ROMA 4 - KABAR MAEH MA HANYU JANJI WAU

Hi Abraham jari suntu

¹ Amun kalayiru, inun sa tau naeau takam neu hi Abraham, datu nini bangsa takam? Kalaawe pangalamanni?

² Amun kawan hal sa naulahni ngulah Alatalla narime hanye yalah ulun sa ngampi sanang atei Alatalla, balalu naan pada tujuan ma hanye nampan iwawara. Kude hanye puang tau iwawara hang hadapan Alatalla.

³ Hawuang Surat Barasis nasurat, “Hi Abraham parisaya ma Alatalla, nelang daya kaparisayaanni yiru hanye natarime daya Alatalla yalah ulun sa ngampi sanang atei Alatalla.”

⁴ Ulun sa bagawi, narime upa; nelang upani puang naanggap yalah isa pangamian, daya yiru samula hakni.

⁵ Kude naan ulun sa puang bagantung harap hang hanye ngakali raerai; hanye nyarah dirini ma Alatalla sa iwara ulun badosa lepah teka kahalaen. Manyu kaparisayaanni yiru Alatalla narime ulun yiru yalah ulun sa ngampi sanang atei Alatalla.

⁶ Kalayiru pada manyu pikiran Dawid; yiru sababni hanye ngantuh tuu sanang ulun sa haut natarime daya Alatalla jari ulun sa ngampi sanang ateini, nelang puang daya Alatalla ninung inun sa naulah gawini. Hi Dawid kaeau kala yiti,

⁷ “Tuu sanang ulun sa kawan kahalaenni naampun nelang kawan dosani haut bapasar daya Alatalla!

⁸ Tuu sanang ulun sa kawan dosani puang natagis daya Tuhan!”

⁹ Inun antuhan tuu sanang yiti natuju ekat ma kawan ulun sa ngalut aturan sunat? Atawa pada ma kawan ulun sa puang ngalut aturan sunat? Kami haut kaeau kapihuanni, hi Abraham natarime daya Alatalla yalah ulun sa ngampi sanang ateini, daya hi Abraham parisaya ma Alatalla.

¹⁰ Nah, hantamian Alatalla iwara hal yiru? Kapihuan atawa haut udi hi Abraham nasunat? Samula kapihuan hanye nasunat, puang sahaut udi nasunat.

¹¹ Hanye hanrian nasunat, nelang sunatni yiru ekat yalah tanda Alatalla haut narime hanye yalah ulun sa ngampi sanang atei Alatalla, daya hanye parisaya ma Alatalla. Hanye natarime daya Alatalla tawuk hanye huan umba aturan sunat. Nelang hi Abraham jari ambah manyu rohani ma katuluh ulun sa parisaya ma Alatalla, daya yiru here haut natarime daya Alatalla yalah ulun sa ngampi sanang ateini, biar here puang umba aturan sunat.

¹² Hi Abraham pada ambah manyu rohani ma kawan ulun sa umba aturan sunat. Hanye ambah manyu rohani ma here puang ekat daya here umba aturan sunat, kude pada daya here welum anri parisaya ma Alatalla, sameh kala hi Abraham hang tawuk hanye welum umba aturan sunat.

Janji Alatalla natarime daya parisaya ma Alatalla

¹³ Alatalla bajanji anri hi Abraham nelang katurunanni himat dunia yiti sagar jari milik Abraham. Alatalla bajanji kalayiru puang daya hi Abraham ngalut nuu ma hukum agama Yahudi, kude daya hanye parisaya ma Alatalla hampe hanye natarime daya Alatalla yalah ulun sa ngampi sanang atei Alatalla.

¹⁴ Daya amun ekat kawan ulun sa ngalut nuu ma kawan hukum agama Yahudi sa sagar narime kawan inun sa najanji daya Alatalla, neu parisaya ma Alatalla budas puang bariran, nelang janji Alatalla pada budas puang bariran.

¹⁵ Hukum agama Yahudi ngampi hulet hukuman Alatalla. Kude amun hukum puang uweng, palangaran pada puang uweng.

¹⁶ Jari janji Alatalla yiru miundan kaparisayaan ulun ma Alatalla. Yiru jari isa jaminan ma katuluh katurunan Abraham neu janji yiru naami ma here yalah pangamian sa naami tuu eleh teka Alatalla; puang ekat ma here sa ngalut nuu ma hukum agama Yahudi, kude pada ma here sa parisaya ma Alatalla sameh kala hi Abraham parisaya ma hanye. Daya hi Abraham samula ambah takam katuluh sara rohani.

¹⁷ Daya Alatalla kaeau kalayiti ma hi Abraham, “Aku haut nanyari hanyu jari ambah ma wahai bangsa.” Kala yiru Alatalla ngami janji yiru ma hi Abraham. Balalu hi Abraham parisaya ma hanye. Hanyeyiru Alatalla sa nyamelum ulun matei; hanye pada Alatalla sa ekat anri pantane ngulah inun sa puang suah naan jari naan.

¹⁸ Hi Abraham saratang harap nelang parisaya biar haut puang uweng harapan lagi. Daya yiru hanye jari ambah ma wahai bangsa. Kala sa nasurat hawuang Surat Barasis, “Katurunannu sagar jari rama tatuu.”

¹⁹ Hi Abraham hang tawuk yiru karasa neu hanye haut puang tau pada lagi naan katurunan, daya tengani haut kajut matueh nelang umurni haut rite jatuh taun; kamulek hi Sara, matue wawei yiru, tamanang. Kude iman Abraham puang balalu bakurang.

²⁰ Hanye tatap parisaya nelang puang bembang janji Alatalla. Likan imanni ngulah hanye batambah mansing, hampe hanye nawat nante Alatalla.

²¹ Hanye parisaya tatuu Alatalla tau nampalus inun sa haut najanjini.

²² Yiru sababni hi Abraham natarime daya Alatalla yalah ulun sa ngampi sanang atei Alatalla.

²³ Kawan lengan “natarime yalah ulun sa ngampi sanang atei Alatalla” nasurat puang ekat ma hi Abraham raerai,

²⁴ kude pada ma takam. Takam pada sagar natarime yalah ulun sa haut ngampi sanang atei Alatalla, daya takam parisaya ma Alatalla sa nyamelum Yesus, Tuhan takam, teka pampatei.

²⁵ Yesus yiru haut nasarah nampan nawunu daya kawan dosa takam; balalu hanye nasamelum kamulek daya Alatalla nampan ngami tau pada takam ikaeh kamulek anri Alatalla.