1 KORINTIANG KVDVNG 8 - ANU LUGOD N. T. (BSI)

Moimangcm Binam Donam Attar Agom Tawunam

¹ Su:pak donamcm moimang kumkolo ilvgnamdcmbulum: ngolu kindo jc “Ngolu appvngc kinnam agomcm kindo.” “Kinnamc” da:li:pimpudcmpc go:sa:modag, cmpige:la aipc mc:namc mosa:do.

² Akonc jodi mcngkvla mc:yc jc bv o:kai kindo, bvk kinpcnamdcm cmpidaggom kinmang.

³ Cmpige:la akonc Ru:ncpvncmc aipc mc:mvlo, Bvkkokki akonc kinnampc idag.

⁴ Cdcmpidag, monam moimangcm binamcm donamcm donamdcm, ngolu kindag “Jc monam moimangdokkc aro:ru:pc du:namc kamang,” odokkc “Ru:ncpvnc kamang cmpige:la akkongko.”

⁵ Kapila:nc taycngamo:to cdcmanggom tani:amo:so uiyc cmnam dung–aropcsinci bojcrungko “Uiyc dung” odokkc bojcrungko “ru:tumc” dung–

⁶ Ckvdaggom ngolukkcpc Ru:ncpvnc akkongko dung, Abudc, okolokkc appvng attarcm ru:lentoji odokkc okolokkc ngolu du:doji, odokkc Ru:tumako, Jisu Kristobv, sckkokki appvng attarkvdv:dc odokkc sckkokki ngolu du:du:ji.

⁷ Cdcmpc idag-imanggom, appvngc sc kinnamscm kinmang. Cmpige:la akelokkc, siddv longckopc monam moimangcm kumnamcm kumyitla aropakpc monam moimangcm binam donamkvdv:dcm dodag; odokkc buluk asin mcngc-saggc, mc:murra mc:ncpc idag.

⁸ Donamc ngolum Ru:ncpnckolo aidag cmna lubima:yc. Ngolu aima:ya:ncpc imang ngolu jodi doma:mvlo, odokkc aiya:ncpc imang ngolu jodi domvlo.

⁹ Kanggabo:lang ckvma:mvlo sc noluk dolvngcm donamdc kapcjila lcsudsuko sv:tu:pc sckkai mcngkinma:nc kvdv:dokkcpc iyc.

¹⁰ Kapila:nc akonc jodi nom ka:mvlo, kinncpa:nc kanc tani:konc, monam moimangcm kumko okumkolok tcbulkolo, bv asin pvta-monncmpc ima:yclang, bvk mcngc-sagcdc mcngkinma:mvlo, monam moimangcm binam donamdcm dopc?

¹¹ Odokkc noluk kinnamkokki cdc mcngkinma:nc tani:dcm moketo, oko bvrodok lcgangc Kristobv sika:ji.

¹² Cdcmpidag nok bvrodok birudi:pc pa:bcm ila odokkc buluk mcngc-saggcm tarcmola cdvlo cdc mcngkinma:ji no Kristokc birudi:pc pa:bcm ido.

¹³ Cdcmpidag, donamdc jodi ngok bvrokc imur lcga:pc ido, ngo cdvlosin adincm doma:yc, ckvma:mvlo ngo ngok bvrodcm domurmoncpc idag.