YOHANES 10 - KABAR MAEH MA HANYU JANJI WAU

Rarapisan neu babiri anri pakatikni

¹ “Himat tuu eauku yiti: Ulun sa masuk mawuang kandang babiri nangkah pagar, nelang puang mitah wanawang, kude mambai mitah lalan lain, ulun yiru pangalat nelang parampok.

² Kude ulun sa masuk teka wanawang, hanyeyiru pakatik babiri.

³ Panyaga kandang nguka wanawang ma hanye balalu kawan babiri ngapung lenganni tawuk hanye nerau here anri ngantuh ngaran here isa mangisa nelang ngendei here ma luar.

⁴ Udi kawan babiri yiru nainsing ma luar, pakatik yiru takia hang hadapan nelang kawan babiri yiru naharak hanye daya here kataru lenganni.

⁵ Here puang hakun umba ulun lain, likan here nempat teka ulun yiru daya here puang kataru lenganni.”

⁶ Yesus nyarita rarapisan yiru, kude here puang kataru inun sa nabahumni.

Yesus, pakatik sa maeh

⁷ Hinra lagi Yesus kaeau, “Himat tuu eauku yiti: Aku yiti wanawang ma kawan babiri.

⁸ Katuluh sa hawi kapihuan aku, hanyeyiru maling nelang parampok, kude kawan babiri puang nyanrengei lengan here.

⁹ Aku yiti wanawang. Hie masuk mitah aku sagar salamat; hanye kaluar masuk nelang kaiyuh kutaen.

¹⁰ Maling hawi ekat lepuh ngalat, lepuh munu nelang nanrusak. Kude aku hawi nampan murunsia kaiyuh pamelum-welum diwian.

¹¹ Aku yiti pakatik sa maeh. Pakatik sa maeh nyarah hewukni ma kawan babirini.

¹² Ulun upaan sa puang pakatik nelang puang pada ampun kawan babiri yiru, sagar nempat nanan kawan babiri amun hanye kadinung sarigala hawi. Balalu kawan babiri napapah nelang pasai-pau daya sarigala.

¹³ Ulun upaan yiru nempat, daya hanye bagawi ekat ngaiyuh upa. Hanye puang paduli ma kawan babiri yiru.

^14-15 Aku yiti pakatik sa maeh. Sameh kala Ambah kataru aku nelang aku kataru Ambah, kalayiru pada aku kataru kawan babiriku nelang here pada kataru aku. Aku nyarah hewukku gana here.

¹⁶ Magun naan babiri lain sa pada watku, kude puang tamasuk hang sawayan babiri yiti. Here pada harus insingku nelang here sagar nyarengei lenganku. Here katuluh sagar jari isa sawayan nelang isa pakatik.

¹⁷ Ambah sinta aku daya aku nyarah hewukku, nampan narimeni kamulek.

¹⁸ Puang uweng sunah erang kaulun kaiyuh ngalapni teka aku. Aku nyarah hewukku manyu kabahumenku raerai. Aku bakuasa nyarahni nelang bakuasa ngalapni lagi. Yiru tugas sa natarimeku teka Ambahku.”

¹⁹ Daya Yesus kaeau kala yiru, kawan ulun Yahudi mulai basual.

²⁰ Rama sa kaeau, “Hanye karasukan setan! Hanye rapui! Ma inun naun nyanrengei hanye?”

²¹ Kude naan pada sa kaeau, “Ulun sa karasukan setan puang bapaner kalayiru! Inun setan kaiyuh ngulah ulun pehe tau kadinung?”

Ulun Yahudi puang hamen narime Yesus

²² Hang Yerusalem ulun rama rahat maraya anrau Parasmian Lewu Tuhan. Tawuk yiru ganjah musim dingin.

²³ Yesus rahat takia hang sarambi Salomo hawuang Lewu Tuhan,

²⁴ tawuk kawan ulun Yahudi hawi bakumpul nunung Yesus. Here kaeau, “Hampe awe hanyu maladar kami ragu-ragu? Wara tarang tarus, amun hanyu tuu-tuu Raja Panyalamat.”

²⁵ Yesus nuing, “Haut waraku ma naun, kude naun puang parisaya. Kawan pagawian sa naulahku makai ngaran Ambahku, ngami bukti neu aku.

²⁶ Naun puang parisaya daya naun puang tamasuk kawan babiriku.

²⁷ Kawan babiriku nyarengei lenganku. Aku kataru here, nelang here naharak aku.

²⁸ Aku ngami ma here pamelum sajati palus kalalawah, nelang hampe kalalawahni here puang sagar binasa. Puang sunah erang kaulun kaiyuh hanrampas here teka tanganku.

²⁹ Ambahku haut ngami here ma aku malabihi teka ala katantuluh. Nelang puang uweng sunah erang kaulun kaiyuh hanrampas here teka tangan Ambah.

³⁰ Aku anri Ambah samula isa.”

³¹ Balalu kawan ulun Yahudi ngutik watu lagi ngunu medak Yesus.

³² Kude Yesus kaeau ma here, “Naun haut kadinung aku nampalus wahai pagawian sa maeh sa natugas Ambah ma aku. Teka katuluh pagawian yiru, saawe sa ngulah naun yiti ngunu medak aku makai watu?”

³³ Kawan ulun Yahudi yiru nuing, “Puang daya pagawiannu sa maeh yiru kami ngunu medak hanyu makai watu, kude daya hanyu nangkurun Alatalla. Hanyu erang kaulun murunsia, hamen nyanyari dirinu jari Alatalla.”

³⁴ Balalu Yesus kaeau, “Angneh hawuang Buku Hukum naun nasurat: Alatalla kaeau, ‘Naun yiti alatalla?’

³⁵ Takam karasa inun sa nasurat hawuang Surat Barasis palus ma kalalawahni. Jari, amun Alatalla ngantuh ‘alatalla’ ma kawan ulun sa narime lenganni,

³⁶ wuah inun naun kaeau aku mahina Alatalla daya aku kaeau aku Anak Alatalla? Padahal aku napidi daya Ambah nelang nautus ma dunia.

³⁷ Amun aku puang nampalus pagawian sa natugas Ambah, ada parisaya ma aku.

³⁸ Kude daya aku nampalusni, parisayaleh inun sa naulahku, biar naun puang hamen parisaya ma aku. Anri kalayiru naun karasa nelang kataru Ambah tatap mira anri aku, nelang aku tatap mira anri Ambah.”

³⁹ Here ngakali lagi nyamba Yesus, kude hanye bakilah teka here.

⁴⁰ Yesus mulek ma sabarang Hungei Yordan, hang unengan Yohanes hantek hie mambaptis, balalu muneng hang yaru.

⁴¹ Rama ulun hawi nunung hanye. Here kaeau, “Hi Yohanes puang ngulah kawan kaajaiban, kude katuluh inun sa naeauni neu ulun yiti bujur.”

⁴² Balalu rama ulun hang yaru parisaya ma Yesus.