2 Yoane 1 - Wapongte Mic-Yowa Gbolicne

Kwele-madic yowa

¹ Na Yesule habu damongngineng. Nenggac bawosaecguicne, ga nga adu-madecfocgone ngengela hibi yago kwelengkengelegabac. Na yowa noinele ailu ago aingelelu kwelenedi angac ngagengelelu gagabac. Ailu na sugu miyac, ngic-ngigac sasawa yowa noine ngagegaing, yenge inguchac ngenge ago aingelelu kwelenginengti angac ngagengelelu gagaing.

² Aime yowa noinedi nongileng kwelewa fagacte inguc aigabeleng. Ailu damengsoc nongilengkolec faginowagac.

³ Nongileng yowa noine nga kwele-angacka gaga gagabeleng, nongilang Wapong Mamac, nga Madecbenangngine Yesu Kristo, yekele kwele-madic nga kwele-sowac ailu kwele-mogungtowa yogodi fanoledaicte.

Ung-yowa

⁴ Adu-madecfocgone gocne yenge yowa noine Mamacti mime ngageibeng, ung-yowa yogo balaibelu gagaing, na yowa yogo ngagelu beliyegabac.

⁵ Aime nenggac, na ung-yowa yanguc milockengelebe balaibedaing, Nongileng ago ainagulu kwelenonggengti angac ngagenagulu gadabeleng, yogo ung-yowa gbolicne mi kwelengkengelegabac, miyac. Yogo hocne molickelu balaibelu gaibeng.

⁶ Aime Wapongte ung-yowafocine balaibelu gagabiyeng, yogodi kwele-angacte fungine. Aime ngenge kwele-angacte ung-yowa yogo molickelu ngageibong, yogo balaibelu gadaing.

⁷ Aime kwele basifuc ngic bocyacti himongtowa yagowa lolickelu gacaigaing. Yenge Yesu Kristo ye ngic soc-biuckolec fikelu gagac, yogo mi ngagesingkelu ye bisockelu gagaing. Ngic ingucne yenge Kristole ngababenang ailu kwele basifuc ngic.

⁸ Ngenge yogolec bulongineng madicne balu damongnagulu gadaing. Wiyac banogale boletowa baibeng, yogo hegiledaingkale, damong balu fulingineng bucbuchac badabiyeng.

⁹ Ngic gocne yenge galu Kristole wewedu-yowa hegilelu yowa gocne taockelu gagaing, yenge Wapong mikac gagaing. Aime monic ye wewedu-yowaine sanangne balu game, Mamac nga Madec yeke momochac yeholec gagabiyec.

¹⁰ Nga monic ye wewedu-yowaine silicine ingucnehac mi balu kwesidaictewa, ngenge yeholec molewa babac mi aidaing. Ailu ngenge ye macnginang mi mengockelu fedaing.

¹¹ Monic ye ngic ingucne yeholec molewa babac aidaictewa, ye ngic yogo bafickeme, yele bole sowacne, yogo badabiyecte.

Yowa moto-motoine

¹² Nani yowa bocyac kwelengkengelenogale ainelegac. Aimebac yogo hibiwa kwelengkenogale mi ainelegac. Yogolec ailu belic-belicnonggeng sugucnehac fikenale naneuc ngengela fube haicti nganinagulu yowa mingagec ainangte ngagesigabac.

¹³ Senggone bawosaeicne, yele adu-madecfocine yenge wenac-madicngineng ngengela lobong fugac.