WAHYU 5 - KABAR MAEH MA HANYU JANJI WAU

Walunan buku anri Anak Babiri

¹ Udiyiru aku kadinung naan isa walunan buku hang tangan ulun sa maharung hang padudusan yiru. Hang nantuhian buku yiru penu nasurat nelang namaterai anri pitu kawua segel.

² Balalu aku kadinung erang kaulun malekat sa tingkas nanterau anri lengan mehet, “Hie sa patut nguka kawan segel nelang nguka buku yiti?”

³ Kude hau hang surga hau hang ambau tane, atawa hang kapit tane sika puang uweng ulun sa sanggup nguka buku yiru nelang ninung hawuangni.

⁴ Aku balalu nungkau daya puang uweng sunah erang kaulun sa sanggup nguka buku yiru nelang ninung hawuangni.

⁵ Balalu naan erang kaulun teka kawan pamimpin yiru sa kaeau ma aku, “Ada nungkau! Dinung! Singa teka suku bangsa Yehuda, turunan Dawid sa hante, haut manang. Hanye sanggup nguka pitu segel nelang nguka buku yiru.”

⁶ Kamulek aku kadinung erang kaukui Anak Babiri minri hang penah padudusan yiru, nakaliling daya kaepat mahluk anri katuluh pamimpin yiru. Anak Babiri yiru wangunni kala haut udi nasamalis. Hanye naan pitu tanruk anri pitu matei: hanyeyiru pitu roh teka Alatalla sa haut nautus ma litar dunia.

⁷ Udi hie Anak Babiri yiru basurung palus ngalap walunan buku yiru teka tangan kawan ulun sa maharung hang padudusan.

⁸ Parahatan Anak Babiri yiru ngalap walunan buku yiru, balalu kaepat mahluk anri karuampulu epat pamimpin yiru uras ileku hang hadapan hanye. Tiap tenga here negei kasapi anri mangkok amas sa mahuang garu, hanyeyiru kawan doa ulun wat Alatalla.

⁹ Here manyanyi isa lagu wau: “Hanyu patut ngalap buku yiru nelang nguka kawan segelni. Daya hanyu haut nawunu, nelang makai pampateinu murunsia teka katuluh suku, basa, negara nelang bangsa haut nawidinu ma Alatalla.

¹⁰ Hanyu haut ngulah here jari isa bangsa uras kawan imam. nampan here malayanni Alatalla takam nelang marentah hang ambau tane.”

¹¹ Udiyiru aku kadinung lagi. Nelang aku karengei lengan malekat sa baribu-ribu nelang bajuta-juta ramani. Here minri ngaliling padudusan anri kaepat mahluk baya kawan pamimpin yiru.

¹² Here manyanyi anri lengan mehet, “Anak Babiri sa haut nasamalis yiru, patut neu narime kuasa, katatauen, kaharatien nelang kakuaten; hanye patut nahormat, namulia nelang natawat!”

¹³ Balalu aku karengei katuluh mahluk hang langit, hang ambau tanne, hang kapit tane nelang hawuang laut – imbeni katuluh mahluk hawuang dunia yiti – manyanyi, “Hanye sa maharung hang ambau padudusan, anri sa mulia Anak Babiri yiru, hanyeyiru ulun sa natawat nelang nahormat nelang mulia nelang bakuasa palus makalalawah!”

¹⁴ Balalu kaepat mahluk yiru nuing, “Amen!” Nelang kawan pamimpin yiru balalu ileku palus nyambah.