YAKOBUS 1 - KABAR MAEH MA HANYU JANJI WAU

¹ Ma katuluh ulun wat Alatalla sa naan hang maaru-maati hang litar dunia! Tabe teka aku, hi Yakobus, walah Alatalla nelang walah Tuhan Yesus Kristus.

Kaparisayaan anri kahatien kapintaren

² Pulaksanai katuluh! Amun naun wuah wahai masam subaan, patut naun kaingkam bauntung.

³ Daya naun karasa, amun naun tatap parisaya ma Tuhan tawuk wuah subaan, riranni hanyeyiru: naun jari mansing.

⁴ Jaga nampan kakansingen atei naun yiru magin batambah-tambah hampe naun tuu-tuu paruna nelang puang uweng kakurangen hawuang katuluh hal.

⁵ Amun naan teka naun kurang kahatien kapintaren, ware hanye ilaku teka Alatalla, himat Alatalla sagar ngami kahatien kapintaren yiru ma hanye; daya ma tiap ulun, Alatalla ngami anri sanang atei nelang anri penu ahi lelo.

⁶ Kude ulun sa ilaku yiru, harus parisaya; hanye puang iyuh bembang. Daya ulun sa bembang atei hanyeyiru ekat yalah galumbang hang laut sa nainsing daya riwut maaru-maati.

^7-8 Ulun sa kalayiru puang tatap pikiranni, hanye puang tau ngalap kaputusan inun-inun hang katuluh hal sa naulahni. Daya yiru hanye puang usah harap kaiyuh inun-inun teka Alatalla.

Pipaua anri katatauen

⁹ Ulun Kristen sa paua ware hanye kaingkam arai amun Alatalla ngampambau hanye.

¹⁰ Ulun Kristen sa tatau ware hanye pada kaingkam arai, amun Alatalla nyarandah hanye. Daya ulun tatau sagar wawai yalah wunge rikut.

¹¹ Hang tawuk mate anrau hulet anri laing kai mehet, maka rikut yiru sagar layu balalu wungeni ruruh nelang kaeh wunge yiru pada wawai. Kalayiru pada anri ulun tatau; hanye sagar hansur hang tawuk hanye rahat nampalus hanye ngakali.

Subaan anri purija

¹² Sanang ulun sa mansing hang tawuk hanye wuah subaan. Daya udi hanye haut kaiyuh batahan hawuang subaan yiru, hanye sagar narime upani, hanyeyiru pamelum sa haut najanji Alatalla ma kawan ulun sa sinta hanye.

¹³ Amun ulun tagoda daya subaan sa kalayiru, ada hanye kaeau, “Godaan yiru hawini teka Alatalla,” daya Alatalla puang tau tagoda daya kajahaten nelang puang pada murija murunsia sunah erang kaulun sika puang.

¹⁴ Kude ulun tagoda amun hanye natarik nelang nabujuk daya kabahumenni raerai sa jahat.

¹⁵ Udi hie, amun kabahumen sa jahat yiru natampalus, himat hulet dosa; nelang amun dosa yiru haut kalayiru tamamni, balalu panyarianni hanyeyiru pampatei.

¹⁶ Pulaksanai katuluhni, ada naun wuah tipu!

¹⁷ Tiap pangamian sa maeh nelang hadiah sa paruna, hawini teka surga, naampinau daya Alatalla, sa haut ngulah kawan maraai hang langit. Hanye Alatalla sa puang tau baubah, nelang puang pada ngulah sabab ala inun-inun maieng.

¹⁸ Daya kabahumenni raerai raerai hanye ngulah takam jari kawan anakni makai lenganni sa bujur. Hanye nampalus hal yiru nampan takam kaiyuh unengan sa mambatang hang penah kawan kawan ala welum sa naulah dayani.

Nyanrengei nelang nampalus

¹⁹ Pantaru yiti mamaeh, kawan pulaksanaiku sa nasinta! Tiap ulun harus wansit nyanrengei, kude unte pantane nelang unte pada sangit.

²⁰ Ulun sa sangit puang kaiyuh nampalus hal sa maeh, sa ngampi sanang atei Alatalla.

²¹ Daya yiru, umpe kawan pidasaran sa bere nelang jahat. Tarime anri randah atei lengan sa naamule daya Alatalla hang wuang atei naun, daya lengan yiru ngami kakuaten neu nyanepah naun.

²² Ware naun nampalus kawan inun sa naeau daya Alatalla, ada ekat nyanrengei daya anri kalayiru naun nipu diri naun raerai.

²³ Ulun sa nyarengei lengan Alatalla, kude puang nampalusni hanyeyiru yalah ulun sa rahat ninung uruwawani hang saramin.

²⁴ Udi hanye ninung mamaeh, hanye balalu tulak nelang udi hie hanye puang kaitung kewangun wangun uruwawani yiru.

²⁵ Hukum wat Alatalla paruna nelang naan kakuaten neu nyalamat murunsia. Ulun sa nyalidik nelang mantaru mamaeh palus nampalus kawan hukum yiru, puang ekat nyanrengei balalu puang kaitung lagi, ulun yiru sagar naberkat daya Alatalla hawuang katuluh kawan ulah gawini.

²⁶ Amun naan ulun sa kaingkam dirini erang kaulun sa ngalut nuu baagama, kude hanye puang nyaga lelani, hanye nipu dirini raerai; sumbayangni puang uweng riranni.

²⁷ Piutul ngalut baagama sa nuu manyu paninungen Alatalla Ambah hanyeyiru: ngarawah kawan iya anule pahatu anri kawan wawei walu sa welum hawuang kasusahen, nelang nyaga dirini nampan ada natanrusak daya dunia yiti.