1 JO:N 2 - ANU LUGOD N. T. (BSI)

Kristobv Ngoluk Idumgvdumsunnc

¹ Ngokkc adji:onc ame:yo:nc ommang kvdvnga, ngo scm nolukkolo:pc addung odomvlojen nolu pa:bcm ima:ycpc; cmpige:la jodi sc:kaiyc pa:bcm iyc, ngolukkc Abudcm lubiya:ncko dung, Jisu Kristobv dormokancdc;

² odokkc Bv:na ngoluk pa:pkvdv:dok lcga:pc mopu:bincdc, odokkc ngolugongkcmang cmpige:la mo:pvsok pa:p appv:dok lcgangc.

³ Odokkc sokkokki ngolu arorung mc:sula:ycpc jc ngolu Bvm kindag, jodi ngolu Bvk lulvgkvdv:dcm gagla du:yc.

⁴ Bv sc:kobv ludagnc “Ngo Bvm kindag” cmpige:la Bvk lulvgkvdv:dcm lukamdcmpc tadma:yc lume:luncko, odokkc arro bvkkolo kamang;

⁵ Cmpige:la sc:kobvi Bvk agomcm gagla du:ycji, bvkkolo aroru:pc Ru:ncpvnckc lcgangc aipc mc:namdcm pv:danmodag. Sokki ngolu jen aroru:pc kinyc jc ngolu Bvkkolo dung:

⁶ Sc:kobv ludonc ngo Bvk dungkolo du:mvndo Bvk gvko lambcdok bv:sin gvmvnpcnamc.

Anu Lugod Lunamdc

⁷ Aipc mc:bomsunamkvdvnga, ngo nolum anu lulvg agomko lumang, cmpige:la aku lulvg agomko okodcm nolu gagla dunganc lekelokkcbbong; leke lulvg lunamdc cdc okodcm nolu tattoji.

⁸ Ckvdaggom ngo nolum anu lulvg lunamko addung, okodc Bvkkolo odokkc nolukkolo arro, lcga:dc kcmodc gvpakbomdu:bong odokkc aro pv:adc dorbomcidu:bong.

⁹ Sc:kobv bv pva:lo dung cmna ludagnc odokkc bvrodcm tayumdagnc kcmmu:do dung.

¹⁰ Sc:kobv bvk bvrodcm aipc mc:dagnc pva:lo du:dag, odokkc odo oko mc:murmc:yarsunamkosin kamang.

¹¹ Cmpige:la sc:kobv bvk bvrodcm tayumdonc kcmolo dung odokkc kcmolo gvgo:dag, odokkc bv okolopc gvgo:dagji bv kinmang, lcga:dc kcmodc bvk amigcm miglumoto.

¹² Ngo nolum addung, ame:onc ommang kvdvnga, lcga:dc noluk pa:pkvdv:dcm Bvk lcgangc mc:yinsutobong.

¹³ Ngo nolukkolo:pc addung, abukvdvnga, lcga:dc nolu Bvm kindag sc:kobv lendoa:do dokkcbong du:ji. Ngo nolukkolo:pc addung, ya:me:kvdvnga, lcga:dc nolu aima:ncdcm mopvto. Ngo nolukkolo:pc addung, ko:kangkvdvnga, lcga:dc nolu Abudcm kindag.

¹⁴ Ngo nolukkolo:pc addung abukvdvnga, lcga:dc nolu kindag sc:kobv dunga: dokkcbong du:ji. Ngo nolukkolo:pc addung, ya:me:kvdvnga, lcga:dc nolu kvnggv:dag, odokkc Ru:ncpvnckc gomugdc nolukkolo du:mvndag, odokkc nolu aima:ncdcm mopvto.

¹⁵ Rcngamscm mc:boyok cdcmanggom rcngamsok attarkvdv:dcm. Sc:koiyc jodi rcngamscm aipc mc:yc, Abudcm aipc mc:namdc bvkkolo kamang.

¹⁶ Kapcnc rcngamsok du:nc attarappv:dc, adin amvrdok ka:bomc:bonamdc odokkc turnamsok bottapc mc:sunamdc, cdc Abudokkcmang cmpige:la mo:pvsokkc.

¹⁷ Odokkc mo:pvsc yogpakycpc, odokkc mc:boka:bonam kvdv:dc; cmpige:la sc:kobv mcngkampc agercm gerdonc lo:dvscm du:mvndo.

Kristokc Mirudc

¹⁸ Ommangkvdvnga, sc du:tcrnam ayirdc; odokkc nolu kapc tattonc jc Kristo birudi: gvdobong, cdcmpila su:pak bojcrungko Kristo birudi:yc lenka:bong; cdcmpige:la ngolu kindag jc sidc du:tcr ayircbong.

¹⁹ Bulu ngolukkolokkc gvlenpakkang, cmpige:la bulu ngolukkcmangai; kapcnc bulu ngolukka:mvlo, bulu ngoluk lcdulo du:mvntvya:pc; cmpige:la bulu gvlenkang, jc cdc kinpoycpc cmna jc bulu ngolukkcmang.

²⁰ Cmpige:la nolu Angunnc Akodokki yontobong, odokkc nolu appvngc kindag.

²¹ Ngo nolukkolo:pc addung, nolu arodcm kinmang cmna:mang, cmpige:la lcga:dc nolu cdcm kinga:lok, odokkc kinnangka jc oko lume:namcsin arodokkcmang.

²² Sc:kobv:n lume:luncdc sc:kobv Jisubv Kristobv:mang cmna lupakma:ncdc:ma:mvlo? Cdcna Kristobirudi:dc, sc:kobv Abudcmnang Awodcm lupakdagji.

²³ Sc:koi Awodcm lupakdagji Abudc bvkkolo kamang. Sc:kobv Awodcm arro cmna ludonc Abudc:sin dung.

²⁴ Okodcm nolu lendodokkcbong tadtoji du:mvmka:langka. Jodi nolu okodcm dunga:dodokkc tadtonc nolukkolo du:mvntvyc, odo nolu Awodo odokkc Abudo du:mvntvyc.

²⁵ Odokkc cdcna okodcm Bv ngolum pesubitonc, lo:dvnscm du:tvnc turnamdc.

²⁶ Ngo scm nolukkolo:pc addung cdc sc:kobulu nolum yadycnc buluk agomcm;

²⁷ cmpige:la nolu Bvkkolok oko yonnvgnamdcm pa:tonc nolukkolo du:tvmvnyc, odokkc nolukkc manam kama:yc jc nolum sc:kosin poyir pcnam kama:yc; kapc Bvk yonnvgnamdc nolum appvng agomcm poyirdagnc, odokkc cdc arro, odokkc poyirtonc, Bvkkolo du:mvntoka.

²⁸ Odokkc su:pak, ameo:nc ommangkvdvnga, Bvk dungkolo du:mvntoka, odomvlo jen cdvlo Bv lcngkansuycnc ngolukkc ncrkvgpc mcnga:nammc du:ycpc odokkc Bvkkolokkc ngetsuk suma:ycpc Bvk gvdokudo anyv:sula.

²⁹ Jodi nolu kindo jc Bv dormokannc, nolu aroru:pc mc:sula:yc jc ainc agercm sc:kobvi gerdonc Bvkkolok onamc.