ROMA 16 - KABAR MAEH MA HANYU JANJI WAU

Salam pribadi

¹ Aku hamen mamperkenal pulaksanai takam, hi Febe. Hanye ngarawah ungkup hang Kengkrea.

² Tarime hanye yalah erang kaulun teka ulun wat Tuhan. Samula kala yiru kawan ulun sa parisaya ma Alatalla harus narime isa anri sa lain. Karawah hanye, amun hanye mamarlu karawahen teka naun, daya hanye raerai haut ngarawah ulun rama tamasuk aku.

³ Hampe tabeku ma hi Priskila anri hi Akwila, kawan hengauku sa sameh-sameh bagawi ma Kristus Yesus.

⁴ Here ane matei daya hamen nyalamat aku. Aku batarima kasih ma here – nelang puang ekat aku, kude katuluh ungkup bangsa lain sa puang Yahudi pada batarima kasih ma here.

⁵ Hampe pada tabeku ma ungkup sa bakumpul hang lewu here. Tabe ma hi Epenetus sa nasintaku. Hanye ulun sa palanungkai parisaya ma Kristus hang daerah Asia.

⁶ Tabeku pada ma hi Maria. Hanye haut bagawi anri bahimat tuu ma naun.

⁷ Hampe pada tabeku ma hi Andronikus anri hi Yunias. Here isa suku bangsa anri aku nelang suah masuk panjara sinrah anri aku. Sahuan aku parisaya ma Kristus here haut labis dahulu parisaya. Here tawantar hang penah kawan rasul.

⁸ Tabe ma hi Ampliatus, sa nasintaku daya hanye sinrah anri aku haut mira baya anri Tuhan.

⁹ Hampe hormatku ma hi Urbanus, hengau takam sa bagawi baya takam ma Kristus. Pada hormatku ma hi Stakhis sa nasintaku.

¹⁰ Tabe ma hi Apeles. Kasatiaanni ma Kristus haut tabukti. Tabe pada ma kaluarga Aristobulus,

¹¹ nelang ma hi Herodion. Hanye isa suku bangsa anri aku. Pada tabe ma kawan pulaksanai mira kaparisayaan hawuang kaluarga Narkisus.

¹² Tabeku ma hi Trifena anri hi Trifosa sa bagawi bahimat malayanni Tuhan, nelang ma hi Persis sa nasintaku. Hanye pada haut bagawi bahimat ma Tuhan.

¹³ Tabe ma hi Rufus anri inehni, sa ma aku kala inehku raerai. Hi Rufus hanyeyiru ulun pidian Tuhan sa natawat.

¹⁴ Hampe tabeku ma hi Asinkritus, hi Flegon, hi Hermes, hi Patrobas, hi Hermas anri ma katuluh pulaksanai mira kaparisayaan sa baya anri here.

¹⁵ Tabe ma hi Filologus anri hi Yulia; ma hi Nereus anri pulaksanaini wawei; ma hi Olimpas anri ma katuluh ulun parisaya sa baya anri here.

¹⁶ Ipanabe anri sara mesra yalah pulaksanai Kristen. Katuluh ungkup Kristus ngirim tabe here ma naun katuluh.

Pijumpuhan nasehat

¹⁷ Pulaksanai katuluh! Aku laku tatuu: Wuah naun hati-hati nadap kawan ulun sa ngulah pirawekan nelang mangacau kaparisayaan ulun ma Tuhan. Hal yiru balawanan anri inun sa haut naajar ma naun. Sanawit tenga teka kawan ulun kala yiru.

¹⁸ Daya kawan ulun sa ngulah kala yiru puang bagawi ma Kristus Tuhan takam, malengkan neu nampuas mulur kabahirien atei here raerai. Makai bujukan anri kawan lengan sa marauh, here nipu kawan ulun sa puang karasa ala inun heneng.

¹⁹ Katuluh ulun haut karasa batantu tuu naun satia ma pangajaran neu Kabar Maeh sa teka Alatalla. Nelang aku sanang daya hal yiru neu naun. Aku hamen nampan naun maharati neu kawan hal maeh, kude lunga neu kawan hal sa jahat.

²⁰ Alatalla sa ngami kasanangen ma murunsia, sagar hinang ngimpeh Iblis hang kapit kuasa naun nelang nyanenuh hanye. Mudahan Pulaksanai katuluh saratang naberkat daya Yesus Kristus Tuhan takam!

²¹ Hi Timotius, hengauku, ngirim tabe ma naun. Kala yiru pada hi Lukius, hi Yason anri hi Sosipater, sa isa suku bangsa anri aku.

²² Sa nyurat surat yiti hanyeyiru aku, hi Tertius. Aku ngantuh tabe ipulaksanai ma naun.

²³ Hi Gayus ngirim tabe ma naun. Aku amalem hang lewuni nelang ungkup kami sumbayang hang yiru. Hi Erastus, kapala kauangan tumpuk, ngirim tabe ma naun. Kala yiru pada pulaksanai takam hi Kwartus. (

²⁴ Mudahan Tuhan takam Yesus Kristus mamberkat Pulaksanai katuluh. Amen.)

Panutup Surat

²⁵ Tawat ma Alatalla! Hanye bakuasa ngampi kansing kaparisayaan naun manyu Kabar Maeh teka Alatalla sa nawaraku neu Yesus Kristus. Aku iwara kabar yiru manyu kala inun sa nalalea daya Alatalla; hanyeyiru neu ransana Alatalla sa haut baabad-abad lawahni puang ulun karasa.

²⁶ Kude itati, manyu parentah Alatalla sa kalalawah, ransana yiru haut nalalea nelang nawara ma katantuluh bangsa itetei kawan tulisan kawan nabi, nampan here katantuluhni parisaya nelang ngalut nuu ma Alatalla.

²⁷ Hanye satu-satuni Alatalla, hanye sa panga pintar maharati. Mudahan hanye najujung ambau hampe kalalawahni itetei Yesus Kristus! Amen. Hormat kami Paulus, walah Kristus Yesus.