LUKAS 9 - KABAR MAEH MA HANYU JANJI WAU

Yesus ngutus dua walas kaulun ulun sa umba hanye

¹ Yesus nerau kadua walas kaulun ulun sa umba hanye, balalu ngami ma here kuasa neu ngusir roh jahat nelang nyamare kawan panyakit.

² Udi yiru hanye nunyu here tulak nyamare ulun sakit nelang iwara kabar neu kala awe Alatalla marentah yalah Raja.

³ Eau Yesus ma here, “Ada nginsing inun heneng hang pakiaannu.” “Ada nginsing tungkeh, atawa kambut sadakah, atawa anakuta, atawa duit, atawa rueh kalamar pakaian.

⁴ Hang awe naun natarime, uneng hang yiru hampe naun nanan tumpuk yiru.

⁵ Nelang hang awe naun puang natarime, tawuk naun nanan tumpuk yiru, kebas habu teka palat pee naun, yalah paringatan ma here.”

⁶ Kawan ulun sa umba Yesus tulak, balalu takia ma kawan desa neu iwara Kabar Maeh yiru nelang nyamare ulun sakit hang awe-awe.

Hi Herodes bingung

⁷ Tawuk hi Herodes, sa marentah hang Galilea, karengei neu katuluh kajadian yiru, hanye bingung. Daya naan sa kaeau himat hi Yohanes Pambaptis haut welum kamulek.

⁸ Naan pada sa kaeau himat hi Elia haut hawi lagi. Ulun lain pada kaeau himat erang kaulun nabi teka kawan nabi sadi hurap haut welum kamulek.

⁹ Hi Herodes kaeau, “Aku haut nunyu ulun mumpung ulu Yohanes. Kude ulun yiti, hie satuuni hanye? Naan wahai masam sa haut rengeiku neu hanye.” Balalu hi Herodes ngakali nampan tau ninung Yesus.

Yesus nyarungan dime ribu kaulun

¹⁰ Kawan rasul Yesus hawi mulek palus nyarita ma Yesus katuluh sa haut naulah daya here. Yesus balalu nginsing here, balalu here sinrah tulak ngaraerai ma tumpuk Betsaida.

¹¹ Kude tawuk kawan ulun karasa neu hal yiru, here naharak Yesus. Hanye narime here, balalu bapaner ma here neu kala awe Alatalla marentah yalah Raja. Nelang hanye pada nyamare kawan ulun sakit sa naan hang penah here.

¹² Tawuk mate anrau mulai leteng, kadua walas ulun sa umba Yesus hawi nunung hanye balalu kaeau, “Guru, unengan yiti suni. Labis maeh amun hanyu nunyu kawan ulun yiti tulak, nampan here tau ngantilau anakuta nelang unengan amalem hang kawan tumpuk anri kawan desa hang sakitar yiti.”

¹³ Kude Yesus nuing, “Naun sa ngami ma here kutaen.” Kawan ulun sa umba Yesus kaeau, “Kami ekat naan dime katipak rote anri rueh kaukui kenah. Inun kami harus tulak lepuh midi anakuta umak katuluh ulun yiti?”

¹⁴ (Naan leu dime ribu kaulun upu hang yiru.) Yesus kaeau ma kawan ulun sa umba hanye, “Huyu kawan ulun yiti maharung bakalompok, leu dimempulu kaulun erang kalompok.”

¹⁵ Kawan ulun sa umba Yesus yiru nampalus inun sa naeau Yesus ma here.

¹⁶ Balalu Yesus ngalap dime katipak rote anri rueh kaukui kenah yiru, udi yiru hanye mihangut ma langit ngantuh tarima kasih ma Alatalla. Udi yiru hanye miah rote anri kenah yiru makai tanganni balalu ngamini ma kawan ulun sa umba hanye nampan mambagini ma ulun rama yiru.

¹⁷ Here katuluhni ikuta hampe wising. Balalu kawan ulun sa umba Yesus ngumpul kalabihan kutaen yiru wahaini naan dua walas tampawan.

Pangakuan Petrus neu Yesus

¹⁸ Hang hinra anrau, tawuk Yesus rahat badoa ngaraerai, kawan ulun sa umba hanye hawi nunung hanye. Yesus nunti ma here, “Manurut eau ulun, aku yiti hie?”

¹⁹ Here nuing, “Naan sa kaeau hi Yohanes Pambaptis. Naan pada sa kaeau hi Elia, sa lain lagi kaeau erang kaulun teka kawan nabi jaman sadi sa haut welum kamulek.”

²⁰ “Kude manurut naun, aku yiti hie?” tunti Yesus. Hi Petrus nuing, “Guru hanyeyiru Raja Panyalamat sa najanji Alatalla.”

Yesus maner neu kahanangen anri pampateini

²¹ Balalu Yesus kaeau ma kawan ulun sa umba hanye, “Ada budas iwara hal yiru ma hie-hie.”

²² Yesus kaeau pada, “Anak Murunsia samula harus wahai nanggung kahanangen nelang nalawan daya kawan pamimpin anri kawan imam kapala, nelang kawan guru agama. Hanye sagar nawunu, kude hang anrau katelu sagar naele welum kamulek.”

²³ Udi yiru Yesus kaeau ma ulun katuluh sa naan hang yiru, “Ulun sa hamen umba aku, hanye harus puang ngitung kapantinganni raerai, ngantung balasangarni ungkan anrau, nelang saratang umba aku.

²⁴ Daya ulun sa hamen mempertahan pamelumni, sagar kawawaian pamelumni. Kude ulun sa nyarah pamelumni neu kapantinganku, sagar nyalamatni.

²⁵ Inun untungni ma hie-hie ulun amun katuluh dunia yiti jari milikni, kude hanye nanrusak nelang kawawaian pamelumni?

²⁶ Amun ulun umangan mangaku aku anri pangajaranku, Anak Murunsia pada sagar umangan mangaku ulun yiru hang tawuk hanye hawi hanrian anrau anri kuasani nelang anri kuasa Ambah nelang kuasa kawan malekat sa barasis!

²⁷ Wuah naun karasa: teka penah naun hang yiti naan sa puang sagar matei kapihuan hanye kadinung Alatalla marentah.”

Yesus namulia

²⁸ Leu erang Minggu udi Yesus ngajar kawan hal yiru, hanye nginsing hi Petrus, hi Yohanes, anri hi Yakobus ma ambau isa gunung nampan badoa.

²⁹ Parahatan Yesus badoa hang yiru, uruwawani baubah nelang pakaianni jari mahilak mamilau.

^30-31 Salenga rueh kaulun, hanyeyiru hi Moses anri hi Elia nantarang tenga anri sahaya teka surga. Here paner anri Yesus neu pampatei sa puang lawah lagi sagar najalanini hang Yerusalem.

³² Hang tawuk yiru hi Petrus anri kawan hengauni saanre, kude salenga kaelan, balalu kadinung Yesus nyahaya nelang rueh kaulun yiru minri baya hanye.

³³ Hang tawuk karueh kaulun yiru hamen nanan Yesus, hi Petrus kaeau ma Yesus, “Guru, marauh tuu takam hang yiti. Ware kami ngapinri telu pondok: isa ma Tuan, isa ma hi Moses, isa lagi ma hi Elia.” (Hi Petrus kaeau kala yiru anri puang kataru inun sa naeauni.)

³⁴ Parahatan hi Petrus magun bapaner, hawi isa awan, palus nyalehup here, hampe here takut.

³⁵ Udi yiru teka awan yiru naan rengei lengan sa kaeau, “Iti Anakku sa napidiku ware naun nyanrengei hanye!”

³⁶ Udi lengan yiru haut suni, here kadinung Yesus ngaraerai hang yiru. Kawan ulun sa umba Yesus puang maharek neu katuluhni yiru, nelang puang iwara mahie-hie inun sa haut dinung here.

Yesus nyamare iya sa karasukan roh jahat

³⁷ Hang anrau kauni, Yesus baya katelu kaulun ulun sa umba hanye minau teka gunung yiru, balalu ulun rama hawi nunung Yesus.

³⁸ Erang kaulun upu teka penah ulun rama yiru kaeau anri lengan mehet, “Guru, karawah ninung anakku – ekat hanye erang kaulun anakku!

³⁹ Amun roh jahat nyarang hanye, hanye nyalenga nantiak palus tengani gajir-gajar hampe mulutni iwure. Roh yiru palus manyiksa hanye nelang puang hamen kaluar teka hanye!

⁴⁰ Aku haut laku kawan ulun sa umba hanyu ngusir roh yiru, kude here puang tau.”

⁴¹ Yesus nuing, “Tuu leha naun yiti! Naun tuu-tuu kawan ulun sa nyaleweng nelang puang parisaya! Hampe awe aku harus muneng baya naun nelang basabar anri naun? Insing iyanu yiru ma yati!”

⁴² Parahatan iya yiru takia nuju Yesus, roh jahat yiru manting hanye palus ngulah tengani gajir-gajar. Kude Yesus marentah roh jahat yiru kaluar palus iya yiru balalu ware. Balalu iya yiru nasarah mulek ma ambahni.

⁴³ Katuluh ulun wauh kadinung kuasa Alatalla kala yiru hante. Hang tawuk ulun rama magun sangang wauh kadinung katuluh sa naulahni, Yesus kaeau ma kawan ulun sa umba hanye,

Yesus maner lagi neu pampateini

⁴⁴ “Pantaru mamaeh nelang ada puang kaitung kawan lenganku yiti: Anak Murunsia sagar nasarah ma kuasa murunsia.”

⁴⁵ Kude kawan ulun sa umba Yesus yiru puang kataru sa naeauni yiru. Hal yiru narasia ma here nampan here puang kataru. Kude here takut nunti hal yiru ma hanye.

Hie sa panga tamam?

⁴⁶ Maka kawan ulun sa umba Yesus rawek basual neu hie teka here sa panga tamam.

⁴⁷ Yesus karasa pikiran here, daya yiru hanye ngalap erang kaulun iya rumis palus ngandak iya yiru minri hang higa hanye.

⁴⁸ Balalu hanye kaeau ma kawan ulun sa umba hanye, “Ulun sa narime iya yiti daya gana aku, baarati narime aku. Nelang ulun sa narime aku, narime hanye sa ngutus aku. Daya ulun sa panga rumis hang penah naun, hanyeyiru sa panga tamam!”

Ulun sa puang nawan naun, umba teka naun

⁴⁹ Hi Yohanes kaeau, “Tuan, kami kadinung ulun ngusir setan makai ngaran Tuan, kude kami nguring hanye, daya hanye puang teka takam.”

⁵⁰ “Ada nguring hanye,” eau Yesus ma hi Yohanes anri kawan ulun sa umba Yesus sa lainni, “daya ulun sa puang nawan naun, baarati umba teka naun.”

Isa tumpuk hang Samaria puang hamen narime Yesus

⁵¹ Tawuk haut rite wayahni Yesus naenat ma surga, hanye nukas nampan tulak ma Yerusalem.

⁵² Balalu hanye nunyu ulun tulak badahulu teka hanye. Kawan ulun sa nahuyuni yiru tulak, balalu masuk ma isa tumpuk hang Samaria nampan nyadia ala katuluh ma Yesus.

⁵³ Kude kawan ulun hang tumpuk yiru puang hamen narime Yesus, daya tujuan pakiaanni ma Yerusalem.

⁵⁴ Balalu tawuk kawan ulun sa umba Yesus, hanyeyiru hi Yakobus anri hi Yohanes karasa neu hal yiru, here kaeau, “Tuhan, inun Tuhan hamen, kami laku apui minau teka langit pakai ngabinasa kawan ulun yiti?”

⁵⁵ Yesus ikulik, balalu nyangit here.

⁵⁶ Udi yiru here tulak ma tumpuk sa lain.

Kawan ulun sa hamen umba Yesus

⁵⁷ Parahatan Yesus anri kawan ulun sa umba hanye nampalus pakiaan here, naan ulun kaeau ma Yesus, “Guru, aku hamen umba hanyu ma awe hanyu tulak!”

⁵⁸ Yesus nuing, “Sarigala naan liang, nelang wurung naan hanai, kude Anak Murunsia puang uweng unenganni mangkading.”

⁵⁹ Balalu Yesus kaeau ma ulun lain, “Hayu umba aku.” Kude ulun yiru kaeau, “Guru, aku laku mudi duluni lepuh masar ambahku.”

⁶⁰ Yesus nuing, “Elahni ulun matei masar ulun mateini raerai. Kude hanyu, hulu tulak nelang wara kabar neu Alatalla haut marentah.”

⁶¹ Naan pada erang kaulun sa lain kaeau, “Guru, aku hamen umba hanyu, kude aku laku mudi duluni lepuh iwara ma kaluargaku.”

⁶² Yesus kaeau ma ulun yiru, “Ulun sa haut nuku maluku, balalu ikulik ma wading punggung, puang patut jari ulun pidian wat Alatalla.”