1 PITOR 2 - ANU LUGOD N. T. (BSI)

Cdc Turnc Vlv:dc:lang Angunnc Opvndc

¹ Cdcmpidag appvng ka:ru-ka:mangnammcm mc:pagamtoka odokkc yadgo:pagongcm odokkc mc:jubmcngkabma:nc asincm odokkc Ka:ruka:mangcm odokkc appvng lume:pc lujcmnam lunamcm.

² Anupc onam Kowawcmpc, angunpc narc:nc gakvrdcm asinang olangka, jc cdcmpc ila nolu moturnamdo:pc sv:sa:ycpc;

³ kapcnc nolu Ru:tumkc ayangabbom anka:la kangkvtobong.

⁴ Bvkkolo:pc gva:toka, cdc turra du:nc vlv:do:pc, taniyc mcpaknamdc cmpige:la Ru:ncpvnckc kangkolo balenna la:namc odokkc airu:pc arckannc;

⁵ odokkc turnc vlvngkoncmpc nolu av-avkvdvngc dormokanam yalokvdvng okumpc mosa:toka, angunnc dormo ager gerncpc, dormokanam yalolok palvgnampc bulu Jisu Kristokokki Ru:ncpvnckolo bisula:dopc.

⁶ Kapcnc cdc astrong agomdo lutag: “Ka:toka, ngo Jiondo turra du:nc vlvngko tvla lc:tung, sungkendok balenna lc:namko odokkc airu:pc arc kancko, odokkc sc:kobvi mc:jvgdonc Bvm anyv:suma:yc.”

⁷ Nolukkcpc cdcmpidag sc:kobulu mc:jvgdagnc, Bv airu:pc arckannc, cmpige:la cdc sc:kobulu mc:jvgma:nc, “Cdc vlvngardcm okodcm okum monckvdv:dc aimang cmna mcpaktonc cdc sungkendok mosa:nancpc ikang,”

⁸ “Odokkc vlvng apvko okodc tani: kvdv:dcm lcsudsumoycnc, pvtan vlvngkonc jc okodc bulum oledmoycpc;” Kapcnc bulu lcsudsudag lcga:dc bulu agomdcm lukamdcmpc tadmang, kapc bulum ilangka cmna lutungaji.

⁹ Cmpige:la nolu balennam opvnko, migom dormoager gernclok bottcnc incpc, angunnc opvnko, Ru:ncpvnckc avkc tani:yc, jen nolu Bvk mcngapla:ma:nam ager gernam kvdv:dcm lutadbiycpc sc:kobv nolum Bvk ka:rvgsula:ma:nam pva:do:pc goglentoji.

¹⁰ Lcko nolu taniycimangai cmpige:la nolu su:pak Ru:ncpvnckc tani:yc; lcko nolu mc:yinsunamcm pa:mangai cmpige:la su:pak nolu mcyinsunamcm pa:to.

Ru:ncpvnckc Pagbokvdvng

¹¹ Aipc mc:bomsunam kvdvnga, ngo nolum kumna:sola: ludung amikc amonglo du:nc odokkc yc:bomla lcngkunampc adin amvrdok mc:boka:bodcm mcma:pc du:dopc cdc noluk yalo kvdv:dok birudi:pc mimagcm modag.

¹² Ru:ncpvncmc kinma:nc tani: kvdv:dok dungkodo aipc ila:sa:langka, odomvlo jen bulu noluk birudi:pc aima:nc ager gernckopc ludaggom, bulu noluk ainc agerkvdv:dcm ka:ycpc odokkc Ru:ncpvncmc amin gvmoycpc cdc palvg lvgdoku longcdo.

¹³ Ru:tumkc lcgangc tani: monam rcngam lujvglurrom lukamdcmpc tadlangka, cdc migomlok migomcm appvngcm bottcya:ncmpc,

¹⁴ cdcmanggom among ru:tum kvdv:dcm Bvk mclvgnammcmpc cdc sc:kobulu aima:nc agercm gerdagnc cdcmbulum palvgcm lvgdopc odokkc cdc sc:kobulu aincm idonc cdcmbulum aipai bidopc.

¹⁵ Kapcnc cdc Ru:ncpvnckc mcngkampc jc ainc agercm gerla:gerla: okkomsin kinma:pc tani:kvdv:dc kinma:nammcm aso:pc du:moycpc.

¹⁶ Av mcngkampc du:ncpc turla du:langka, cdcmanggom noluk av mcngkampc du:namdcm aima:nc ager gernapc iyoka; cmpige:la Ru:ncpvnckc ager gerya:ncpc ilangka. Appvng tani:ycm mcnggclangka.

¹⁷ Bvrra:pc mc:namcm aipc mc:langka. Ru:ncpvncmc pcsolangka. Migomlok migom kvdv:dcm mcnggclangka.

Kristokc Ipusire: Pa:namdok Lcngkanko

¹⁸ Pagbokvdvnga, appvng mcnggcnamkokki noluk ru:tum kvdv:dcm agom lukamdcmpc tadlangka, cdc asin ansvngo:ncdcmmang odokkc asin agamcmbulum, cmpige:la bottc bottcpc lusunamkvdv:dcmsin.

¹⁹ Kapcnc akoncm aidag cmna lula tolvgnammc jodi, Ru:ncpvncmc mcnga:nckoncmvlo, bv kinamcm menrasudag kcbang banggotma:pc ipusire:ycm pa:do.

²⁰ Kapcnc cdc oko inam aminko du:ycn, jodi nolu cdvlo imurko ige:la dcmkosudo odok lcgangc mentumsula torvgsudonc? Cmpige:la jodi cdvlo nolu ainc agercm gerdonc odokkc odok lcgangc mentumsula torvgsudo, nolukkc Ru:ncpvnckc aidag cmna tolvgnammc dung.

²¹ Kapcnc odok lcga:pc nolum gogtung, kapcnc Kristobv:sin ipusire:ycm noluk lcgangc pa:to, nolum kanggodkopc lcngkanbila, jc nolu Bvk lckorcm kormvnpcnamc.

²² Bv oko pa:bcmsin itomang; Bvkkolo oko yadgo:pagongcsin katomang.

²³ Cdvlo Bvm aima:pc lutoji, Bv tu:latsula aima:pc lutomang; cdvlo Bv ipusire:ko pa:toji, Bv pcsodopc momvgmangai, cmpige:la Bvm Bv mc:jvgto sc:kobv aipc kcbangcm ba:toji.

²⁴ Bv avdc ngoluk pa:pkvdv:dcm Bvk avkc amvrdo Kurus talc:do jonggcbito, jc ngolu pa:p lcgangc siycpc odokkc dormo kanamlokkcpc turycpc. Bvk tarckvdv:dokki nolum csa:motoku.

²⁵ Kapcnc nolu me:r sobencmpc gvnyokla gvdungai, cmpige:la su:pak Me:rsoben ka:svncdo:pc odokkc yalokvdv:dok Ka:svmosvncdo:pc gvlatbotakkubong.