1 KORINTIANG KVDVNG 9 - ANU LUGOD N. T. (BSI)

Mclvgla Ager Germonamlok Gerpcnam Agerkvdvng

¹ Ngo morvt pa:ncma:lang? Ngo mclvgla ager germonammcma:lang? Ngoluk Ru:tum Jisu Kristomc ka:mangalang. Ru:tumkolo nolu ngok ager gerncma:lang?

² Ngo amikcpc mclvgla ager gerncmanggom, cmmangargom nolukkcpci ngo ido; Kapila:nc nolu ngok mclvgla ager gernam aminnok Ru:tumkolo tubojedc.

³ Sc:na ngok lurasunamcnc cdc sc:kobulu ngom anka:la ka:doji.

⁴ Nolukkc donamclang tv:namkvdv:dcm dona-tv:nanc lulvgla:nam kama:lang?

⁵ Ngolukkc yamncko du:bogvbosula du:la:nammc kama:nci, cdc ake mclvgla ager germonam kvdv:dcmpclang Ru:tumkc bvrokvdv:dcmpc odokkc Kepaskcmpc?

⁶ Cdcmpcmanggom cdc Barnaba:bv:lang ngowo:ma:lang sckkc turra du:pc ager germa:pc du:namc du:la:nammc kama:nc?

⁷ Sc:konu avkc murkongcm pidsula mimag monc agercm gerdon? Sc:ko angur ba:ri:ycm avyc a:ycm dosuma:pc idon. Sc:konu simvn kcrcngko odok gakvrko yumma:pc kanggabdonc?

⁸ Scm ngo tani: ilang gvlangnampc ludu:nci? Lujvglurodc c:mo:pc cdcm luma:lang?

⁹ Kapila:nc cdcm Mose:kc lujvglurodo adtak, “Go:ru adorko a:m samdom nappa:dcm ycngkapyok.” Cdc go:rudok lcgangci Ru:ncpvncbv mc:dang?

¹⁰ Bv ngoluk appvngkc lcgangc luma:lang? Cdcm ngoluk–appvngkc lcgangc adtungai, lcga:dc a:l gvncdc mc:tinna a:lcm gvpcnammc odokkc a:m samncdc mc:tinna a:mdok samrcko asudko pa:pc cmna samdo.

¹¹ Ngolu yalo ainc agomcm nolukkolo pittomvlo, cdc airu:pc nolukkolok attarko avpc pa:namdcm gadkumvlo bojcyen.

¹² Amme scm nolukkolok sanggabla la:la:nampc mamvlo, ngolu ckvdaggom bojcya:pcma:lang? Cdcmpc idaggomsinci, ngolu cdvlosin cdc ilang-gvla:dcm inagvnamang, ckvdaggom ngolu atv attcm mentumsudo Kristokc tadponc lutaddcm lukodo atvko lutcranko lulvgnamdcmpcyam.

¹³ Nolu kinma:nci jc cdc sc:kobulum kumko okumdo ager gerdopc mctu:ji buluk donamcm kumko okumdok pa:do cmna, odokkc cdc sc:kobulu palvgkodo agercm gerdoji palvgla bikodok pa:mvndo cmna?

¹⁴ Cdcmv:pc, Ru:tumbv kvnggv:pc lulvgto jc cdc sc:kobulu tadponc lutaddcm ludoji turnancm tadponc lutaddokki pa:pa:do.

¹⁵ Cmpige:la ngo cdc pa:la:nam kvdv:dok akosin inagvnamang, cdcmanggom ngo scm cdcmpinc pa:namko lcgangc admang. Kapila:nc ngo cdcmyam ngok bottapc lusunam luga:dokkcm lupakmvlo siycpc.

¹⁶ Kapila:nc ngo tadponc lutaddcm lubimvlo, cdc ngom atv bottapc lunamko lugangcm bimang. Kapila:nc ngokkolo ipcgvpcnammcm jongclvgtag. Ngo tadponc lutaddcm lubima:mvlo mcngkesula sipcnampc iyc!

¹⁷ Kapila:nc ngo jodi cdcm ngok mcngkamkokki iyc, ngok amanc dung; cmpige:la ngok avkc ilvngkokki ima:mvlo, ngom bottapc gerpcnam agerkokki lulvgtag.

¹⁸ Ngok amandc cmpcmvlo okodcn? Scwo:na: jc ngok lutad lukolo ngo arc la:ma:pc, ngok avkc ilangcm ina-sa:nama:pc tadponc lutaddo.

¹⁹ Kapila:nc ngo appv:tani:lokkc mopvtdaggom, ngo avyc appvngkcpc pagbopc isuto jc ngo bojcyangko mopvla:dopc cmna.

²⁰ Jiwu kvdv:do:pc ngo Jiwuakopc ito, Jiwukvdv:dcm mopvtpc cmna; cdc lujvg lurodok kcvgpc du:nckvdv:dokkcpc ngo lujvg lurodok kcvgpc du:ncmpc ito–ngo avyc lujvglurodok kcvgdo du:mangagom–jc ngo:jen cdc lujvglurodok kcvgdo du:nckvdv:dcm mopvtpc.

²¹ Cdc lujvg lurodokkc angupc du:nckvdv:dokkc–ngo lujvg lurodok mo:ro:pc du:ncmpc ito–Ru:ncpvnckolo:pc lujvg luro kama:ncpc ima:pcmang cmpige:la Kristokc lujvg-lurodok kcvgdo–jc ngo:jen cdc lujvg-lurodokkc moro:pc du:nckvdv:dcm mopvtla:ycpc.

²² Asin kvnggv:ma:nc kvdv:dokkcpc ngo kvnggv:ma:ncpc ito, jc ngo:jen kvnggv:ma:nc kvdv:dcm mopvla:pc cmna. Ngo appv: tani:lo:pc appv:pc itobong, jc appv:pc ila ngo akkemci mopvla:ycpc cmna.

²³ Ngo cdcm tadponc lutaddok lcgangc ido, jc ngo odok akirba:dkvdv:dok pa:mvnpc cmna.

²⁴ Nolu kinma:nci jc dukka:mvnsukolo dugnc appv:dc dugdo cmna, cmpige:la akkongkonc amandcm pa:do cmna?

²⁵ Cdcmpidag dugtoka no:jen cdcm pa:ycpc. Appvng moduduka:mvnsunc mentumsula du:namcm appvng agerlo idag. Bulu cdcm omvgpcnc dogsori: abvlcgang idag, cmpige:la ngolu omvgpcma:nc abv lcgangc ido.

²⁶ Aidag, C:, ngo kanggod kama:pc dugmang, ngo csarlo kvgka:mvnsunc akoncmpc kvgka:mvnsumang;

²⁷ Cmpige:la ngo ngok amvrcm kvgsudo odokkc cdcm momapdo, ckvma:mvlo ammem lutadcm lubige:la gno avyvngc tadma:ncpc ipagyc.