1 KORINTIANG KVDVNG 12 - ANU LUGOD N. T. (BSI)

Angunnc Yalodok Aman Binam

¹ Su:pak bvrokvdvnga, ainctaycng among yalodok aman agomc, ngo nolum c:mo:pc incpc imolv:mang.

² Nolu kindag jc nolu cdvlo ui-kumna:ji nolu agom luma:nc monam moimang kvdv:do:pc gvyodbola gvtungai, cdcmpc idag imanggom nolum gvnampc idungaboi.

³ Cdcmpidag ngo nolum mcngkintoka cmna mc:dag jc sc:kosin Ru:ncpvnckc Yalodokki luncdc “Jisumc pelvgnampc ika:langka!” Cmna luma:yc, odokkc sc:kobv:sin Angunnc Yalodokkima:mvlo “Jisubv Ru:tumc” cmna lula:ma:yc.

⁴ Su:pak angu angu amanc dung, cmpige:la yallo akkongko;

⁵ Odokkc angu angu agerc dung, ckvdaggom Ru:tum akko:dc;

⁶ odokkc angu angu agerc dung, ckvdaggom cdc Ru:ncpvnc akko:dc sc:kobv ilang-gvlangcm odobulu appv:do ako akko:pc bidagji.

⁷ Appvngcm appvngkc amin lcgangc Yalodok lcngkansunamcm bitung.

⁸ Akoncm Yalodokki kinjvgla kinnam agomcm bitung lukur lule:la lubila:dopc, odokkc akonkoncm kinnam agomcm lubila:dopc cdc Yalo atcro:doggongkcmpc, akonkoncm mc:jvgnammcm cdc Yalo akko:dokki,

⁹ akonkoncm csa:mokula:namdok amancm Yalo akko:dokki,

¹⁰ akonkoncm mcngapla:ma:nam ager gernamcm, akonkoncm lungor lunamcm, akonkoncm yalokvdv:dcm angu angupc kangkinna lubila:dopc, akoncm angu angu agom lula:namcm akondcm agom lunamkvdv:dcm lukurbila:dopc.

¹¹ Cdc appv:dc Yalo akko:dokki ilanggvlangcm binamongc, sc:kobv atckpc Bv mcngkampc idopc bidagji.

Amvr Atcro:lo Bojcrungko Alc-alag Du:nam

¹² Kapila:nc amvrdc kapc akonc odokkc bojcrungko angu angu ajon amvr-ammo du:nc, odokkc amvrdok alc alag appv:dc, bojcrungko idaggom, amvr akkongko, cdcmpidag cdc Kristokolo dung.

¹³ Kapila:nc Yalo akodokki ngolu appvngc amvr akodc baptismongcm langka–Jiwudaggom cdcmanggom Girikdaggom, pagbodaggom cdcmanggom avkc mc:supc du:ncdaggom–odokkc appv:dcm Yalo akkongkolok tv:moto.

¹⁴ Kapila:nc amvrdc amvr-amo akkongdo kancmang cmpige:la bojcrung kokki.

¹⁵ Alcdc jodi luyc, “Ngo alakmangga:lok, ngo amvrdokkcpc imang” cdc amvrdokkcpc atv adji:ya:nc inyopkopc amvramodokkcpc pv:ma:dopc imoma:ycpc.

¹⁶ Odokkc jodi yeru:dc luyc, “Ngo amikpc imangga:lok, ngo amvrdokkcmang,” cdc amvrdokkcpc atv pv:ma:nckopc ima:ycpc.

¹⁷ Jodi amvr appv:dc amik appirkopc iyya:mvlo, tadnancdc okolo du:ya:ncm? Amvr appv:dc jodi yeru:pc iyya:mvlo, okolok namnamdc du:ya:n?

¹⁸ Cmpige:la cdcm kapc, Ru:ncpvncbv ru:lvgtonc amvrdo alcalagkvdv:dcm, appv:dcm ako akkopc, Bv kapc mc:toji.

¹⁹ Appv:dc alcalag akko:ya:mvlo, amvrdc okolo du:ya:ji?

²⁰ Cdcm kapc idagji bojcrungko angu angu lctv-lagpangc dung, ckvdaggom amvr akkongko.

²¹ Amigdc alagdcm lula:mang, “Ngo nom mamang.”

²² Kekonpc lupc, amvrdok alc-alag kvdv:dc adji:ya:pc torncpc ka:namkvdv:do mcpakla:ma:nammc,

²³ odokkc cdc amvrdok alcalagkvdv:dcm okodcm bulu ngolu adji:ya:pc mcnggcpcnamcmna mc:donc ngolu bottcya:nc mcnggcm mclvgdo, odokkc ngoluk kangkanma:nc alc-alakkvdv:dcm aiya:pc mclvgdo,

²⁴ okodcm ka:yumnc alcalakkvdv:dc mama:ji. Cmpige:la Ru:ncpvncbv amvrdcm rungkumsula Ru:to, adji:ya:nc alc alagkvdv:dcm mcnggcnammcm bila.

²⁵ Odomvlo amvrdo angunammc kama:ycpc cma, cmpige:la jc adinamvr kvdv:dc c:mo:pinc ka:mvnsunamcm akonc lcgangc ka:ycpc cmna.

²⁶ Adinamvr akonc rammvlo, appv:dc ramdag lckko:pc; akoncm mcnggcycmvlo, appv:dc lckko:pc mc:podag.

²⁷ Cdcmpinamc nolu Kristokc amvrc odokkc atckpc odok adinamvrc.

²⁸ Odokkc Ru:ncpvncbv Kristokc mondoli:do mclvgla ager germonamkvdv:dcm bia:danna bitung, lckondo lungor lunckvdv:dcm, lcumdo poyirnckvdv:dcm, odokkc mcngapla:ma:nam ager gernckvdv:dcm, odokkc csa:mokunckvdv:dcm, ager gerdumsunc-kvdv:dcm, migom donc kvdv:dcm, angu angupc agom lunckvdv:dcm.

²⁹ Appv:dc mclvgla ager germonammclang? Appv:dc lungor lunnclang? Appv:dc poyirnclang? Appv:dc mcngapla:ma:nam agercm gerdolang?

³⁰ Appvnglokkc csa:mokumnam amanc olang? Appvngc angu angu agom lulangki ludolang? Appvngc lukonsunamcm ludolang?

³¹ Ckvdaggom kvnggv:pc bottaya:nc amandcm pa:lv:langka. Odokkc ngo cdcmyam aipakya:nc lambcko lcngkanyc.