ROMA 3 - KABAR MAEH MA HANYU JANJI WAU

¹ Amun kalayiru, inun kauntunganni jari ulun Yahudi?

² Batantu wahai riranni! Sa mambatang, daya ma ulun Yahudi Alatalla ngami kaparisayaan kawan lengan Alatalla.

³ Kude kala awe amun mehe ulun Yahudi puang satia? Inun gana yiru Alatalla balalu puang satia?

⁴ Batantu puang! Daya bawilah tuu Alatalla saratang bujur, biar ulun uras ipusu. Hawuang Surat Barasis nasurat, “Wuah hanyu lalea tuu bujur hawuang ala katuluh sa naantuhnu, balalu hanyu manang hang tawuk hanyu nahakimi.”

⁵ Kude amun kaadilan Alatalla jiru magin lalea, daya gana takam ngulah sa puang bujur, inun sa hamen naeau takam? Bawilah Alatalla puang adil amun hanye nukum takam? (Samula tuntian yiti wajar sara murunsia.)

⁶ Budas puang! Daya amun Alatalla puang adil, kala awe hanye tau mangadili dunia yiti?

⁷ Kude amun daya pagawian sa puang bujur, kawan sa bujur neu Alatalla magin lalea hampe hanye natawat, wuah inun ulun sa ngulah jahat yiru magun naampihala kala ulun badosa?

⁸ Nelang wuah inun takam puang iyuh kaeau, “Hayu takam ngulah jahat nampan hulet pikaeh?” Samula naan kawan ulun sa ngapuangen aku nelang ngeau aku haut kaeau kala yiru. Kawan ulun sa kala yiru pipatutni nahukum daya Alatalla.

Puang sunah erang kaulun sa nampalus kabahumen Alatalla

⁹ Nah, inun kadudukan takam kala ulun Yahudi diwi maeh teka kadudukan bangsa lain? Budas puang! Haut nawaraku hau ulun Yahudi hau bangsa lain, katuluhni haut nakuasa dosa.

¹⁰ Kala sa nasurat hawuang Surat Barasis, “Puang sunah erang kaulun sa bujur,

¹¹ puang sunah erang kaulun sa kataru nelang puang sunah erang kaulun sa nyambah Alatalla.

¹² Katuluh ulun haut nyanawit tenga teka Alatalla; katuluhni haut tawang. Puang sunah erang kaulun ngulah sa bujur; erang kaulun magin sika puang!

¹³ Gugurungan here kala pasaran sa wawanga. Tipu akal kaluar teka lela here nelang wawa here muras puntaka, kala wisa anipe.

¹⁴ Mulut here penu anri sapa sumpah.

¹⁵ Jangkau here wansit amun ngunu ngahanangen nelang munu ulun.

¹⁶ Kahansuren anri kasusahen, nahambur here hang awe-awe.

¹⁷ Here pehe nadap lalan kasanangen,

¹⁸ nelang puang mahormat Alatalla.”

¹⁹ Itati takam karasa katuluh sa nasurat hawuang hukum agama Yahudi, samula ma kawan ulun sa naan hang kapit kuasa hukum yiru. Anri kala yiru puang sunah erang kaulun tau ngami tujuan inun-inun lagi nelang litar dunia tau nahukum daya Alatalla.

²⁰ Daya puang sunah erang kaulun sa naami tau pada ikaeh anri Alatalla daya gana ulun yiru nampalus kawan hal sa naan hawuang hukum agama Yahudi. Kabalikanni hukum yiru ekat nantarang ma murunsia sa murunsia badosa.

Kalaawe Alatalla ngami lalan ma murunsia ikaeh anri hanye

²¹ Kude itati Alatalla haut nutui lalan kalaawe murunsia tau ikaeh anri hanye; nelang sarani yiru puang uweng sangkut pautni anri hukum agama Yahudi. Kawan buku Moses anri buku kawan nabi likan nantarang hal yiru,

²² Alatalla ngami tau pada ma murunsia ikaeh anri hanye, ekat amun murunsia parisaya ma Yesus Kristus. Alatalla ngulah yiti ma katuluh ulun sa parisaya ma Kristus; daya puang uweng bedani:

²³ Katuluh ulun haut badosa nelang lawit teka Alatalla sa hamen nyalamat here.

²⁴ Ekat daya lelo Alatalla sa naami tuu eleh, hubungan murunsia anri Alatalla jari maeh kamulek; sarani hanyeyiru: murunsia nasanepah daya Kristus Yesus.

²⁵ Alatalla nyarah Kristus Yesus nampan makai pampateini yiru murunsia nalalea lepah teka kahalaen amun here parisaya ma hanye. Alatalla ngulah kala yiru neu nantarang kaadilanni. Daya hang tawuk sa haut paitah Alatalla haut basabar anri kawan dosa murunsia, hampe hanye puang nukum here.

²⁶ Kude itati hanye batindak nadap dosa pakai mambukti kaadilanni. Makai sara yiru hanye nantarang dirini bujur; nelang tiap ulun sa parisaya ma Yesus nalalea yalah ulun sa haut ikaeh kamulek anri Alatalla.

²⁷ Daya sabab yiru puang uweng lagi tujuan ma takam nampan itatamam. Wuah inun kalayiru? Inun daya takam nampalus sa nasurat hawuang hukum agama Yahudi? Puang. Kude daya takam parisaya.

²⁸ Daya kasimpulanni kalayiti: Ulun nalalea ikaeh kamulek anri Alatalla, puang daya hanye nampalus inun sa nasurat hawuang hukum agama Yahudi, malengkan daya hanye parisaya ma Yesus Kristus.

²⁹ Atawa Alatalla yiru ekat Alatalla ulun Yahudi? Inung puang angneh hanye Alatalla bangsa lain pada? Hiai, samula hanye Alatalla bangsa lain pada!

³⁰ Daya Alatalla ekat isa. Hanye sa ngami tau pada ma kawan ulun Yahudi ikaeh kamulek anri Alatalla daya here parisaya. Nelang hanye pada sa ngami tau pada kawan ulun bangsa lain ikaeh kamulek anri Alatalla; yiru pada daya here parisaya.

³¹ Inun yiti baarati daya takam parisaya ma Kristus, takam ngumpe hukum agama Yahudi? Budas puang! Diwi likan makai kaparisayaan takam yiru, takam mahargai hukum yiru.