ROMA 11 - KABAR MAEH MA HANYU JANJI WAU

Pikaeh atei Alatalla ma bangsa Israel

¹ Aku nunti: Inun Alatalla haut ngumpe ulun pidianni raerai? Batantu puang! Aku erang kaulun Israel katurunan Abraham, teka babuhan Benyamin.

² Puang! Alatalla puang ngumpe ulun pidianni sa haut napidini hengka asal. Naun karasa inun sa nasurat hawuang Surat Barasis neu hi Elia, tawuk hanye mangadu sual Israel ma Alatalla. Hi Elia kaeau,

³ “Tuhan, kawan ulun haut munu kawan nabinu nelang ngampi hansur kawan unengan nyarah parapah ma hanyu. Ekat malee aku erang kaulun nelang here hamen munu aku.”

⁴ Inun lengan tuing Alatalla ma hi Elia? Alatalla nuing, “Aku haut ngampuneng pitu ribu kaulun umak diriku. Here huan suah nyambah dewa Baal.”

⁵ Kala yiru pada itati: Naan butit jumalah kawan ulun sa haut napidi daya Alatalla manyu leloni.

⁶ Hanye midi here manyu leloni nelang puang manyu pagawian here. Daya amun pidian Alatalla yiru manyu pagawian murunsia, himat lelo Alatalla yiru puang lagi lelo sa sajati.

⁷ Jari, kalaawe? Ulun Israel puang kaiyuh inun sa naantara here. Sa kaiyuh yiru ekat erang kadimuk sa butit kawan ulun sa haut napidi daya Alatalla. Sa lain katuluhni mape silu nadap herauan Alatalla.

⁸ Daya hawuang Surat Barasis nasurat kala yiti, “Alatalla ngulah atei nelang pikiran here jari babal; nelang hampe wayah yiti matei here puang tau kadinung nelang silu here puang tau karengei.”

⁹ Hi Dawid kaeau pada, “Elahni kawan pesta here jari jabak ma here raerai, nelang jari luwang, unengan here lawu palus hansur!

¹⁰ Elahni paninungan here jari maieng nampan here puang tau kadinung; nelang elahni here jari bongkok palus hampe kalalawahni.”

¹¹ Aku nunti lagi: Tawuk ulun Yahudi lawu, inun yiru jari nampan here hansur? Budas puang! Kude daya here badosa, balalu bangsa lain likan nasalamat, hampe ngulah sabab ulun Yahudi kasiwa anri bangsa lain yiru.

¹² Daya bangsa Yahudi bakahalaen nelang puang manurut kabahumen Alatalla, balalu kawan bangsa lain naberkat daya Alatalla. Duan amun hubungan bangsa Yahudi anri Alatalla jari maeh kamulek; batantu labis hante lagi berkat sa sagar naami daya Alatalla!

Kasalamatan kawan bangsa lain sa puang Yahudi

¹³ Kude itati maeh aku pantane ma kawan pulaksanai sa puang Yahudi! Salawah yiti, yalah rasul ma kawan bangsa sa puang Yahudi, aku tuu hormat ma tugasku.

¹⁴ Aku harap aku tau ngulah atei bangsaku kasiwa, nampan anri lalan yiru aku tau nyalamat meheni teka here.

¹⁵ Gana here puang natarime daya Alatalla, balalu hubungan dunia anri Alatalla jari maeh kamulek; duan amun here natarime daya Alatalla! Batantu yiru sameh kala ulun matei welum kamulek!

¹⁶ Amun erang kahiris rote sa palanungkai haut naami ma Alatalla, yiru baarati katuluh roteni naami ma Alatalla pada. Nelang amun wakat kayu samula wat Alatalla, yiru baarati kawan raanni samula milikni pada.

¹⁷ Meheni teka kawan raan kakau zaitun-hanyeyiru kawan ulun Yahudi-haut natetek. Nelang hang bakas panetekan yiru nacangkok raan kakau zaitun jumpun, hanyeyiru kawan Pulaksanai sa puang Yahudi. Pulaksanai nacangkok hang yiru nampan naun kaingkam katuluh sa maeh teka pamelum rohani kawan ulun Yahudi.

¹⁸ Daya sabab yiru ada naun nganggap bureh here sa haut natetek kala raan yiru. Naun harus kaitung sa naun ekat raan. Nelang puang raan sa ngami kutaen ma wakat, malengkan wakat sa ngami kutaen ma raan.

¹⁹ Kude Pulaksanai sagar kaeau, “Hiai, kude kawan raan yiru natetek nampan aku tau nacangkok hang kakauni!”

²⁰ Yiru samula tuu. Kude here naumpe daya here puang parisaya, kude naun natarime daya naun parisaya. Jari ada naun balalu sakah daya gana yiru; kabalikanni naun harus kaingkam takut.

²¹ Daya amun Alatalla puang kaingkam sayang ngumpe ulun Yahudi sa kala kawan raan asli yiru, ada minda hanye sagar kaingkam sayang ngumpe naun!

²² Jari hang yiti takam kadinung kalaawe kaehni Alatalla nelang kalaawe karasni pada hanye. Hanye batindak karas anri here sa badosa, kude hanye maeh atei anri naun-asal naun tatap welum teka pikaehni. Jaka puang, himat naun pada sagar naumpe.

²³ Nelang neu kawan ulun Yahudi yiru, amun here taduh mape atei puang parisaya, himat here sagar natarime kamulek; daya Alatalla bakuasa umak narime here kamulek.

²⁴ Naun sa puang baasal teka bangsa Yahudi samula kala raan teka kakau zaitun jumpun. Nah, amun naun, sa balawanan anri wangun naun tau nacangkok hang kakau zaitun asli, duan likan kawan ulun Yahudi sa naumpama anri kawan raan kakau zaitun asli yiru. Batantu labis murah lagi ma Alatalla ngampudi here ma kakau zaitun here raerai.

Ahi lelo Alatalla ma katuluh ulun murunsia

²⁵ Pulaksanai katuluh! Aku harap naun ada kaingkam haut karasa ala katantuluhni. Daya naan isa hal sa nakabahumen daya Alatalla, kude sa huan ulun karasa. Nelang aku hamen naun karasa yiru; hanye yiti: Meheni teka ulun Yahudi mape silu, kude pidasaran here yiru patampalus ekat hampe jumalah kawan ulun puang Yahudi sa hawi ma Alatalla haut sukup.

²⁶ Kala yiru katuluh ulun Yahudi sagar nasalamat. Daya hawuang Surat Barasis nasurat kala yiti, “Raja Panyalamat sagar hawi teka Sion; hanye sagar muhut ngumpe katuluh kajahaten teka katurunan Yakub.

²⁷ Aku sagar nyantuhun janji yiti ma here hang tawuk aku ngampun kawan dosa here.”

²⁸ Daya ulun Yahudi puang hamen narime Kabar Maeh teka Alatalla, balalu here jari musuh Alatalla; nelang yiru budas jari kauntungan ma naun katuluh sa puang Yahudi. Kude daya pidian Alatalla, balalu kawan ulun Yahudi yiru tatap nasinta daya Alatalla daya gana datu nini here.

²⁹ Daya amun Alatalla midi ulun nelang mamberkat ulun yiru, Alatalla puang suah narik lagi inun sa haut naulahni.

³⁰ Dahulu hie naun puang ngalut nuu ma Alatalla. Kude itati Alatalla haut nantarang naun haut bebas teka kahalaen, daya kawan ulun Yahudi puang ngalut nuu.

³¹ Kala yiru pada anri kawan ulun Yahudi yiru. Itati here puang ngalut nuu ma Alatalla, nampan naun nalalea bebas teka kahalaen. Kude hanrian here pada sagar nalalea bebas teka kahalaen.

³² Daya Alatalla haut maladar katuluh ulun murunsia nakuasa daya kunuan puang hamen ngalut nuu, nampan hanye kaiyuh nantarang ahi leloni ma here katuluh.

Tawat ma Alatalla

³³ Tuu tamam katatauen Alatalla! Tuu hante kaharatien nelang pangarasaenni! Hie sa kaiyuh nyalidik kawan kaputusanni? Hie sa tau kataru kawan sarani bagawi?

³⁴ Hawuang Surat Barasis nasurat kala yiti, “Hie sa karasa pikiran Tuhan? Hie sa tau ngami nasehat ma hanye?

³⁵ Hie suah ngami ala inun-inun ma Tuhan hampe tau laku walehanni?”

³⁶ Alatalla sa ngulah ala katantuluh. Katantuluhni baasal teka Alatalla nelang ma Alatalla. Tawat Alatalla palus ma kalalawahni! Amen.