WAHYU 4 - KABAR MAEH MA HANYU JANJI WAU

Nyambah hang surga

¹ Udi yiru aku kaiyuh paninungan kamulek. Aku kadinung isa wanawang wawanga hang surga. Udiyiru naan rengei lengan lagi sa tawuk dahulu hie haut pantane ma aku kala lengan tarompet. Lengan yiru kaeau, “Hayu mambai ma yati. Aku sagar nutui ma hanyu inun sa sagar kajadian hanrian.”

² Aku palus nakuasa daya Roh Alatalla, balalu aku kadinung hang surga naan isa padudusan, nelang naan erang kaulun maharung hang padudusan yiru.

³ Uruwawa ulun yiru nyahaya yalah parmata baiduri pandan anri permata delima. Salumparau warana zamrud ngalingkar padudusan yiru.

⁴ Hawuang lingkaran ngaliling padudusan yiru naan ruampulu epat padudusan sa lain. Hang yiru maharung ruampulu epat pamimpin sa makai pakaian mahilak, nelang makai mahkota amas.

⁵ Teka padudusan yiru kaluar sahaya kelat nelang kaluar lengan nanyu sa laligur. Nelang hang hadapan padudusan yiru naan pitu palita sa malelap; hanyeyiru kapitu Roh Alatalla.

⁶ Naan pada hang hadapan padudusan yiru sa nadinung yalah laut saramin, barasis kala Kristal. Hang kaliling padudusan yiru, hang tiap pingirni, naan epat mahluk, sa hang hadapan anri hang punggungni penu matei.

⁷ Mahluk sa palanungkai nadinung kala wangun singa. Sa karueh, kala wangun sapi upu. Sa katelu, uruwawani kala uruwawa murunsia. Sa kaepat, nadinung kala wangun wurung rajawali rahat samiding.

⁸ Kaepat mahluk yiru, maisasaan here naan enem elat, nelang hang kaliling anri hang kapit elat yiru penu matei. Kaanrau kamalem kawan mahluk yiru puang taduk haut manyanyi, “Brasis, brasis, brasis Tuhan, Alatalla sa kuasani puang uweng tikas; sa naan, sa haut naan, nelang sa saraang naan makalalawahni.”

⁹ Kaepat mahluk yiru manyanyi kawan lagu tawat, hormat nelang tarima kasih ma hanye sa maharung hang padudusan yiru, hanyeyiru hanye sa welum ma kalalawahni. Nelang tawuk kawan mahluk yiru manyanyi,

¹⁰ karuampulu epat pamimpin yiru ileku hang hadapan ulun sa maharung hang padudusan yiru, balalu nyambah hanye sa welum ma kalalawahni. Udi yiru here nampi kawan mahkota here hang hadapan padudusan yiru nelang kaeau,

¹¹ “U Tuhan, u Alatalla kami! Ekat hanyu sa patut narime tawat, hormat nelang kuasa. Daya hanyu sa ngulah alakatantuluh, nelang daya kabahumennu pada alakatantuluh yiru haut jari nelang welum.”