1 KORINTIANG KVDVNG 16 - ANU LUGOD N. T. (BSI)

Mc:jvgla Gvmvnnc Ajon Lcgang Murkong Binam

¹ Su:pak mc:jvgla ager gernckvdv:dok lcgangc bidumsunam agomkvdvng: Galatia mondoli:dcm ngo kapc lukanbikanc cdcmpc nolusin ipcnammc.

² Longc kvnvddok a:pongarnc longcdo, noluk appvngc asudowko langcrla lc:lang odokkc cdcm lcngkumlang, bv bojcbomna gvycpc, odomvlo ngo cdvlo gvycnc bidumsunamcm bipc urkusupcnam kama:ycpc.

³ Odokkc cdvlo ngo gvpv:ycnc, nolu sc:kobulum do:jvgkki noluk amancm Jerusalempc bomdop jvglvgtonc ngo cdcmbulum mclvgyc.

⁴ Ngosin gvnamdc aiycpc cmna ka:mvlo, bulu ngom gvjonycpc.

Poulkc Tarung Ru:nam

⁵ Makedonia:dok gvko:la gvge:la ngo nolum gvka:la ka:yc, kapila:nc ngo Makedonia:dok gvko:la gvpc cmna mc:namko dung,

⁶ odokkc ngo noluk lcdulo du:mvnciycsong cdcmanggom dvgvndo du:yc, odomvlojen ngok lambc gvdodcm lommoycpc, okolopci ngo gvycji.

⁷ Kapila:nc ngo nolum su:pak ngok gvla du:dosommum ka:lv:mang; ngo noluk lcdulo ayir asudkopc du:lv:dag, Ru:tumbv mclvgmvlo.

⁸ Cmpige:la ngo Ipesu:do du:yc Yvngo longcdok donam tv:namdo:pc.

⁹ Kapila:nc ngokkcpc pontaru:nc yabgoko ager sa:nc agerko kuge:kang odokkc clc bojcrungko miruc dung.

¹⁰ Timoti:bv cdvlo gvyckunc ka:langka noluk ara:lo bvm aikampopc du:molangka, kapila:nc bv Ru:tumkc agercm gerradung, ngok gerkampc kapc gerdu:ji.

¹¹ Cdcmpidag sc:komsin bvm lupakmoyaka. Bvk lambclo mcnganpc bvm lommolang, bv:jen ngokkoso:pc gvlatyckupc; kapila:nc ngo bvm bvrrangkvdv:do dungkolo ka:lv:dung.

¹² Nolu bvro Apollokcpcdan, ngo kvnggv:pc luyirtung nolum gvla ka:dopc ake bvrrang kvdv:dcm gvjonna, cmpige:la cdc bvk gvlv:danmangai su:pak gvpc. Bvk gvpcnam lendodo bv gvycpc.

Lutcr Agom

¹³ Ansula du:langka, noluk mc:jvgnamno kvnggv:pc du:la daglangka, asin pvtalangka, torlangka.

¹⁴ Noluk inam appv:dcm ayangkokki ilangka.

¹⁵ Su:pak, bvrokvdvnga, nolu kindag jc Akhaia:dok Stipenkc cra:dcai mc:jvgla gvmvnpo:ncdc, odokkc bulu aipc mc:jvgla ager gernc tani:kvdv:dok agerlo avyc tolvgsuto;

¹⁶ ngo nolum luyirdung cdcmpinc tani:kvdv:dok lukampc gvlang odokkc appvng ager gerjoncm odokkc du:gsila ager gerncm.

¹⁷ Stipenkc odokkc Portunatakc odokkc Akaikukc gvdodcm mc:polang, kapila:nc bulu noluk kama:nammcm pv:moto;

¹⁸ kapila:nc bulu ngok yaloscm mc:sarsumotoku cdcmv:pc nolukkcmsin. Cdcmpinc tani:kvdv:dcm kangkinnangka.

¹⁹ Asia:dok mondoli:kvdv:dc aika:langka cmna mc:lvgtung. Akila: odokkc Priska:bv, buluk okumdo lckko:pc mondoli:do dung, Ru:tumkc aminno nolum aika:lang cmna asinbokki mc:lvgtung.

²⁰ Bvro appv:dc aika:lang cmnamcm mc:lvgtung. Akoncm akonc angunnc dosukki dosukmvnsulang.

²¹ Ngo, Poulbv, ngok avkc alakki sc aika:lang cmnamscm adlvgtung.

²² Sc:kaikc jodi Ru:tummc aipc mc:namko kama:mvlo, bvm pelvgnampc ika:kangka. Ngoluk Ru:tuma, gvtokuk.

²³ Ru:tum Jisukc aya:dc nolukkolo dungka:langka.

²⁴ Kristo Jisukolo ngok aipc mc:namc nolukkolo dungka:langka. A:men.