WAHYU 6 - KABAR MAEH MA HANYU JANJI WAU

Kawan segel

¹ Udi yiru aku kadinung Anak Babiri yiru nguka segel sa palanungkai teka kapitu segel yiru. Balalu aku karengei isa teka kaepat mahluk yiru kaeau, “Ma yati!” Lenganni yalah lengan nanyu.

² Aku nantau, balalu kadinung erang kaukui kuda mahilak. Ulun sa nungkang kuda yiru negei panah, nelang ma hanye na ami isa mahkota. Hanye basurung yalah erang kaulun sa haut manang sa tulak lepuh hanrabut kamanangen.

³ Udiyiru Anak Babiri yiru nguka segel sa karueh, palus aku karengei mahluk sa karueh yiru kaeau, “Ma yati!”

⁴ Balalu erang kaukui kude sa lain kaluar lagi. Kuda yiru waranani mariang. Ulun sa nungkang kuda yiru naami kuasa nampan nyamawai pidamai hang ambau tane, nampan murunsia ipamunu-ipanampatei. Ma hanye naami erang kawila pedang sa hante.

⁵ Balalu Anak Babiri yiru nguka segel sa katelu. Nelang aku karengei mahluk sa katelu kaeau, “Ma yati!” Aku nantau, balalu kadinung erang kaukui kude maintem. Ulun sa nungkang kude yiru negei erang pasang taraju hang tanganni.

⁶ Balalu aku karengei naan kala lengan herau teka penah kaepat mahluk yiru. Lengan yiru kaeau, “Erang liter gandum sa maeh baharaga kala hene upa erang anrau nelang telu liter gandum masam sa lain baharaga kala hene upa erang anrau pada. Kude ada nanrusak kawan kakau zaitun anri kabun anggur!”

⁷ Udiyiru Anak Babiri yiru nguka segel sa kaepat. Palus aku karengei mahluk sa kaepat kaeau, “Ma yati!”

⁸ Aku nantau, balalu kadinung erang kaukui kude habuk. Ulun sa nungkangni bangaran Pampatei. Rite tuu hang wading wukuni hanye nataharak daya Tumpuk Adiau. Ma here naami kuasa hang ambau saparapat dunia yiti, nampan kaiyuh munu, mitah paparangan, mitah juju lau, mitah panyakit sampar nelang mitah kawan eha maraat.

⁹ Udiyiru Anak Babiri yiru nguka segel sa kadime. Balalu aku kadinung hang mezbah naan kawan amirue ulun sa haut matei wuah wunu daya here nyantuhun pesen teka Alatalla itetei kasaksian here.

¹⁰ Here kaeau anri lengan mehet, “U Tuhan sa Kuasani puang uweng tikas, sa barasis nelang sa bujur! Kalaawe lawah lagi atiai hanyu mangadili panduduk dunia yiti nelang nukum here daya here haut munu kami?”

¹¹ Ma tiap tenga here naami erang kalamar baju mahilak. Here balalu nahuyu baranai erang pitus lagi, hampe sukup jumalah kawan hengau sa mira parjuangan anri kawan pulaksanai here sa sagar nawunu sameh kala here.

¹² Kamulek aku kadinung Anak Babiri yiru nguka segel sa kaenem. Balalu salenga gempa bumi tamam tatuu. Mate anrau baubah jari maintem kala kain kamumu sa kasar, wulan jari mariang kala ira.

¹³ Kawan wawahiang balawuan teka langit ma ambau tane kala wua ara sa huan mihak lawu teka kakauni daya tampuh barat mehet.

¹⁴ Langit wawai yalah karatas nawalun, nelang katuluh gunung anri pulau naidar teka unenganni.

¹⁵ Balalu kawan raja dunia, kawan pamimpin, kawan panglima, kawan ulun tatau nelang kawan ulun bakuasa, anri kawan ulun sa lainni, hau walah atawa ulun bebas, katuluhni sanina hawuang kawan rungkap watu hang helang kawan gunung watu.

¹⁶ Ma kawan gunung anri ma kawan watu yiru, anri lengan mehet here kaeau, “Weat kami! Dina kami teka paninunganni sa maharung hang padudusan, nelang teka kasangiten Anak Babiri yiru!

¹⁷ Anrau rume lulun satamam haut hampe, itati here ngaluar panyangit here, nelang puang uweng sunah erang kaulun sanggup batahan hang hadapan here!”