1 KORINTIANG KVDVNG 4 - ANU LUGOD N. T. (BSI)

Kristokc Mclvgla Ager Germonam Tani:

¹ Cdcmpcna kapc akonc ngolum mcnggcpcnamcnc Kristokc ager gerya:ncmpc odokkc Ru:ncpvnckc mcngapla:ma:nam agomlok kanggab-daggab-ya:ncpc.

² Odokkcsinda kanggab-daggab-ya:ncdc cdcsin du:pa:yc jc bulu mc:dapsirsirpa:yc.

³ Ckvdaggom ngokkcpc cdc adjio:nc agerc jc ngom nolukkokki kcba:ba:namdc cdcmanggom tani: kcba:-ba:nanc kcbangkokki.

⁴ Ngo avwcsinci kcbangcm ba:sumang. Ngo avkc birudi:pc okkomsinci ansuka:sumang, cmpige:la ngo odokki imurkama:ncpc imang. Cdc Ru:tumbv:pak sc:kobv ngom kcbangcm ba:doji.

⁵ Cdcmpidag ayirdok po:pcbong kcba:ba:namcm, Ru:tumbv gvkuma:dapc lulenyoka, sc:kobv su:pak kcmolo lc:nam attarkvdv:dcm pva:lo:pc la:lenycji odokkc asinlok mc:nam sagnam kvdv:dcm lenabmoyckuji. Odo appvng tani:yc Ru:ncpvnckolokkcm aipai cmnam pa:suycku.

⁶ Ngo sc appv:scm avkcpclang Apolo:kcpc tolvgamsudung noluk ainam lcga:pc, bvrokvdvnga, jc nolu ngolukkokki kinycpc okodcm adtu:ji odokkc gvbarma:dapc, jc nolukkolok akoncsin da:lipimpudcmpc akonkc lcgangc akonc go:puta:yok.

⁷ Kapila:nc sc:ko nolukkolo atvko anguko ka:begdang? Nolukkc okko du:n nolu okodcm pa:toma:ji? Nolu cdcm pa:tomvlo, kapila nolu bottapc mansudon cdc aman kama:ncpc?

⁸ Nolu pvngkangcibong! Nolu mircmcika:bong! Ngoluma:pc nolu migompc ingabcika:bong! Odokkc cdc noluk migomdonamdc ka:svmosv:ya:nci, ngolu jc noluk lcdulo ka:sv:mosv:namdcm pa:mvngcppai!

⁹ Kapila:nc ngo kindag jc Ru:ncpncbv ngolum appv:lok lcddarncdcm lcngkanto; sidopc lulvgnam tani:ycmpc; kapila:nc ngolu mo:pvsokkcpc, taycng among lutad lunckvdv:dokkcpc odokkc appvng tani:kvdv:dokkcpc ka:pc kare:nampc ikang.

¹⁰ Ngolu Kristokc lcgangc monba:ba:nc, cmpige:la nolu Kristokolo kinncpa:nc. Ngolu ilang gvla:ma:nc ckvdaggom nolu ilang-gvla:nc. Nolum mcnggcla du:namc, cmpige:la ngolum amin aima:pc gvmonammc.

¹¹ Silokc ayirso:pc ngolu kcnongclang tv:lv:dung, ngolum bcdu gasor kama:pc odokkc dcmko pakosula odokkc okum rvgngong kama:pc ila dung,

¹² odokkc ngolu agercm gerdung, ngoluk avkc alakkokki gagsula. Cdvlo aisi:ma:pc ludoji, ngolu akirba:dcm bido; cdvlo irvsinyom idoji, ngolu mentumsula du:do:

¹³ cdvlo lume:la ludoji, ngolu aiyo:pc du:do; odokkc su:pak mo:pvsok yoppaknam attarcmpc, appvng attarsok koiya:pc ika:bong.

¹⁴ Nolum anyi:mopc cmna ngo scm admang, cmpige:la ngok aipcmc:bomsunam ommangcmpc nolum aipc ainc agomcm luyirpc cmna:mvn.

¹⁵ Kapila:nc nolukkc kvngapla:ma:nam gvyirnc Kristokolo dunggom, nolukkc bojcrungko tadponc lutaddokkc Kristokolo abupc ikang.

¹⁶ Ngo nolum kvnggv:pc lusv:la ludung, cmpcmvlo, ngom ka:yv:sula gvncpc itoka.

¹⁷ Cdcmpidag ngo nolukkolo:pc Timoti:mc mclvgto, ngok aipc mc:bomsunam odokkc Ru:tumkolo mc:dapsirsirnc awodcm, Kristokolo nolum ngok lambckvdv:dcm lubila mc:pa:modokupc, mondoli: appv:lo ngo cdcmbulum luyirbinamdcmpc.

¹⁸ Akke ngowwong cmna mc:sudag, ngo nolukkodo:pc gvkvma:pc ige:la:sin.

¹⁹ Ckvdaggom ngo nolukkolo:pc lomdanna gvyc, Ru:tumbv mc:mvlo, odokkc cdc tani:kvdv:dok ngowwong cmna lusunamdcmma cmpige:la buluk ilanggv:la:dcm malenyc.

²⁰ Kapila:nc Ru:ncpvnckc migomdoko amo:dc agom lukolo du:mang cmpige:la ilang-gvlanglo:pak.

²¹ Nolu okodcm mc:dang? Ngo nolukkodo:pc danggi:ko bomna gvycnci, cdcmanggom aipc mc:namkokki aipc asin ansv:nam yalokokkiyc?