YOHANES 5 - KABAR MAEH MA HANYU JANJI WAU

Nyamare ulun hang Danau Betesda

¹ Udi yiru naan parayaan ulun Yahudi, balalu Yesus tulak ma Yerusalem.

² Hang Yerusalem rite “Wanawang Babiri” naan isa danau, hang basa Ibrani naantuh Betesda. Hang yiru naan dime betang.

³ Hang kawan betang yiru naan rama kawan ulun sakit mangkading; naan ulun pehe, naan ulun kepa naan pada ulun lumpuh. [Katuluh here nganrei ranu hang danau bagalumbang.

⁴ Daya naan wayahni amun malekat Tuhan minau mawuang danau yiru balalu ranuni bagalumbang. Nelang ulun sakit sa palanungkai mitun mawuang danau yiru tawuk ranuni bagalumbang sagar ware teka panyakit sa naaretni.]

⁵ Hang yiru naan erang kaulun upu sa sakit haut telumpulu walu taun lawahni.

⁶ Yesus kadinung hanye mangkading hang yiru, nelang karasa hanye haut lawah tuu sakit; balalu Yesus nunti ma hanye, “Hamen hanyu ware?”

⁷ Ulun sakit yiru nuing, “Tuan, hang yiti puang uweng ulun sa ngampitun aku mawuang danau tawuk ranu bagalumbang. Padingian aku nuju ma danau, ulun lain haut mitun nahuluan aku.”

⁸ Eau Yesus ma hanye, “Inri, enat patahnu hulu takia.”

⁹ Tawuk yiru pada ulun yiru balalu ware. Hanye ngenat patahni palus takia. Kajadian yiru hang anrau Sabat.

¹⁰ Daya yiru kawan panguasa Yahudi kaeau ma ulun sa haut ware yiru, “Anrau yiti anrau Sabat. Hanyu puang iyuh ngenat patahnu.”

¹¹ Kude ulun yiru nuing, “Ulun sa nyamare aku yiru huni sa nunyu aku ngenat patah palus takia.”

¹² “Hie hanye sa nunyu hanyu ngenat patahnu palus takia?” tunti here.

¹³ Kude ulun sa haut ware yiru puang karasa hie ulunni, daya Yesus balalu isamawai hang helang ulun rama yiru.

¹⁴ Udiyiru Yesus panalu ulun yiru hawuang Lewu Tuhan balalu kaeau ma hanye, “Itati hanyu haut ware, ada badosa lagi nampan puang wuah hal sa labis maweat lagi.”

¹⁵ Ulun yiru tulak balalu iwara ma kawan panguasa Yahudi himat Yesus sa haut nyamare hanye.

¹⁶ Daya gana yiru here balalu nuku ngampi hadin Yesus daya hanye nyamare ulun hang anrau Sabat.

¹⁷ Kude Yesus kaeau ma here, “Ambahku tarus bagawi hampe itati nelang aku kala yiru pada.”

¹⁸ Lengan Yesus yiru ngulah kawan panguasa Yahudi magin bahimat ngakali ngunu munu hanye. Here ngulah kalayiru, puang daya ekat hanye malangar hadat agama neu anrau Sabat, kude pada daya hanye kaeau Alatalla yiru Ambahni; baarati hanye nyansameh tengani anri Alatalla.

Kakuasaan Anak

¹⁹ Yesus nuing ma kawan ulun yiru, “Parisayaleh, Anak puang kaiyuh ngulah inun-inun makai kuasani raerai. Hanye ekat ngulah inun sa dinungni naulah daya Ambahni. Daya inun sa naulah daya Ambah, yiru pada sa naulah daya Anak.

²⁰ Daya Ambah sinta Anak nelang nutui ma hanye inun sa haut naulahni raerai. Likan Ambah sagar nutui ma hanye kawan pagawian sa labis hante lagi hampe naun wauh.

²¹ Ambah yiru nyamelum ulun matei nelang ngami ma here pamelum sajati palus kalalawah, kala yiru pada Anak ngami pamelum sajati palus ma kalalawah ma ulun sa hamen naamini pamelum.

²² Ambah raerai puang mahakimi hie-hie. Daya katuluh kuasa pakai manghakimi haut sarahni ma Anakni.

²³ Ambah ngulah yiru nampan katuluh ulun hormat ma Anak kala here hormat ma Ambah. Ulun sa puang mahormat Anak puang pada mahormat Ambah sa ngutus hanye.

²⁴ Kapinuuni lenganku yena: Kawan ulun sa mantaru eauku yiti nelang parisaya ma hanye sa ngutus aku, hanye puang nahukum, kude hang hanye naan pamelum sajati palus makalalawah. Hanye puang sagar nahukum; hanye haut lapas teka pampatei palus kaiyuh pamelum.

²⁵ Parisayaleh: Wayahni sagar hawi – likan wayahni haut hampe. Ulun matei sagar karengei lengan Anak Alatalla, balalu ulun sa karengei lengan yiru sagar welum.

²⁶ Kala Alatalla raerai putut pamelum, hanye nukas Anakni pada putut pamelum.

²⁷ Hanye haut ngami kuasa ma Anakni, daya hanye Anak Murunsia.

²⁸ Ada naun wauh karengei hal yiti, daya sagar naan wayahni die katuluh ulun sa haut matei karengei lenganni,

²⁹ balalu kaluar teka pasaran. Ulun sa ngulah pikaeh sagar ambuan welum kamulek. Kude ulun sa ngulah kajahaten sagar naambuan nampan nahukum.”

Kawan bukti neu Yesus

³⁰ “Aku puang tau ngulah inun-inun makai kabahumenku raerai. Aku ekat mangadili manyu kala sa haut naparentah Alatalla ma aku. Nelang kaputusanku adil daya aku puang ngalut kabahumenku raerai, malengkan kabahumen Ambah sa ngutus aku.

³¹ Atikala aku ngami kasaksian neu tengaku raerai, kasaksian yiru puang iyuh naparisaya.

³² Kude naan ulun lain sa ngami kasaksian neu aku nelang aku karasa himat kasaksianni yiru bujur.

³³ Naun haut ngirim utusan ma hi Yohanes, nelang hanye haut ngami kasaksian sa bujur neu aku.

³⁴ Aku ngeau yiti, puang daya aku parlu kasaksian teka murunsia, kude nampan naun nasalamat.

³⁵ Hi Yohanes yiru kala palita sa maraai nelang sahayani matalak. Kude ekat erang pitus naun sanang narime sahaya yiru.

³⁶ Kude kasaksianku labis hante teka kasaksian Yohanes. Inun sa naulahku itati hanyeyiru gawian sa natugas Ambah ma aku nampan jari bukti samula Ambah yiru haut ngutus aku.

³⁷ Nelang Ambah sa ngutus aku ngami kasaksian neu aku. Naun puang suah karengei lenganni atawa kadinung wangunni.

³⁸ Kawan lenganni puang muneng hawuang atei naun daya naun puang parisaya ma aku sa nautusni.

³⁹ Naun paajar Surat Barasis daya minda anri sara yiru naun tau kaiyuh pamelum sajati palus makalalawah. Nelang Surat Barasis yiru raerai iwara kasaksian neu aku.

⁴⁰ Kude naun puang hakun hawi nunung aku nampan kaiyuh pamelum sajati palus makalalawah.

⁴¹ Aku puang ngantara natawat daya murunsia.

⁴² Aku kataru naun. Aku karasa naun puang sinta Alatalla hang wuang atei naun.

⁴³ Aku hawi makai kuasa Ambahku, kude naun puang narime aku. Kude amun ulun lain hawi makai kuasani raerai naun narime hanye.

⁴⁴ Kewangun naun tau parisaya amun naun ngantara natawat daya sasameh naun, nelang puang ngakali ngantara natawat daya Alatalla sa tungkan?

⁴⁵ Ada minda aku ngahalaen naun hang hadapan Alatalla, sa sagar ngahalaen naun hanyeyiru hi Moses, hanye sa naharap naun.

⁴⁶ Atikalani naun parisaya ma hi Moses, naun sagar parisaya maaku, daya inun sa nasurat Moses hanyeyiru neu aku.

⁴⁷ Kude amun naun puang parisaya ma inun sa nasurat Moses, kewangun naun tau parisaya ma inun sa naeauku?”