1 KORINTIANG KVDVNG 1 - ANU LUGOD N. T. (BSI)

¹ Poulkolokkc, Ru:ncpvnckc mc:namkokki Kristo Jisukc mclvgla ager germonam tani:pc gognamdc, odokkc ngoluk Sostini:bv.

² Korinto:do Ru:ncpvnckc oko mondoli:do du:nc odopc, Kristo Jisukolo sc:kobulum narcngmotonc odobulu:pc, lckko:pc angunnctani:pc gognamkvdv:do:pc appvng mo:taklo ngoluk Ru:tum Jisu Kristokc amincm gognckvdv:dokki lckko:pc, bulukkclang ngoluk Ru:tum Jisu Kristo anyipakpc:

³ Nolukkolo:pc ayangc odokkc Ru:ncpvnc ngoluk Abukotokkc mcnganc odokkc Ru:tum Jisu Kristokolokkc.

Kristokolo Akirba:dkvdvng

⁴ Ngo lo:dvscm noluk lcga:pc Ru:ncpvncmc aipaiycm bido Ru:ncpvnckc aya:dok lcga:dokki okodcm Kristo Jisukolo nolum bitungaji.

⁵ Jc appv:pc nolum Bvkkolo mircmmotagai appvng agomlo odokkc appvng kinnam pa:namlo–

⁶ Kristomc lukanbinamdc:sinci nolukkolo aropakpc arokang–

⁷ ja:te cdcmpinamc nolu yalodok amanno okodo:sinci pv:rammang, nolu ngoluk Ru:tum Jisu Kristokc kapc toya:la du:ji du:tvla;

⁸ sc:kobv du:tcrdungapdo:pc ngoluk Ru:tum Jisu Kristokc longcdo.

⁹ Ru:ncpvncbv mc:jvg jvrvgnc, sc:kokokki nolum lckko:pc Bvk Awodokki ajon jondopc gogtoji, Jisu Kristomc ngoluk Ru:tummc aipai bidung.

Mondoli:do Angu Angunam

¹⁰ Ngo nolum kumna ludung, bvrokvdvnga, ngoluk Ru:tum Jisu Kristokc aminkokki, jc noluk ara:lo luker luyermvnsunammc kapcma:namc, cmpige:la jc nolu asin akko:do lckotoka odokkc c:mo:pinc kcbangcm ba:toka.

¹¹ Kapila:nc cdcm ngom Kloedok tani:kvdv:dokki lubitag jc noluk ara:lo pamvnsunamc dung, ngok bvrokvdvnga.

¹² Ngo okodcm lupc mc:du:nc jc nolukkolok appvngc ludo, “ngo Poulkcpc ido,” cdcmanggom “ngo Appollokc,” cdcmanggom “ngo Kepakc,” cdcmanggom “ngo Kristokcpc.” Kristomc angu angumotonci?

¹³ Poulmc noluk lcgangc kuruslo pvtketonci? Cdcmanggom Poulkc aminno nolum baptismo bikanci?

¹⁴ Ngo aipai bidung jc ngo nolukkolok sc:komsin baptismongcm bitomang Krispu:mclang Gaiu:bvnyik anyidcm mcge:la;

¹⁵ ckvma:mvlo akonmumc luiya:pc jc nolu ngok aminno baptismongcm bito.

¹⁶ (Stipenakc okum cra:dcmsin ngo batismongcm bika. Odokkc bibarra ngo kinmang ngo akoncm baptismongcm bikasong bima:song.)

¹⁷ Kapila:nc Kristobv ngom baptismo bidopc mclvgmangai cmpige:la tadponc lutaddcm lukapcmvn, odokkc tadpopc agom lujo:namkokkimang, ckvma:mvlo Kristokc kurusdc odok ilang gvla:namdc kama:pc ipakycpc.

Kristobv Ru:ncpvnckc Ilang-Gvlangcla:dc

¹⁸ Kapila:nc Kurusdok agomdc monba: ba:nclok agomc sc:kobulu sidagaji, cmpige:la cdc sc:kobulum moturtagnc cdc Ru:ncpnckc ilanggvlangc.

¹⁹ Kapila:nc cdcm adla lc:tag: “Ngo kinnc-pa:nckvdv:dok kinnamcm momvgyc, odokkc buddi:kanc kvdv:dok buddi:ycm ngo cmmumpc imoyc.”

²⁰ Kinncpa:nc tani:dc okolon? Agom poyirncdc okolon? Sc ayirkvdv:sok agom svgka:mvnsula luka:mvnsunc kvdv:dc okola:n? Ru:ncpvncbv mo:pvsok kinnampa:namkvdv:dcm Ru:ncpncbv monba: ba:ncpc imoma:lang.

²¹ Kapila:nc, Ru:ncpnckc kinnam-pa:namdo, rcngamsc kinnampa:nam kokki Ru:ncpvncmc kinma:pc inamc, cd Ru:ncpvncmc mcngkin-mc:parang ma:namdokki mc:lvgsumoto okodcm ngolu lutadbidonc sc:kobulu moturpc mc:jvgdonc.

²² Kapila:nc Jiwu kvdv:dc kanggodcm madag odokkc Girikkvdv:dc kinnampa:namcm,

²³ cmpige:la ngolu kuruslo pvtkenam Kristomc lutadbigo:do. Jiwu kvdv:dokkcpc lcsutsunam sv:tungc odokkc Angu tani: kvdv:dokkcpc monba:ba:nc,

²⁴ ckvdaggom sc:kobulum gogtagnc, Jiwuclang Girik anyipagcm, Kristobv Ru:ncpvnckc ilang gvlangc odokkc Ru:ncpvnckc kinnampa:namc.

²⁵ Kapila:nc Ru:ncpvnckc monba:ba:namdc tani:ycmyam kinya:pa:dag.

²⁶ Kapila:nc nolum gognamkvdv:dcm mcngkvsula ka:toka, bvrokvdvnga; nolukkolok bojcrungc rcngam dungkam yckampc kinncpa:ncmangai, bojcrungc kvnggv:pc ilang-gvla:ncmangai, bojcrungc ainc cra:lok onammangai;

²⁷ ckvdaggom Ru:ncpvncbv okodc monba:ba:ncji cdcm ballenna la:to kinncpa:nc kvdv:dcm anyi:sumopc cmna, Ru:ncpvncbv okodo ilang gvla:modagji rcngamso balenna la:to ilang gvla:nckvdv:dcm anyi:sumopc cmna,

²⁸ Ru:ncpvncbv okodcm adji:pc ka:dagji odokkc yoppaktagji cdcm rcngamsokkcm torvgsuto, cdcm mcge:la atvma:nc attar kvdv:dcmsinci,

²⁹ attar kvdv:dcm okopcsin ima:dopc imopc cmna, odomvlojen oko tani:ycsin Ru:ncpvnckc kcra:lo bottapc lubonsuma:ycpc cmna.

³⁰ Bv:na noluk Kristo Jisukolo turnamkvdv:dok lenkodc:nc, sc:kom Ru:ncpvncbv ngoluk kinnampa:nampc itoji, ngoluk dormo kanamcm odokkc mopu:la narc:pc:sc:monamcm odokkc rcpvtnammcm;

³¹ Cdcmpidag, cdcm adla lunamdcmpc, “Bvm bottapc mansumotoka, Ru:tumkolo bottapc mansunamdcm.”