WAHYU 12 - KABAR MAEH MA HANYU JANJI WAU

Wawei anri naga

¹ Balalu naan dinung hang langit ala maka wawauh sa luar biasa. Naan erang kaulun wawei sa ipakaian mate anrau, rahat minri hang ambau wulan. Hang uluni naan isa mahkota teka dua walas wawahiang.

² Wawei yiru rahat mihuwuntung, nelang haut hampe wayahni kayaan, balalu hanye ngiak kahanangen.

³ Balalu naan dinung pada hang langit ala maka wawauh. Naan erang kaukui naga mariang hante tatuu, kaulu pitu batanruk sapuluh wahaini. Tiap uluni makai isa mahkota.

⁴ Makai ukuini hanye ngihir sapertiga teka kawan satua hang langit nelang nawutni ma tane. Naga yiru minri hang hadapan wawei sa kai bagenda yiru, bahumni ngunu nelen genda yiru, dami hanye nakayaan.

⁵ Balalu wawei yiru ngayaan erang kaulun iya upu sa sagar marentah katuluh bangsa makai tungkeh jatang. Kude iya yiru narampas teka wawei yiru, balalu nainsing ma Alatalla mahadapan padudusanni.

⁶ Balalu wawei yiru nempat ma padang gurun, ma unengan sa haut nasadia daya Alatalla ma hanye. Hang yiru hanye sagar napalihara 1260 anrau lawahni.

⁷ Balalu hang surga hulet paparangan. Hi Mikhael baya kawan malekatni babur nawan naga yiru. Nelang naga yiru pada nakarawah daya kawan malekatni, nawan hi Mikhael.

⁸ Kude naga yiru talau, balalu hanye baya kawan malekatni puang nalewa lagi muneng hang surga.

⁹ Naga hante yiru naumpe ma luar! Hanyeyiru anipe matueh, sa bangaran Iblis atawa Roh Jahat, sa nipu litar dunia. Hanye naumpe ma tane baya kawan malekatni.

¹⁰ Balalu aku karengei naan lengan mehet teka surga sa kaeau, “Itati wayahni Alatalla nyalamat ulun watni! Itati Alatalla nantarang kuasani yalah Raja! Itati Raja Panyalamat sa najanji yiru pada nantarang kuasani! Daya sa muntaka kawan pulaksanai takam hang hadapan Alatalla kaanrau kamalem, haut nakaluar teka surga.

¹¹ Kawan pulaksanai takam haut nyantalau hanye makai ira Anak Babiri yiru, nelang makai kabar sa bujur teka Alatalla sa nawara here. Here rela nyarah hewuk here hampe matei.

¹² Daya yiru, ware surga anri katuluh sa muneng hawuangni, arai mihewu! Kude silaka tane anri laut, daya Iblis haut minau nunung naun nelang bapanyangit tatuu, daya hanye karasa wayahni haut puang lawah lagi!”

¹³ Dami naga yiru kaingkam hanye haut naumpe ma tane, hanye nuku nyasah wawei sa haut ngayaan iya upu yiru.

¹⁴ Kude ma wawei yiru naan naami rueh elat wurung rajawali sa hante, nampan hanye samiding hampi padang gurun, hang unengan hanye sagar napalihara salawah telu satengah taun, puang naga yiru kahaba.

¹⁵ Naga yiru balalu murang ranu wahai tatuu teka wawani ma tiba wawei yiru, nampan ngampi hanyut hanye.

¹⁶ Kude tane ilanga palus nelen ranu sa kaluar teka wuang wawa naga yiru.

¹⁷ Naga yiru sangit tatuu anri wawei yiru, hampe hanye tulak nantam turunan teka wawei yiru sa lain, hanyeyiru katuluh ulun sa ngalut nuu ma kawan parentah Alatalla, nelang sa ngami kasaksian neu Yesus nelang kuasani.

¹⁸ Balalu naga yiru minri hang iring pampang.