ROMA 1 - KABAR MAEH MA HANYU JANJI WAU

Pandahuluan

¹ Pulaksanai katuluh sa muneng hang Roma sa nasinta Alatalla, nelang haut naherau daya Alatalla nampan jari ulun watni. Alatalla haut midi nelang ngangkat aku hulung pakai iwara Kabar Maeh teka Alatalla.

² Kabar Maeh yiru haut najanji daya Alatalla hang jaman sadi itetei kawan nabini nelang haut nasurat hawuang Surat Barasis.

³ Kabar Maeh yiru neu Anak Alatalla, Tuhan takam Yesus Kristus. Manyu murunsia, hanye samula turunan Dawid,

⁴ kude manyu roh hanye bawilah tuu samula Anak Alatalla. Yiru nabukti anri kuasa sa luar biasa itetei kaelanenni teka pampatei.

⁵ Itetei hanye pada Alatalla ngami ma aku ahi lelo jari rasul, nampan aku – neu mahormat Kristus-nganyak kawan ulun teka katuluh bangsa nampan parisaya nelang ngalut nuu.

⁶ Sa namaksud anri katuluh bangsa hanyeyiru naun pada sa muneng hang Roma; naun pada haut naherau nampan jari ulun wat Yesus Kristus.

⁷ Yiru sababni aku nyurat ma naun. Mudah-mudahan Alatalla Ambah takam anri Tuhan Yesus Kristus ngami berkat nelang kasanangen ma naun.

Doa tarima kasih

⁸ Samambatang itetei Yesus Kristus, aku ngantuh tarima kasih ma Alatalla daya gana kawan Pulaksanai katuluh, daya litar dunia haut karengei naun parisaya tatuu ma Kristus.

⁹ Aku saratang ngitung naun amun aku badoa. Alatalla saksini inun sa naeauku yiru tuu. Hanye Alatalla sa nalayanniku makai sagalis atei anri iwara Kabar Maeh neu Anakni.

¹⁰ Aku ilaku tatuu anri Alatalla, mudah-mudahan hanye hamen ngami izin ma aku itati ganta naun.

¹¹ Daya aku sindi tatuu panalu anri naun nampan aku tau mambagi ma naun ahi lelo teka Roh Alatalla neu ngampi kansing naun.

¹² Bahumku hanyeyiru daya takam sameh-sameh haut parisaya ma Yesus Kristus, balalu takam tau ipanangkansing kaparisayaan.

¹³ Pulaksanai katuluh! Aku hamen nampan naun karasa haut gaha aku ngaheng ganta naun, kude saratang naan eleh halanganni. Aku hamen nampan hang penah naun pada pagawianku naan riranni kala pagawianku haut bariran hang penah kawan ulun sa puang Yahudi hang kawan unengan lain.

¹⁴ Daya aku uweng kawajiban anri katuluh bangsa: sa haut kataru adat anri sa huan kataru adat sa bapandidikan atawa sa huan bapandidikan.

¹⁵ Yiru sababni aku hamen tuu iwara Kabar Maeh yiru ma naun sa muneng hang Roma pada.

Kuasa Kabar Maeh yiru

¹⁶ Aku parisaya tatuu neu Kabar Maeh yiru, daya kabar yiru hanyeyiru kakuaten Alatalla neu nyalamat katuluh ulun sa parisaya; samambatang ulun Yahudi nelang bangsa lain pada.

¹⁷ Daya makai Kabar Maeh yiru Alatalla iwara kala awe sarani hubungan murunsia anri Alatalla jari maeh kamulek; sarani hanyeyiru anri parisaya ma Alatalla, teka panukuan hampe pijumpuhanni. Yiru sameh kala sa nasurat hawuang Surat Barasis, “Ulun sa parisaya ma Alatalla balalu hubunganni anri Alatalla jari maeh kamulek, ulun yiru sagar welum!”

Kahalaen murunsia

¹⁸ Teka surga Alatalla nantarang kasangitenni ma katuluh dosa anri kajahaten murunsia, daya kajahaten nahalang murunsia nampan mantaru pangajaran sa bujur neu Alatalla.

¹⁹ Inun sa rasa murunsia neu Alatalla haut bawilah hawuang atei akal murunsia, daya Alatalla haut iwara yiru ma murunsia.

²⁰ Nuku teka Alatalla ngulah dunia, kawan sifat Alatalla sa puang dinung, hanyeyiru kaadaanni yalah Alatalla anri kuasani sa kalalawah, haut tau napantaru daya murunsia itetei katuluh sa haut naulah. Jari murunsia budas puang uweng tujuan nampan ngampi bujur tenga dirini.

²¹ Murunsia kataru Alatalla kude murunsia puang mahormat hanye yalah Alatalla nelang puang pada batarima kasih ma hanye. Kabalikanni murunsia mamikir sa puang bariran; atei here haut jari maieng.

²² Here kaingkam dirini pintar, padahal here budu.

²³ Puang Alatalla sa kalalawah sa nasambah here, malengkan kawan ampatung sa nyarupa mahluk sa tau matei; hanyeyiru murunsia, wurung, eha sa bapee epat, anri eha sa ilansar.

²⁴ Daya sabab yiru Alatalla maladar here nakuasa daya kabahirien atei here neu ngulah sa murun, hampe here nampalus kawan hal sa bere ma sasameh here.

²⁵ Alatalla sa bujur, naganti here makai ala sa palasu. Puang sa nyanyari malengkan sa nasanyari sayiru likan sa nasambah nelang nalayanni daya here. Padahal sa nyanyari yiru sapipatutni natawat nahormat hampe kalalawahni! Amin.

²⁶ Daya murunsia nampalus kala yiru, balalu Alatalla maladar here nampalus kabahumen here sa murun. Kawan wawei here puang uweng aheng lagi ma kawan upu kala sa biasani hang murunsia, malengkan uweng aheng ma sasameh wawei.

²⁷ Upu kala yiru pada; here puang lagi manyu pipatut ngulah hubungan anri wawei, malengkan anri sasameh upu. Kawan upu nampalus gawian sa ngumangan anri sasameh upu, hampe here narime upa manyu kala gawian here sa jahat yiru.

²⁸ Daya sabab yiru murunsia puang kaingkam parlu kataru Alatalla, balalu Alatalla maladar pikiran here rusak, hampe here ngulah kawan hal sa here puang iyuh nampalusni.

²⁹ Atei here penu anri katuluh sa jahat, sa puang bujur; penu anri kasakahen, pikurun anri kamuaren; penu anri kabahumen munu ulun, babur, nipu nelang ngatei. Here rajin maner ulun lain,

³⁰ rajin nangkurun ngaran ulun lain; here sakah nelang kurang ajar, here muar ma Alatalla nelang rajin kakatau ipusu. Here pandai ngantara kawan sara wau pakai nampalus kajahaten. Here nawan ulun matueh;

³¹ here puang hamen nyanrengei ulun lain; here puang satia nelang puang uweng ahi lelo ma sasameh murunsia.

³² Here karasa, manyu parentah Alatalla, ulun sa ngulah kawan katuluhni yiru patut nahukum mati. Biar kala yiru here sika nampalus kawan hal yiru; likan katuju pada ulun lain nampalusni.