YOHANES 20 - KABAR MAEH MA HANYU JANJI WAU

Pasaran sa lawang

¹ Hang anrau kaiyat Minggu, tawuk lagi maieng, hi Maria Magdalena tulak ma pasaran. Hanye kadinung watu panutup pasaran haut paidar teka wawa pasaran yiru.

² Hanye balalu nempat ngantara hi Simon Petrus anri ulun sa umba sa nasinta Yesus, balalu kaeau mahere, “Tuhan haut naalap teka pasaran nelang aku puang karasa hang awe hanye naelah.”

³ Balalu hi Petrus anri ulun sa umba lain yiru tulak ma pasaran.

⁴ Here rueh nempat, kude ulun sa umba isa yiru labis wansit teka hi Petrus, balalu hanye hampe labis dahulu hang pasaran.

⁵ Hanye ninung mawuang pasaran balalu kadinung naan kain kafan hang yiru, kude hanye puang masuk.

⁶ Hi Simon Petrus naharak teka wading, balalu palus masuk mawuang pasaran yiru. Hanye kadinung kain kafan naan naelah hang yiru,

⁷ kude kain sa nahuruk hang ulu Yesus puang uweng hang riet hanye, malengkan balepet raerai.

⁸ Kamulek ulun sa umba sa labis dahulu hampe ma pasaran yiru, masuk pada. Hanye kadinung balalu parisaya. (

⁹ Hampe tawuk yiru here huan kataru inun sa nasurat hang wuang Surat Barasis neu hanye harus kaelan mulek teka pampatei.)

¹⁰ Udi yiru kawan ulun sa umba Yesus tulak mudi.

Yesus nantarang tenga ma hi Maria Magdalena

¹¹ Hi Maria Magdalena minri hang hadapan pasaran nelang nungkau. Tawuk nungkau, hanye ninung mawuang pasaran,

¹² balalu hanye kadinung rueh kaulun malekat bapakaian mahilak. Here yiru maharung hang bakas unengan bangkai Yesus, isa hang tiba ulu, isa hang tiba pee.

¹³ Kawan malekat yiru nunti, “U ulun wawei, wuah inun hanyu nungkau?” Hi Maria nuing, “Tuhanku haut naalap nelang aku puang karasa hang awe hanye naelah.”

¹⁴ Udi kaeau kala yiru hanye ikulik ma wading wuku balalu kadinung Yesus minri hang yiru. Kude hanye puang kataru yiru Yesus.

¹⁵ Yesus nunti ma hanye, “U ulun wawei, wuah inun hanyu nungkau? Hanyu ngantara hie?” Hi Maria minda hanyeyiru tukang kabun, balalu hanye kaeau, “Tuan, amun hanyu sa ngidar hanye teka yiti, awat wara ma aku hang awe hanyu ngelah hanye, nampan aku tau ngalap hanye.”

¹⁶ Yesus kaeau ma hanye, “Maria!” Hi Maria ikulik ma Yesus, balalu kaeau hawuang basa Ibrani, “Rabuni!” (Aratini “Guru”.)

¹⁷ “Ada negei aku,” eau Yesus ma hanye, “daya aku huan mambai nunung Ambah. Kude hulu tulak nunung kawan pulaksanaiku, balalu wara ma here itati aku mambai nunung Ambahku nelang pada Ambah naun, Alatallaku nelang pada Alatalla naun.”

¹⁸ Hi Maria balalu tulak lepuh iwara ma kawan ulun sa umba Yesus sa hanye haut kadinung Tuhan nelang Tuhan haut iwara katantuluh yiru ma hanye.

Yesus nantarang tengani ma kawan ulun sa umba hanye

¹⁹ Hang anrau Minggu yiru pada, tawuk anrau haut kamalem, kawan ulun sa umba Yesus bakumpul hang isa lewu kawan wanawangni nakunsi rapat, daya here takut ma kawan panguasa Yahudi. Salenga Yesus hawi palus minri hang penah here balalu kaeau, “Sanang salamat ma naun.”

²⁰ Udi kaeau kala yiru, hanye nantarang ma here tengani anri higani. Tawuk kadinung Tuhan, here tuu arai.

²¹ Balalu Yesus kaeau ma here hinra lagi, “Sanang salamat ma naun. Kala Ambah ngutus aku, kalayiru pada aku ngutus naun.”

²² Balalu hanye nyiwui hewukni ma here palus kaeau, “Tarime Roh Alatalla.

²³ Amun naun ngampun dosa hie-hie ulun, Alatalla pada ngampun hanye. Amun naun puang ngampun dosa hie-hie ulun, Alatalla pada puang ngampun hanye.”

Yesus anri hi Tomas

²⁴ Hi Tomas (sa naantuh hi “aruangan”), erang kaulun teka dua walas ulun sa umba Yesus puang uweng baya here lain tawuk Yesus hawi.

²⁵ Daya yiru tawuk kawan ulun sa umba Yesus kaeau ma hi Tomas, “Kami haut kadinung Tuhan!” Hi Tomas nuing, “Amun aku huan kadinung bakas paku hang palat tanganni, huan ngelah kingkingku ma bakas batan daya paku yiru nelang huan ngelah tanganku ma higani, budas aku huan parisaya.”

²⁶ Erang minggu udi yiru, kawan ulun sa umba Yesus bakumpul lagi hang lewu yiru, nelang hi Tomas pada naan. Katuluh wanawang nakunsi kude Yesus hawi palus minri hang penah here, balalu kaeau, “Sanang salamat ma naun.”

²⁷ Udi yiru Yesus kaeau ma hi Tomas, “Dinung tanganku nelang ajuk kingkingnu hang yiti. Surung tangannu nelang andak hang higaku. Ada hanyu bembang lagi, kude parisayaleh!”

²⁸ Hi Tomas kaeau ma Yesus, “Tuhanku nelang Alatallaku!”

²⁹ Yesus kaeau ma hanye, “Hanyu parisaya daya haut kadinung aku, angneh? Salamat ulun sa parisaya biar hanye puang kadinung aku!”

Tujuan buku yiti

³⁰ Magun wahai lagi kawan kaajaiban lain sa naulah Yesus hang hadapan kawan ulun sa umba hanye, kude puang nasurat hawuang buku yiti.

³¹ Kude katuluhni yiti nasurat, nampan naun parisaya himat Yesus Raja Panyalamat, Anak Alatalla nelang daya parisaya ma hanye, naun kaiyuh pamelum.