MATIUS 23 - KABAR MAEH MA HANYU JANJI WAU

Paringatan nampan hati-hati tehadap kawan guru agama anri kawan ulun Parisi

¹ Balalu Yesus kaeau ma ulun rama anri kawan ulun sa umba hanye,

² “Kawan guru agama anri kawan ulun Parisi kaiyuh kakuasaan neu manafsir hukum Moses.

³ Daya yiru itati alut katuluh sa naparentah daya here. Kude ada ngulah inun sa naulah daya here, daya here puang nampalus inun sa naajar here.

⁴ Here laku kawan hal sa mahadin nelang ngami kawan paraturan sa maweat, kude sunah butit here puang ngarawah ulun nampalusni.

⁵ Katuluh sa naulah daya here ekat nampan nadinung daya ulun. Here anri sangaja makai kain sumbayang sa hante nelang ngampambau rumbai jubah here!

⁶ Here sindi unengan sa pangakaehni hang unengan pesta, nelang karusi sa istimewa hang lewu sumbayang.

⁷ Here sanang nahormat daya ulun hang pasar nelang naantuh Bapa ‘Guru’.

⁸ Kude naun ada budas sindi naantuh Bapa ‘Guru’, daya Gurunu ekat naan isa nelang naun katuluh uras ipulaksanai.

⁹ Nelang ada naun ngantuh sunah erang kaulun hang dunia yiti ‘Ambah’, daya Ambahnu ekat isa, hanyeyiru Ambah sa hang surga.

¹⁰ Nelang ada naun hamen naantuh ‘Pamimpin’, daya Pamimpinnu ekat isa hanyeyiru Raja Panyalamat sa najanji daya Alatalla.

¹¹ Ulun sa panga tamam hang penah naun harus jari palayannu.

¹² Ulun sa ngampambau dirini sagar nasanrandah, nelang sa nyanrandah dirini sagar naampambau.”

Yesus ngahalaen sifat sa bapura-pura

¹³ “Silaka naun kawan guru agama anri kawan ulun Parisi! Naun sa tukang bapura-pura. Naun nahalang ulun sa hamen jari ulun wat Alatalla. Naun raerai puang hamen jari ulun wat Alatalla, sukat ulun lain sa hamen, here natahalang naun. [

¹⁴ Silaka naun kawan guru agama anri kawan ulun Parisi: Naun ulun sa tukang bapura-pura. Naun nipu ngakal kawan wawei walu nelang hanrampas lewuni nelang pakai nutup kajahaten yiru naun badoa ambau tatuu. Daya sabab yiru hukuman naun die maweat!]

¹⁵ Silaka naun kawan guru agama anri kawan ulun Parisi! Naun ulun sa tukang bapura-pura! Naun lawit tulak nyabarang laut, nelang nandang litar tane ekat pakai ngulah erang kaulun masuk agamanu. Kude dami ulun yiru masuk agamanu, naun ngulah hanye sagaran ma naraka sa rueh lipet diwi jahat teka naun raerai!

¹⁶ Silaka naun kawan pamimpin sa pehe! Naun ngajar kalayiti, ‘Amun ulun basumpah anri ngantuh Lewu Tuhan, ulun yiru puang taikat hang sumpahni; kude amun hanye basumpah anri ngantuh amas hang Lewu Tuhan, hanye taikat hang sumpahni yiru.’

¹⁷ Naun kawan ulun budu sa pehe! Saawe sa labis mambatang amasni, atawa Lewu Tuhan sa ngulah amas yiru barasis?

¹⁸ Naun pada ngajar kalayiti, ‘Amun erang kaulun basumpah anri ngantuh mezbah, ulun yiru puang taikat anri sumpahni; kude amun hanye basumpah anri ngantuh parapah hang ambau mezbah yiru, hanye taikat anri sumpahni yiru.’

¹⁹ Tuu leha peheni naun! Saawe sa labis mambatang? Parapahni atawa Mezbah sa ngulah parapah yiru barasis?

²⁰ Daya gana yiru, amun erang kaulun basumpah anri ngantuh mezbah, yiru baarati hanye basumpah anri ngantuh mezbah, nelang katuluh parapah sa uweng hang ambauni.

²¹ Kamulek amun erang kaulun basumpah anri ngantuh Lewu Tuhan yiru baarati hanye basumpah anri ngantuh Lewu Tuhan yiru nelang ngantuh Alatalla sa muneng hang yiru.

²² Amun erang kaulun basumpah anri ngantuh surga, yiru baarati hanye basumpah ngantuh padudusan Tuhan, anri ngantuh Alatalla sa maharung hang ambau padudusan yiru.

²³ Silaka naun kawan guru agama anri kawan ulun Parisi! Naun ulun sa tukang bapura-pura. Kawan rarampah kala salasih, adas manis, anri jintan-katumbar pada, ami naun sepersapuluhni ma Tuhan. Kude kawan hal sa mambatang hawuang kawan hukum agama, umpamani: Kaadilan, lelo ahi, nelang kasatiaan, naun puang maradulini. Padahal sa yiru sa pipatutni natampalus naun, anri puang nangkurang sa lainni pada.

²⁴ Naun kawan pamimpin sa pehe! Lalet hang ranu uutennu natapis naun, kude unta natelen naun!

²⁵ Silaka naun kawan guru agama anri kawan ulun Parisi! Naun ulun sa tukang bapura-pura! Kawan piring mangkok nawui naun barasis hang luarni, kude hawuangni tuu-tuu bere daya kawan hal sa iyuh naun makai kakarasen nelang kasarakahen.

²⁶ Parisi sa pehe! Wui dahulu hampe barasis hawuang kawan piring mangkoknu, nampan hang luarni pada barasis!

²⁷ Silaka naun kawan guru agama anri kawan ulun Parisi! Naun ulun sa tukang bapura-pura! Naun kala pasaran sabasapu mahilak; hang luarni nadinung bungas, kude hawuangni penu anri taulang nelang katuluhni uras buruk.

²⁸ Kalayiru pada naun. Hang luar naun nadinung daya ulun maeh; kude hawuangni, naun penu anri kapalasuan nelang kawan palangaran.”

Yesus nujum neu hukuman ma kawan guru agama anri kawan ulun Parisi

²⁹ “Silaka naun kawan guru agama anri kawan ulun Parisi! Naun ulun sa tukang bapura-pura! Naun ngulah kawan pasaran sa bungas ma kawan nabi, nelang mahias kawan tugu paringatan ulun sa pamelumni maeh.

³⁰ Naun kaeau, ‘Atikala kami welum hang jaman datu nini kami sadi, kami puang sagar umba here munu kawan nabi.’

³¹ Jari naun raerai mangaku sa naun samula katurunan kawan ulun sa munu kawan nabi!

³² Amun kalayiru, tampalus nelang sanyumpuh kawan dosa sa haut natuku daya datu nini naun yiru!

³³ Naun jahat nelang katurunan ulun jahat! Puang maka naun kaiyuh nyalamat tenga diri naun teka hukuman hang naraka?

³⁴ Rengei maeh-maeh: Aku sagar ngirim ma naun kawan nabi, kawan ulun pintar maharati, anri kawan guru; mehe teka here yiru sagar nawunu daya naun, meheni lagi sagar nabalasangar daya naun. Naan pada sa sagar nakahanangen daya naun hawuang kawan lewu sumbayang, nelang nasasah daya naun teka isa tumpuk ma tumpuk sa lain.

³⁵ Daya gana yiru, naun sagar nahukum daya gana katuluh ulun sa haut nawunu naun uras puang uweng kahalaen – nuku hengka munu hi Habel sa puang uweng kahalaen, hampe munu hi Zakaria anak Berekia, sa nawunu naun hang helang lewu Tuhan anri Mezbah.

³⁶ Parisayaleh: ala katuluhni yiru sagar natanggung daya kawan ulun jaman yiti!”

Yesus malelo anri Yerusalem

³⁷ “Yerusalem, Yerusalem! Kawan nabi nawununu. Kawan saruhan Alatalla napedaknu makai watu hampe matei. Haut pire kali aku hamen maluk katuluh panduduknu kala manu paunan nyalindung kawan anakni hang kapit elatni, kude hanyu puang hamen!

³⁸ Daya gana yiru Alatalla puang lagi nyinrah hanyu.

³⁹ Wuah hanyu karasa: Mulai teka itati hanyu puang sagar kadinung aku lagi hampe hanyu kaeau, ‘Naberkat hanye sa hawi hawuang ngaran Tuhan.’ ”