvnckcmpc yalodo turla du:la:ycpc.

Ru:ncpvnckc Amandok Ainc Ka:sv:mosv:nc

⁷ Appvng attarlok du:tcrdc pvnga:dandu:bong; cdcmpidag noluk kumnam lcgangc mcngkintvla odokkc mc:jupmcngkapla du:langka.

⁸ Appv:dcmyam akoncm akonc aipc mc:namdcm mcngasuma:pc mc:lv:lang, aipc mc:namdc bojcrung pa:bcmsin kupkomdag.

⁹ Mcngu mcnge:kama:pc mibo-bonamcm boyitla du:langka.

¹⁰ Kapc appvng aman ako ako pa:tonc, cdcm akonkc lcgangc akonc agercm gernatoka, angu angu aya:lokkcm Ru:ncpvnckc ainc attar kanggabya:ncmpc:

¹¹ sc:kobv agom ludonc, kapc akonc Ru:ncpvnckc gombug bukkampc; sc:kobvi agercm gerbidonc, kapc akonc gergabbomdonc tornamki okodcm Ru:ncpvncbv bidonc; cdcmpc ipc jc appv:lo Ru:ncpvncmc Jisu Kristokokki amin gvmoycpc. Bvkkcpc amin gvnamdc odokkc migomdonamdc lo:dv longkvpc dungka:langka. Amen.

Kristancmpc Ipusire: Pa:nam

¹² Aipc mc:bomsunam kvdvnga kvnggv:pc vmvki romka:la ka:nam kvdv:dcm okodc nolukkolo kangkurpc cmna pvnga:dagnc cdcm mcngabla:ma:pc iyoka, nolukkcpc atv atv kangkv-tadkv ma:namc pvngangkagomsinci.

¹³ Cmpige:la su:paklo:pc nolu Kristokc du:g gvnamdcm gvmvnna du:g gvnamdcm mc:pobatsutoka, jen nolusin Bv cdvlo lenyckunc odo mc:pobatsuycpc odokkc mc:poycpc.

¹⁴ Nolum jodi Kristokc amindok lcgangc aima:pc ge:la luyc, nolu akirba:d pa:nc, lcga:dc amin gvnc yalodc odokkc Ru:ncpvnckcdc nokkolo du:do.

¹⁵ Cmpige:la nolukkolok sc:komsin tani:mokencpc du:gcm gvmoyoka, cdcmanggom dopsongkoncmpc, cdcmanggom ager germurnckoncmpc, cdcmanggom aima:pc imoncmpc;

¹⁶ ckvdaggom akonc jodi du:g gvdo Kristankoncmpc du:gcm gvmotoka, bvm anyv:sumopcnammang, cmpige:la odo amindokki bvm Ru:ncpvnckc amincm gvmotoka.

¹⁷ Kapcnc ayirdc pvngangka:bong Ru:ncpvnckc okum cra:dokkc ba:robpc kcbang ba:pc; odokkc cdc jodi ngolukkolo ba:robmvlo, odokbuluk ba:tcrdc okopc iycji cdc sc:kobulu Ru:ncpvnckc tadponc lutaddcm tadma:nckvdv:dokkc?

¹⁸ Odokkc, “Jodi dormokanc tani:dci kapcipc ilangongc turdonc, cdc asin aima:pc mcnggo:nc kvdv:dc odokkc papi: kvdv:dc okolo lcngkansuyckun?”

¹⁹ Cdcmpidag Ru:ncpvnckc mcngkampc cdc sc:kobulu du:gcm gvdonc ainc agercm imotoka odokkc buluk atmang kvdv:dcm mc:jvgnc Ru:ncmc tosv:lvgtoka.