PILIPI 1 - KABAR MAEH MA HANYU JANJI WAU

¹ Kawan pulaksanai ulun wat Alatalla katantuluhni sa muneng hang Pilipi, nelang sa haut ibaya anri Kristus Yesus. Kamulek kawan pulaksanai pamimpin nelang pambantu ungkup! Aku, hi Paulus, baya hi Timotius, kawan walah Kristus Yesus,

² harap mudahan Alatalla Ambah takam anri Tuhan Yesus Kristus ngami berkat nelang kasanangen ma naun.

Doa Paulus ma ungkup

³ Tiap aku kaitung naun, aku ngantuh tarima kasih ma Alatalla.

⁴ Nelang tatiap aku badoa ma Pulaksanai katuluhni, aku badoa anri sanang atei.

⁵ Aku batarima kasih ma Alatalla daya teka anrau palanungkai hampe itati, naun haut ngarawah aku nampe Kabar Maeh teka Alatalla.

⁶ Alatalla raerai sa nuku pagawian sa maeh yiru hang naun, nelang aku harap hanye sagar nampalus pagawian yiru hampe jumpuh hang Anrau Kristus Yesus hawi kamulek.

⁷ Samula pipatutni aku uweng pangingkaman kalayiru nadap naun, daya Pulaksanai katuluhni saratang rite hang ateiku. Kamulek daya naun sameh narime sinrah aku, ahilelo sa naami Alatalla ma aku; hau itati lagi aku hawuang panjara hau hang tawuk aku naan hang luar nampan nyaga nelang malihara Kabar Maeh yiru.

⁸ Alatalla karasa aku kasungu tatuu anri naun anri kaingkam sinta kasih teka Kristus Yesus raerai.

⁹ Aku badoa ma naun: mudahan naun magin sinta ma Alatalla nelang anri sasameh murunsia nelang saratang batambah hawuang pangatahuan sa bujur anri pandangan sa bijaksana.

¹⁰ Anri kalayiru naun tau midi inun sa panga maeh, nelang pamelum naun sagar barasis puang uweng nawada hang anrau Kristus hawi kamulek.

¹¹ Pamelum naun sagar limpar anri pagawian sa tuu-tuu maeh sa ekat tau bahasil daya Yesus Kristus raerai; balalu Alatalla sagar namulia nelang natawat.

Welum ma Kristus

¹² Aku hamen naun karasa, kawan hal sa haut wuah aku likan yiru sangulah magin rama ulun karengei nelang parisaya neu Kabar Maeh yiru.

¹³ Daya gana, katuluh pangawal istana anri kawan ulun lainni hang tumpuk yiti karasa aku napanjara daya aku malayanni Kristus.

¹⁴ Nelang daya gana aku napanjara ngulah rama teka kawan ulun Kristen hang tumpuk yiti magin harap tatuu neu Tuhan, hampe here magin heei iwara pesen Alatalla nelang puang uweng budas kaingkam takut.

¹⁵ Samula naan papire teka here sa iwara Kristus daya rigat muar nelang hamen basual, kude sa lainni iwara Kristus daya uweng tujuan sa maeh.

¹⁶ Kawan ulun yiti ngulah kalayiru daya here sinta Alatalla nelang sinta aku, daya here karasa Alatalla haut nugas aku nampan nantarang Kabar Maeh yiru bujur.

¹⁷ Kude ulun lain iwara neu Kristus anri tujuan sa puang maeh; here iwara neu ma kaparluan pribadi here. Anri kalayiru here harap kaiyuh nambah kahanangenku hawuang panjara.

¹⁸ Kude puang malu! Daya biar kalaawe, hau yiru natampalus anri tujuan sa bungas tatuu hau anri tujuan sa hala, sika Kristus nawara pada; sika aku sanang. Nelang aku sagar tatap kaingkam kalayiru,

¹⁹ daya aku karasa daya gana kawan doa naun nelang daya karawahen teka Roh Yesus Kristus, aku sagar nabebas.

²⁰ Sa nakahamenen nelang naharapku tatuu hanyeyiru nampan ada budas aku hampe gagal hawuang tugasku. Kabalikanni, aku harap nampan tiap ngalut nuu, mambatang tuu itati, aku tatap heei hampe anri sagalis tenga daging amirueku – hau aku welum atawa matei – Kristus namulia.

²¹ Daya ma aku, tujuan pamelumku ekat Kristus! Amun matei baarati untung.

²² Kude amun makai welum hang dunia yiti, aku tau nampalus pagawian sa labis bariran, balalu aku puang karasa saawe sa harus napidiku.

²³ Aku najujut daya rueh masam. Aku sindi tatuu nanan dunia yiti nampan tulak muneng baya Kristus, daya yiru sa panga maeh;

²⁴ kude, neu ma kaparluan naun, samula labis maeh amun aku magun tatap muneng hang dunia.

²⁵ Aku harap neu hal yiru. Yiru sababni aku karasa aku sagar tatap muneng baya Pulaksanai katuluhni, nampan kaiyuh ngarawah naun nampan magin mansing nelang magin sanang hawuang parisaya ma Tuhan.

²⁶ Daya yiru, amun aku die mulek nunung naun, naun sa haut ibaya anri Kristus Yesus sagar wahai tujuan kaingkam arai neu aku.

²⁷ Nah, sa mambatang itati hanyeyiru naun welum manyu kala inun sa nalaku daya Kabar Maeh neu Kristus yiru. Anri kalayiru, hau aku tau panalu anri naun atawa puang, aku sagar karengei naun mansing mira pakat nelang sameh-sameh bajuang ekat ma isa tujuan nelang isa kabahumen; hanyeyiru nampan kaparisayaan sa manyu kala Kabar Maeh teka Alatalla yiru.

²⁸ Wuah naun saratang heei; ada takut nadap kawan musuh naun. Anri kalayiru naun nantarang here himat talau, nelang naun sagar manang, daya Alatalla raerai sa ngami kamanangen ma naun.

²⁹ Daya Alatalla haut ngami ahilelo ma naun puang ekat nampan parisaya ma Kristus, kude pada nampan ngaret kahanangen ma Kristus.

³⁰ Itati naun pada umba baya aku hawuang parjuangan sa sameh; hanyeyiru sa naun suah kadinung aku haut bajuang dahulu hie, nelang sa magun tatap naparjuangku hampe itati, kala sa rengei naun itati.