MATIUS 15 - KABAR MAEH MA HANYU JANJI WAU

Adat istiadat datu nini

¹ Erang kalumpuk ulun Parisi anri papire guru agama hengka Yerusalem hawi nunung Yesus. Here nunti ma hanye,

² “Wuah inun kawan ulun sa umba hanyu malangar adat istiadat datu nini takam? Tawuk kai kuman, here puang dahulu mui tangan manyu hadat!”

³ Yesus nuing, “Wuah inun pada naun malangar parentah Alatalla, ekat daya hamen ngalut adat istiadat datu nini naun?

⁴ Daya Alatalla kaeau, ‘Hormat ambah nelang inehnu,’ kamulek ‘Hie-hie sa ngeau nangkurun ineh-ambahni, harus nahukum mati.’

⁵ Kude naun ngajar: amun ulun kaeau anri ulun matuehni, ‘Inun sa sagar naamiku ma hi ambah anri hi ineh, haut nasarahku ma Alatalla,’

⁶ maka ulun yiru puang lagi nawajib neu mahormat ulun matuehni. Jari, daya adat istiadat datu nini naun, naun ngampahe lengan Alatalla.

⁷ Naun ulun sa bapura-pura! Tanggar tuu inun sa natujum daya Yesaya neu naun, kalayiti,

⁸ ‘Kalayiti eau Alatalla: Kawan ulun yiru ekat nyambah aku makai wiwi-mulut, kude atei here lawit teka aku.

⁹ Mamus here nyambah aku, daya aturan murunsia sa naajar here, kakala yiru aturan teka aku.’ ”

Kawan hal sa ngulah ulun najis

¹⁰ Udi yiru Yesus nerau papire kaulun palus kaeau ma here, “Rengei nampan naun kataru!”

¹¹ Sa masuk mawuang wawa puang maka ngulah ulun yiru najis; ekat sa kaluar teka wawani, sa yiru ngulah hanye najis.”

¹² Balalu kawan ulun sa umba Yesus hawi palus kaeau anri hanye, “Inun hanyu karasa kawan ulun Parisi yiru tasinggung tawuk karengei hanyu kaeau kalayiru?”

¹³ Yesus nuing, “Kawan amulean sa puang naamule daya Ambahku hang surga sagar nabunat.

¹⁴ Puang usah nakarasa kawan ulun Parisi yiru. Here yiru kawan pamimpin sa pehe: nelang amun ulun pehe mamimpin ulun pehe, kararuehni sagar lawu mawuang parit.”

¹⁵ Hi Petrus kaeau, “Guru awat manarang arati rarapisan yiru ma kami!”

¹⁶ Yesus nuing, “Inun naun pada huan kataru?

¹⁷ Inun naun puang kataru sa masuk ma wawa palus ma wuang wuntung, udi yiru kaluar kamulek?

¹⁸ Kude sa kaluar teka wawa, sa asalni teka atei maka yiru sa ngulah ulun najis.

¹⁹ Daya teka wuang atei hulet kawan pikiran jahat, sa ngulah ulun tau munu ulun, ibela, ngulah ala murun, ngalat, ngami kasaksian palasu nelang muntaka.

²⁰ Kawan hal yiru sa ngulah ulun najis, puang daya kuman pakai tangan sa puang nawui.

Iman erang kaulun wawei Kanaan

²¹ Udi yiru Yesus nanan paunengan yiru palus tulak ma daerah rite tumpuk Tirus anri Sidon.

²² Erang kaulun wawei Kanaan teka daerah yiru, hawi nunung Yesus nelang nanterau kakune, “Anak Dawid, palelo aku! Anakku wawei naasuk roh jahat. Kaadaani maham tatuu.”

²³ Yesus budas puang nuing lengan wawei yiru. Balalu kawan ulun sa umba Yesus hawi nunung hanye nelang ilaku, “Guru, huyu wawei yiru tulak. Hanye ekat ngulah ridu hang wuku takam!”

²⁴ Yesus nuing, “Aku nahuyu lepuh nunung bangsa Israel, sa mambatang nunung here sa tawang.”

²⁵ Wawei yiru hawi balalu ileku ulu alep hang hadapan Yesus nelang kaeau, “Karawah aku, Tuan.”

²⁶ Yesus nuing, “Puang patut ngalap kutaen kawan iya palus nawutni ma kawan antahu.”

²⁷ “Tuu, tuan,” tuing wawei yiru, “Kude antahu sika tau nguta kawan purak anakuta sa lawu teka meja tuani.”

²⁸ Balalu Yesus kaeau ma hanye, “Ibu, tuu hante imannu! Ware jari manyu sa nakabahumennu!” Tawuk yiru pada anak wawei yiru balalu ware.

Yesus nyamare rama ulun sakit

²⁹ Yesus nanan paunengan yiru, balalu takia hang iring Danau Galilea. Udi yiru hanye mambai ma isa bukit balalu maharung hang yaru.

³⁰ Rama ulun hawi nunung hanye nginsing kawan ulun kepa, ulun pehe, ulun lumpuh, ulun muna, nelang rama lagi ulun sakit sa lain. Here ngelah kawan ulun yiru hang hadapan Yesus, palus hanye nyamare kawan ulun yiru.

³¹ Ulun rama sa naan hang yiru bangat wauh dami here kadinung ulun muna tau bapaner, ulun kepa ware, ulun lumpuh takia, nelang ulun pehe kadinung. Balalu here nawat nante Alatalla bangsa Israel.

Yesus ngami kutaen ma epat ribu kaulun

³² Udi yiru Yesus nerau kawan ulun sa umba hanye balalu kaeau, “Aku bangat palelo anri ulun rama yiti. Haut telu anrau lawahni here baya aku, nelang itati here puang uweng anakuta. Aku puang hamen maladar here mudi nelang wuntung kajuju, die here hinut hang lalan.”

³³ Balalu kawan ulun sa umba Yesus nunti ma hanye, “Hang awe takam tau kahaba anakuta hang daerah suni yiti ma ulun sa kala yiti ramani?”

³⁴ “Pire naan rote hang naun?” tunti Yesus ma here. “Pitu,” tuing here, “anri kenah rumis papire kaukui.”

³⁵ Balalu Yesus nunyu ulun rama yiru maharung hang tane.

³⁶ Udi yiru hanye ngalap pitu katipak rote yiru anri kenahni, udi hie hanye ngantuh tarima kasih ma Alatalla. Balalu hanye miah rote anri kenah yiru makai tanganni, palus ngami ma kawan ulun sa umba hanye. Balalu here mambagini ma ulun rama yiru.

³⁷ Katuluh ulun yiru ikuta hampe wising. Udi yiru kawan ulun sa umba Yesus ngumpul kawan kalabihan anakuta yiru. Katuluhni naan pitu tampawan penu.

³⁸ Jumalah kawan ulun upu sa ikuta tawuk yiru naan epat ribu kaulun, huan tamasuk nareken kawan wawei baya kawan iya.

³⁹ Udi yiru Yesus nunyu ulun rama yiru mudi. Hanye raerai sungkat ma jukung palus tulak ma daerah Magadan.