MATIUS 11 - KABAR MAEH MA HANYU JANJI WAU

Utusan Yohanes Pambaptis

¹ Udi Yesus ngami patitah ma kadua walas ulun sa umba hanye, hanye nanan paunengan yiru. Hanye tulak ngajar nelang iwara pesen teka Alatalla hang kawan tumpuk sa rite hang yiru.

² Hi Yohanes Pambaptis sa rahat napanjara karengei neu pagawian Kristus. Balalu hanye nunyu papire kaulun ulun sa umba hanye tulak nunung Yesus lepuh nunti,

³ “Inun hanyu yiti ulun sa sagar hawi manyu janji Alatalla, atawa kami harus nganrei ulun lain?”

⁴ Yesus nuing, “Hulu mulek nunung hi Yohanes nelang wara inun sa rengei nelang dinung naun:

⁵ ulun pehe kadinung, ulun lumpuh takia, ulun kadanen ware, ulun marengen karengei, ulun matei welum kamulek, nelang Kabar Maeh teka Alatalla nawara ma kawan ulun paua.

⁶ Tuu sanang marauh ulun sa puang uweng tujuan nampik aku!”

⁷ Udi kawan utusan Yohanes yiru tulak, Yesus nuku pantane ma ulun rama neu hi Yohanes, eauni, “Naun tulak ma padang gurun lepuh ninung inun? Erang kaputut rikut sa natampuh riwut?

⁸ Naun tulak lepuh ninung inun? Erang kaulun sa bapakaian maeh? Kawan ulun sa bapakaian kala yiru muneng hang istana!

⁹ Jari wuah inun naun tulak ma padang gurun? Lepuh ninung erang kaulun nabi? Tuu, diwi likan teka erang kaulun nabi.

¹⁰ Daya hi Yohanes yiru sa nabahum hawuang ayat Surat Barasis kalayiti, ‘Hanye yiti utusanku, eau Alatalla, aku ngutus hanye dahulu teka hanyu nampan hanye nawah lalan ma hanyu.’

¹¹ Ingat! Hang dunia yiti puang suah uweng ulun sa diwi hante teka hi Yohanes Pambaptis. Kude biar kala yiru, ulun sa panga rumis hengka ulun pidian Alatalla diwi hante teka hi Yohanes Pambaptis.

¹² Nuku teka hi Yohanes iwara kabarni hampe hang tawuk yiti, ulun pidian Alatalla nalawan daya kawan ulun sa ngakali hamen bakuasa hang ambau here anri kakarasen.

¹³ Hampe pihawian Yohanes, katuluh hukum Moses anri ajaran kawan nabi nujum neu kawan hal sa harus kajadian.

¹⁴ Amun naun hamen parisaya, hi Yohanes yiru hi Elia, sa pihawianni haut natujum.

¹⁵ Amun uweng silu, ware sanrengei!

¹⁶ Makai inun aku harus ngintur kawan ulun jaman yiti? Here kala kawan iya sa maharung hang pasar. Erang kalumpuk nanterau ma sa lain,

¹⁷ ‘Kami ngampeau lagu kaaraien ma naun, kude naun puang hakun nanrik! Kami manyanyi lagu hanang atei, kude naun puang hakun nungkau!’

¹⁸ Hi Yohanes hawi – hanye puasa nelang puang nguut anggur; balalu kawan ulun kaeau, ‘Hanye karasukan setan!’

¹⁹ Itati Anak Murunsia, hawi – hanye kuman welum; balalu kawan ulun kaeau, ‘Dinung ulun yiru! Mauruh, ulun pamahamui, hengau tukang tagis pajak nelang hengau ulun badosa.’ Biar kala yiru, kabijaksanaan Alatalla nabukti anri kawan hasil pagawianni.”

Kawan tumpuk sa puang parisaya

²⁰ Balalu Yesus mulai mada ngahalaen kawan tumpuk, hang awe hanye panga gaha ngulah tanda kawauhen. Daya kawan ulun hang kawan tumpuk yiru puang hamen batobat teka kawan dosa here.

²¹ “Silaka naun, Korazim! Silaka pada naun, Betsaida! Atikalani kawan tanda kawauhen sa naulah hang penah-penah naun haut naulah hang Tirus anri Sidon, himat kawan ulun hang yiru haut lawah batobat teka kawan dosa here nelang ipakaian kala ulun mahanang atai sinrah ngelah walenun hang ambau ulu here.

²² Itung hang Anrau Kiamat, kawan ulun Tirus anri Sidon sagar labis murah naampun daya Alatalla teka naun!

²³ Nelang hanyu Kapernaum! Inun hanyu sagar nainrik hampe ma surga? Puang! Likan hanyu sagar naumpe ma naraka! Atikalani kawan tanda kawauhen sa naulah hang penah-penah naun yiru haut naulah hang Sodom, himat Sodom yiru magun naan hampe wayah itati!

²⁴ Ingat, hang Anrau Kiamat, ulun Sodom sagar labis murah naampun daya Alatalla teka naun!”

Hawi tunung aku

²⁵ Hang tawuk yiru Yesus badoa, “Ambah, Tuhan sa nguasa langit anri tane! Aku ngantuh tarima kasih ma hanyu daya katuluhni yiru naidimnu teka kawan ulun pandai nelang bailmu, kude hanyu nantarangni ma kawan ulun sa puang tapalajar.

²⁶ Yiru sa ngampi sanang atei Ambah.”

²⁷ Balalu Yesus kaeau, “Ala katantuluh haut nasarah Ambah ma aku. Puang sunah erang kaulun kataru Anak, diluar Ambah. Puang uweng pada kataru Ambah diluar Anak, nelang kawan ulun sa ma hanye Anak yiru memperkenal Ambah.

²⁸ Hawi tunung aku naun katuluh sa uyuh nelang kaingkam weatni umbean; aku sagar ngampi sigar naun.

²⁹ Tampalus parentahku nelang paajar teka aku. Daya aku yiti maeh matau nelang randah atei, balalu naun sagar kaingkam sigar.

³⁰ Daya kawan parentahku ngampi sanang, nelang umbean sa natupangku ma naun madinei.”