1 KORINTIANG KVDVNG 10 - ANU LUGOD N. T. (BSI)

Monam Moimang Birudi:pc Lutad Lunam

¹ Ngo kinpc mc:dag bvrokvdvnga, jc ngoluk abukvdv:dc mukkang kcvgdo dungai, odokkc appvngc siycng asidok gvko:la gvto,

² odokkc Mose:kolo appvngc mukka:do baptismongcm la:to odokkc siycng asido,

³ odokkc appv:dc c:mo:pinc cdvlosin dokvma:nam donamdcm doto odokkc appv:dc cdvlosin tvngkvma:nam tv:namcm tv:to.

⁴ Kapila:nc bulu kangkvma:nam Vlv:dokkcm tv:to okodc buluk lcdulo gvmvnka:ji, odokkc cdc Vlv:dc Kristobvai.

⁵ Cdcmpc idag imanggom buluk bojcrungcm Ru:ncpvncbv asinc aipc mc:lvgsumangai; kapila:nc bulum yumra:do mokkeyamto.

⁶ Su:pak cdc agomkvdv:dc ngolukkcpc po:pcbong lutadno:nammc, buluk ikampc aima:ncm ilv:ma:dopc.

⁷ Monam moimang kumncpc iyoka buluk akke inamdcmpc; cdcm adla lcngkamdcmpc, “Tani:kvdv:dc dopc tv:pc cmna tedtu:to odokkc so:manyirmanpc cmna dagrobkang.”

⁸ Ngolu aisi:ma:nc agercm germopc mcngkvmopc lagimang bulukkolok akke gernamdcmpc, odokkc vyvngkolang awum lvngkokopc longc atcro:do singapkang.

⁹ Ngolu Ru:tummc anka:la ka:pa:ru:mang, buluk akke ka:namdcmpc odokkc tabvkokki singapnamdcmpc;

¹⁰ cdcmpcmanggom mvnmvnaipcma:nammc, buluk akke inamdcmpc odokkc Mokemoyencdokki moke-moyenamdcmpc.

¹¹ Su:pak cdc bulu bulum lutadma:pc ikang, cmpige:la cdcbulum ngoluk luyirnapc adla lc:to, okokvdv:dok tayc:do dv:tak kvdv:sok du:tcrc pvngangka:bo:ji.

¹² Cdcmpidag sc:kobv dagla dung cmna mc:sudagji ansumotoka ckvma:mvlo bv kcdtabyc.

¹³ Oko ankangka:namcsin nolum imurko imomang okodc tani:lokkcpc cmmo:pc ima:ji. Ru:ncpvncbv mc:jvgdag, odokkc bv noluk torasula:namdcmyam bottaya:nc ankang-ka:namcm imoma:yc, cmpige:la ankang ka:namdokkisin dugpvtsunanc lambcm biycpc, jc nolu cdcm menrasula:ycpc.

¹⁴ Cdcmpidag, ngok mc:bomsunam ajonkvdvnga, monam moimang kumnamdcm mcpaktoka.

¹⁵ Ngo aipc kinnc mcngc-sagc kanc tani:kvdv:dcmpc ludo; nolu avkcpc avyc mcngcsagcla ka:sutoka ngo okkom ludoji.

¹⁶ Akirba:d kanc tv:nanc ko:pdcm okodcm ngolu akirba:d bidonc, cdc Kristokc i:do lckopc tv:bosupcnamma:lang? Cdc pita:dcm okodcm ngolu penpordonc, cdc lckopc Kristokc amvrdo penporbosuma:lang?

¹⁷ Lcga:dc pitangc aborongko, ngolu sc:kobulu amvr atcrongkoji; kapila:nc ngolu appvngc pita:dcm lckopc dodo.

¹⁸ Israeldok tani:kvdv:dcm mcngka:la ka:to; palvgkodo palvgnamdcm donc appv:dc lckko:pc jonncma:lang?

¹⁹ Okkom ngo cmpcmvlo lukanycn? Cdc monam-moimangcm binamcm donamdc atvkopc idagnci?

²⁰ Ma: ngo lukanbidung jc uikumnc kvdv:dc okodcm palvgdagnc bulu uiycm bidag Ru:ncpvnc kolo:pcmang. Ngo nolum uikokki ajoncmpc imolv:mang.

²¹ Nolu Ru:tumkc tv:nanc ko:pdcmsin odokkc uidok tv:nanc ko:pdcm tv:la:mang. Nolu Ru:tumkc tcbuldcmnang uikc tcbuldcm du:bosula:mang.

²² Ru:tummc ncnckopc luyosuycnci? Ngolu Bvmyam torya:dagnci?

²³ “Appvng attarc lujvg-luro lukamdcmpc idag,” ckvdaggom appvng attarc idum-gvdumsumang. “Appvng attarc lujvg-luro lukamdcmpc idag.” Ckvdaggom appvng attarc tayc:pc mosa:lvgmang.

²⁴ Sc:komsin bvk avkc ainamcm mamoyok, cmpige:la bvk kumrv korvdok ainamcmpak lumolang.

²⁵ Attar kokodo konam adindcm atv tayumnam agomcm mcngkup mc:lappc mc:ma:pc dotok.

²⁶ Kapila:nc “Mo:pvsc Ru:tumkc, odokkc odok du:nc appvng attarkvdv:dc.”

²⁷ Mc:jvgma:ncdok akonc nolum apin donam-tv:namko dodopc gogsuyc odokkc no gvlv:dag, okodcmci nok kcra:do tolvgbidagji atv tawunam agom kosin luma:pc mcngc mcnga:la mc:ma:pc dotok.

²⁸ Cmpige:la nom sc:kaiyc jodi luyc, “Scm palvgkolo bitungai,” odo tani:dok lcga:pc mc:bila sc:kobv nom lubitoji, odokkc mcngkub-tablapnam lcgangc–

²⁹ ngo ludung bvk mcngkubtablapdcm, nokkcdc:mang cdcm doyoka. Kapila:nc kapila ngok mcngkampc ilang gvla: namdcm akon tani:lok mc:namkokki mc:moyen?

³⁰ Ngo doinoba:dki domvnmvlo kapila ngo odokki lupaksukosuycn ngo okodok lcgangc doinoba:d bidoji?

³¹ Cdcmpidag, nolu dodaggomba tv:daggom, cdcmanggom okodcmci no idonc, Ru:ncpvnckc amin gvnam lcgangonc itoka.

³² Jiwukvdv:dcmba Girikkvdv:dcm oko aima:p mcnamcmsin mcngkosuyok cdcmanggom Ru:ncpvnckc mondoli:dcm,

³³ ngo kapc appvng agercm gerdon appvng tani:ycm mc:lvgsudopc ikvla ka:do, ngok avkc ainamcm masuma:pc, cmpige:la bojcrungc aidopc, bulujen turdopc.