1 JO:N 4 - ANU LUGOD N. T. (BSI)

Aro Yalodc:lang Lume:lunc Yalodc

¹ Aipc mc:bomsunam kvdvnga, appvng yallom mc:jvgyok, cmpige:la yalokvdv:dcm anka:la ka:langka Ru:ncpvnckcji: bvkkcma:ji; kapcnc bojcrung lume:pc lungor-lunnc mo:pvsc gvlenamka:bong.

² Odokki nolu Ru:ncpvnckc yalodcm kinycpc: appvng yallo okodc lude:sudagji jc Jisu Kristobv adinamvrpc gvika cmna cdc Ru:ncpnckc,

³ odokkc appvng yallo okodc Jisumc lude:sumaji Ru:ncpvnckcmang. Cdcna Kristomc Kristobirudi:ncdok yalodo, okodok agomcm nolu tattojc cdc gvdungaboi, odokkc su:pak cdc rcngamso gvgongciamdu:bong.

⁴ Ameo:nc ommangkvdvnga, nolu Ru:ncpvnckc, odokkc cdcmbulum mopvtobong; kapcnc nolukkolo sc:kobv du:nc rcngamso sc:kobv du:ji cdcm bottcya:dag.

⁵ Bulu Rcngamsokkc, cdcmpidag okodcm bulu ludagji cdc rcngamsokkc, odokkc Rcngamsc bulum taddag.

⁶ Ngolu Ru:ncpvnckc. Sc:kobvi Ru:ncpvncmc kindagji ngoluk agomcm taddag, odokkc sc:kobv Ru:ncpvnckcma:ji ngoluk agomcm tadmang. Odokki ngolu arodok yalodcmlang imur incdok yalodcm kindag.

Ru:ncpvnckc Aipc mc:namc

⁷ Aipc mc:bomsunam kvdvnga, kajc akoncm akonc aipc mc:mvnsulai; kapcnc aipc mc:namdc Ru:ncpvnckc, odokkc sc:kobv aipc mc:dagji Ru:ncpvnckolokkc lennc odokkc Ru:ncpvncmc kindag.

⁸ Sc:kobv aipc mc:ma:ji Ru:ncpvncmc kinnang; Kapcnc Ru:ncpvncbv aipc mc:namc.

⁹ Odokki Ru:ncpvnckc aipc mc:namdcm ngolukkolo lenmoto, jc Ru:ncpvncbv Bvk avkc Awo atcrdcm rcngamso mclvgtungai, odomvlo jen ngolu Bvkkokki turra du:ycpc.

¹⁰ Odo aipc mc:namdo ngolujc Ru:ncpvncmc aipc mc:to cmmang cmpige:la jc Bv ngolum aipc mc:to odokkc Bvk Awodcm ngoluk pa:p lcngangc palvgnapc inapc cmna.

¹¹ Mc:bomsunam kvdvnga, jodi Ru:ncpvncbv ngolum aipc mc:to, ngolusin akoncm akonc aipc mc:mvnsupa:do.

¹² Oko tani:ycsin cdvlosin Ru:ncpvncmc kangkvmang; jodi ngolu akoncm akonc aipc mc:mvlo. Ru:ncpvncbv ngolukkolo du:mvndag odokkc Bvk aipc mc:namdc ngolukkolo du:pvtdag.

¹³ Odokki ngolu kindag jc ngolu Bvkkolo du:mvndag odokkc Bv ngolukkolo, lcga:dc Bv ngolum Bvk avkc Yalodcm bitobong.

¹⁴ Odokkc ngolu ka:tobong jc lukancm lubitu:bong jc Abudc Rcngamsok Mopvtncpc idopc Bvk Awodcm mclvgto.

¹⁵ Sc:kobvi lude:suyc Jisubv Ru:ncpvnckc Aowo, Ru:ncpvncbv Bvkkolo du:mvndo, odokkc Bv Ru:ncpvnckolo.

¹⁶ Cdcmpidag ngolu kindag odokkc mc:jvgtoka Ru:ncpvnckc ngoluk lcgangc aipc mc:namc dung. Ru:ncpvncbv aipc mc:namc, odokkc sc:kobv aipc mc:namlo du:mvndoji Ru:ncpvnckolo du:do, odokkc Ru:ncpvncbv Bvkkolo du:do.

¹⁷ Odo ngolukkolo aipc mc:pcnamdc du:pvtdag, jc ngolu kcba:ba:nam longcdo:pc mc:tinsula du:ycpc, kapila:nc Bv kapc idagji cdcmv:pc ngolu mo:pvso idag.

¹⁸ Aipc mc:namlo pcsonammc kamang, cmpige:la pv:namko aipc mc:namc pcsonammcm la:pakdag. Kapcnc pcsodc palvg lvgnamdokki ipcnammc, odokkc sc:kobv pcsodagji aipc mc:namlo du:pvtmang.

¹⁹ Ngolu aipc mc:dag, kapila:nc Bv ngolum aipc mc:po:to.

²⁰ Jodi akoncmum ludo, “Ngo Ru:ncpvncmc aipc mc:dag,” odokkc bvk avkc bvrodcm tayumdo, bv lume: luncko; kapcnc sc:kobv bvk avkc bvrodcm aipc mc:ma:ji sc:kombv ka:begdagji, Ru:ncpvncmc aipc mc:la:mang sc:kom bv ka:begma:ji.

²¹ Odokkc sc lulvgnamsc ngolukkc Bvkkolo dung, jc sc:kobv Ru:ncpvncmc aipc mc:dagji bvk bvrodcm aipc mc:pa:do.