YAKOBUS 3 - KABAR MAEH MA HANYU JANJI WAU

Lela murunsia

¹ Pulaksanai katuluh! Ada kajut rama teka naun sa hamen jari guru. Naun karasa takam sa jari guru sagar naadili labis maweat teka ulun lain.

² Takam katuluh gaha ngulah kahalaen. Kude ulun sa puang suah ngulah kahalaen mitah papaneranni, hanye sagar jari paruna, sa kaiyuh nguasa katuluh tengani.

³ Amun takam namu pangarut wawa kuda nampan hanye nuu ngalut kabahumen takam, himat takam kaiyuh nguasa katuluh tenga kude yiru.

⁴ Alap pada kapal jari suntu. Biar kapal kalayiru hanteni, nainsing daya riwut mehet, kude hanye nakuasa daya pangamudi sa kalayiru rumisni, manyu kabahumen ulun sa ngamudi.

⁵ Kalayiru pada lela takam, biar lela yiru rumis, kude hanye tau namam tenga neu kawan hal sa hante. Suba ngarigama kewangun hanteni nelang lagani jumpun tau rakit daya apui sa rumis!

⁶ Lela hanyeyiru sameh kala apui. Hang tenga takam, hanye sa jari putut kajahaten sa nambur kajahaten ma katuluh tenga takam. Makai apui sa asalni teka naraka, hanye nyanrakit katuluh pamelum takam.

⁷ Katuluh masam satua maraat, wurung, satua ilansar anri kenah tau natampatuh, nelang haut pada natampatuh daya murunsia.

⁸ Kude lela murunsia puang kaiyuh natampatuh daya sunah erang kaulun murunsia. Lela yiru jahat nelang puang tau nakuasa; penu anri rasun sa nampatei.

⁹ Makai lela yiru takam ngantuh tarima kasih ma Tuhan nelang Ambah takam, kude pada pakai nyapa-nyumpah sasameh murunsia, sa haut naulah manyu wangun Alatalla.

¹⁰ Teka wawa takam sa sameh kaluar lengan tarima kasih, pada lengan sapa-sumpah. Pipatutni puang kalayiru, pulaksanai katuluh!

¹¹ Inun naan luwang guha sa ngaluar ranu mapahe anri ranu mapait teka luwang guha isa?

¹² Pulaksanai katuluh, kakau ara puang tau mua wua zaitun, kakau anggur puang tau mua wua ara. Luwang guha sa ngaluar ranu maerang puang tau ngaluar ranu mapahe pada.

Kaharatien nelang kapintaren sa hawi teka ambau

¹³ Amun hang penah naun naan ulun pintar maharati nelang babudi, ware hanye nantarang pamelum sa maeh anri nampalus kawan hal sa maeh, nasinrah anri karandahen atei, kaharatien nelang kapintaren.

¹⁴ Kude amun naun bahiri, mahanang atei nelang ekat ngitung diri raerai, ada iwawara neu kaharatien nelang kapintaren yiru, daya anri kalayiru naun haut mutar balik kabar sa bujur teka Alatalla.

¹⁵ Kaharatien nelang kapintaren sa kalayiru asalni puang teka surga. Kude asalni teka dunia, teka kunuan murunsia anri teka setan!

¹⁶ Hang awe naan kadidit anri ekat ngitung diri raerai, hang yiru pada naan pirawekan anri katuluh masam pagawian jahat.

¹⁷ Kude ulun sa naan kaharatien nelang kapintaren sa asalni teka ambau, hanye sa palanungkai tuu barasis, udi hie katuju badamai, ramah tamah, nelang eter nuu. Hanye penu anri ahi lelo nelang kawan pagawianni uras maeh. Hanye puang umba teka hie-hie nelang puang bapura-pura.

¹⁸ Samula pikaeh hanyeyiru hasil teka wini damai sa napuau daya ulun sa sinta damai!