PILIPI 2 - KABAR MAEH MA HANYU JANJI WAU

Karandahen anri pihante Kristus

¹ Naun mansing, daya naun ibaya anri Kristus. Nelang naun parariu daya Kristus sinta naun! Naun naayak daya Roh Alatalla, nelang naun pada ipasinta nelang pamalelu pamaahi isa anri sa lain.

² Nah, suba naun tuu-tuu ngampi sanang ateiku makai kawan hal yiti: Welum bulat atei anri sinta sa sameh, anri pikiran sa sameh nelang tujuan sa sameh.

³ Ada ngulah ala inun-inun daya neu ma kaparluan diri raerai, atawa pakai manyumbung diri. Kabalikanni, wuah naun maisasaan anri randah atei nganggap ulun lain labis maeh teka diri naun raerai.

⁴ Dinung kaparluan ulun lain; ada ekat ngunu kaparluan diri raerai.

⁵ Wuah kunuan nelang pikiran naun sameh kala Yesus Kristus:

⁶ Sabujurni hanye sameh anri Alatalla, kude hanye puang kaingkam kaadaanni sa Alatalla yiru harus napartahan dayani.

⁷ Kabalikanni, hanye napas katuluhni balalu hanye sameh kakala erang kaulun walah. Hanye budas sarupa murunsia, nelang nadinung welum sarupa murunsia.

⁸ Hanye nyanrandah diri, nelang welum ngalut nuu Alatalla hampe matei – hanyeyiru matei nabalasangar.

⁹ Daya yiru Alatalla ngenat hanye ambau-ambau, nelang ngami ma hanye kuasa sa labis hante teka kawan kuasa sa lain.

¹⁰ Nampan neu mahormat Yesus, katantuluh ala welum sa hang surga, nelang sa hang ambau tane, nelang sa hang kapit tane, sagar nyambah hanye.

¹¹ Here katantuluhni sagar mangaku Yesus Kristus yiru Tuhan; anri kalayiru Alatalla Ambah natawat.

Nyahaya kala sahaya sa ngampi raai dunia

¹² Daya yiru, Pulaksanai katuluh sa nasinta, kalawangun naun saratang ngalut nuu lenganku hang tawuk aku naan hang penah-penah naun, kalayiru pada likan labis lagi itati hang tawuk ipanawit, wuah naun tatap ngalut nuu aku. Naun haut nasalamat daya Alatalla, wuah saratang ngakali nampan kasanangen naun magin sampuruna. Tampalus yiru anri hormat nelang ngalut nuu Alatalla,

¹³ daya Alatalla raerai sa bagawi hawuang diri naun nampan ngulah naun rela nelang sanggup ngampi sanang atei Alatalla.

¹⁴ Tampalus kawan ala katantuluh puang anri bakutuk atawa basual.

^15-16 Anri kala yiru naun nantarang naun samula kawan anak Alatalla sa puang uweng nawada, sa welum anri tulus nelang bujur hang penah ulun jahat nelang badosa. Nelang hang tawuk naun nampe ma here kabar sa ngami pamelum, ware naun jari sahaya ma here sa nyahaya ngampi raai dunia. Amun naun welum kalayiru, die naan tujuan ma aku nampan kaingkam arai neu naun hang tawuk Yesus Kristus hawi kamulek. Yiru buktini parjuanganku puang kawai tuu eleh nelang pagawianku naan hasilni.

¹⁷ Tau pada aku sagar nawunu nelang iraku jari kala parapah nahalui hang ambau inun sa nasarah naun ma Alatalla yalah siri naun parisaya ma hanye. Amun samula yiru harus kalayiru, aku batarima kasih daya gana hal yiru nelang umba arai baya anri naun.

¹⁸ Kalayiru pada wuah naun kaingkam sanang nelang umba arai baya anri aku.

Hi Timotius anri hi Epafroditus

¹⁹ Aku parisaya anri pangarawahen Tuhan Yesus, aku hinang tuu ngutus hi Timotius nunung naun, nampan aku parariu daya kabar neu naun.

²⁰ Ekat hi Timotius raerai ulun sa mira kunuan pikiran anri aku, nelang tuu-tuu mamikir kasanangen naun.

²¹ Katuluh sa lainni ekat ngurus kaparluan diri here raerai, puang kaparluan Yesus Kristus.

²² Naun raerai haut kadinung buktini hi Timotius tuu bariran. Hanye haut bagawi bahimat baya aku neu nampe Kabar Maeh teka Alatalla. Kami rueh kala anak anri ambah.

²³ Daya sabab yiru, hinang udi aku karasa kalaawe pakaraku die galis, aku sagar ngutus hanye nunung naun.

²⁴ Aku parisaya anri pangarawahen Tuhan, aku raerai pada puang lawah lagi sagar nunung naun.

²⁵ Neu pulaksanai takam hi Epafroditus sa nautus naun pakai ngarawah aku, ingkamku parlu nampan nunyu hanye mulek lagi nunung naun. Hanye haut nengau aku hawuang pagawian nelang parjuanganku.

²⁶ Hanye kasungu tatuu anri Pulaksanai katuluh, nelang hanye balisah daya naun haut karengei kabar hanye sakit.

²⁷ Samula tuu hanye sakit hampe kai matei. Kude Alatalla malelo ma hanye; nelang puang ekat ma hanye, kude ma aku pada, nampan aku ada hampe diwi lagi hanang atei.

²⁸ Yiru sababni magin hante pada kabahumenku nampan nunyu hanye mulek nunung naun, nampan naun arai lagi amun naun panalu anri hanye, nelang ateiku pada balalu marauh.

²⁹ Jari, tarime hanye anri sanang atei yalah erang kaulun pulaksanai sa mira kaparisayaan. Hormat katantuluh ulun sa kala hanye.

³⁰ Neu ma kaparluan pagawian Kristus, hanye ane matei; hanye nyanra hewukni neu ngarawah aku hawuang ngaran naun.