WAHYU 20 - KABAR MAEH MA HANYU JANJI WAU

Neu wayah saribu taun

¹ Udiyiru aku kadinung erang kaulun malekat minau teka surga. Hang tanganni hanye negei kunsi labak pampatei anri isa rantai hante.

² Balalu hanye nyamba naga yiru, hi anipe matueh – hanyeyiru Iblis atawa Roh Jahat yiru – palus hanrantaini hampe saribu taun lawahni.

³ Kamulek malekat yiru ngumpe naga yiru mawuang labak pampatei, balalu ngunsi labak yiru palus nyegelni, nampan naga yiru puang kaiyuh lagi nipu kawan bangsa kapihuan wayah saribu taun yiru jumpuh. Udiyiru hanye harus nalapas erang pitus.

⁴ Balalu aku kadinung kawan padudusan anri kawan ulun sa maharung hang kawan padudusan yiru naami kuasa nampan mutus hukuman. Aku kadinung pada amirue kawan ulun sa haut napumpung uluni daya here ngami kasaksian neu Yesus, nelang iwara pesen teka Alatalla. Kawan ulun yiru puang nyambah satua atawa ampatungni. Here pada puang suah narime siri satua yiru hang rai atawa hang tangan here. Balalu here welum mulek palus marentah kala raja baya Kristus salawah saribu taun.

⁵ Yiti sa palanungkaini kawan ulun matei nasamelum kamulek teka pampatei. (Kude kawan ulun sa matei lainni puang nasamelum kamulek salawah saribu taun yiru.)

⁶ Salamat kawan ulun sa umba nasamelum mulek hang sa palanungkaini yiru. Here patut jari milik Alatalla. Pampatai asa karueh puang bakuasa lagi hang ambau here. Here sagar jari kawan Imam Alatalla nelang kawan imam Kristus; here sagar marentah baya hanye saribu taun lawahni.

Iblis nasantalau

⁷ Dami galis wayah saribu taun yiru, Iblis sagar nalapas teka panjarani,

⁸ nelang hanye sagar nipu kawan bangsa sa hang aru ati litar dunia yiti, hanyeyiru Gog anri Magog. Iblis ngumpul here nampan baparang, sa jumalahni wahai tatuu kala karasik hang iring laut.

⁹ Balalu here bapisah tulak maaru-maati ma litar dunia, mukah manyarang kemah ulun wat Alatalla anri tumpuk sa nasinta Alatalla. Kude apui minau teka langit palus nyanumus here.

¹⁰ Udiyiru iblis sa nipu here yiru, natawut mawuang laut apui anri balerang. Hang yiru unengan satua anri nabi palasu yiru naumpe labis dahulu. Here sagar nasiksa kaanrau kamalem palus ma kalalawahni.

Hukuman sa pangalisan

¹¹ Udiyiru aku kadinung naan isa padudusan mahilak sa hante nelang hanye sa maharung hang ambauni. Langit anri tane wawai teka hadapanni, hampe puang uweng dinung lagi.

¹² Kamulek aku kadinung kawan ulun matei hante rumis, minri hang hadapan padudusan yiru. Balalu kawan buku nauka, balalu naan isa buku sa lain pada nauka, hanyeyiru Buku Ulun Welum. Udiyiru hukuman nasanawu ma ulun matei, susuk kala ulah gawi here manyu kala sa naan nasatat hawuang kawan buku yiru.

¹³ Balalu laut nyarah kawan ulun matei sa naan hawuangni. Pampatei anri Alam Maut pada nyarah kawan ulun matei sa naan hang wuangni. Balalu kawan ulun matei yiru katuluhni nahukum susuk kala kawan ulah gawi here.

¹⁴ Kamulek Pampatei anri Alam Maut natawut mawuang laut apui. (Laut apui yiti hanyeyiru pampatei sa karueh.)

¹⁵ Kawan ulun sa puang nasurat ngaranni hawuang Buku Ulun Welum, naumpe mawuang laut apui.