LUKAS 8 - KABAR MAEH MA HANYU JANJI WAU

Kawan wawei sa ngarawah Yesus

¹ Puang lawah udi yiru, Yesus tulak ma kawan tumpuk anri kawan desa lepuh iwara Kabar Maeh sa Alatalla nuku marentah yalah Raja. Dua walas kawan ulun sa umba hanye pada tulak sinrah hanye.

² Kala yiru pada papire kaulun wawei sa haut nasamare teka roh jahat nelang panyakit. Here yiru hi Maria sa naantuh Magdalena (pitu roh jahat isa haut kaluar teka hanye);

³ pada hi Yohana, darangan Khuza, pagawai istana Herodes; hi Susana, nelang rama lagi wawei lain. Makai biaya raerai, here mambantu Yesus anri kawan ulun sa umba hanye.

Rarapisan tukang hamur wini

⁴ Kawan ulun teka papire tumpuk magun hawi nunung Yesus. Tawuk haut rama ulun bakumpul, Yesus nyarita ma here rarapisan kala yiti:

⁵ “Erang kaulun pangume tulak lepuh namur wini. Tawuk hanye rahat mihamur, naan wini sa lawu hang lalan. Meheni nararah ulun nelang kawan lainni patuk wurung.

⁶ Naan pada sa lawu hang tane batu ampar. Hang tawuk palatikni kaluar amulean yiru layu daya taneni karing.

⁷ Naan pada wini sa lawu hang padang rikut barunrui. Rikut barunrui yiru tumbu sinrah anri wini yiru, balalu nawenanni hampe patei.

⁸ Kude naan pada wini sa lawu hang tane sa maeh, balalu tumbu palus mua, wuani jatuh kali lipet.” Dami udi nyarita rarapisan yiru, Yesus kaeau, “Amun naan silu, ware sanrengei!”

Wuah inun Yesus makai rarapisan

⁹ Kawan ulun sa umba Yesus nunti ma hanye arati teka rarapisan yiru.

¹⁰ Yesus nuing, “Naun haut kaiyuh pangamian nampan karasa rasia neu kala awe Alatalla marentah yalah Raja. Kude kawan ulun lain naajar makai rarapisan, nampan here mantaru, kude puang karasa inun sa jari; here nyanrengei, kude puang kataru.”

Yesus manarang rarapisan neu erang kaulun tukang hamur wini

¹¹ “Arati rarapisan yiru kalayiti: Wini hanyeyiru lengan Alatalla.

¹² Wini sa lawu hang lalan ngintur kawan ulun sa nyanrengei lengan yiru. Kude Iblis hawi palus hanrampas kabar yiru teka atei here, nampan here ada parisaya balalu nasalamat.

¹³ Wini sa lawu hang tane batu ampar ngintur ulun sa hang tawuk karengei kabar yiru, narimeni anri sanang atei. Kude kabar yiru puang iwakat hawuang atei here. Here parisaya ekat erang pitus, kude hang tawuk purija hawi, here murtad.

¹⁴ Wini sa lawu hang jubut barunrui ngintur ulun sa nyanrengei kabar yiru, kude khawatir neu pamelum here nelang hamen welum mewah nelang sanang hang dunia yiti. Katuluhni yiru nawenan here hampe puang uweng wua sa mihak.

¹⁵ Wini sa lawu hang tane sa maeh ngintur ulun sa nyanrengei kabar yiru, balalu nyimuhni hawuang atei sa maeh nelang jujur. Here tatap batahan hampe kaiyuh wua.”

Palita sa natutup makai gantang

¹⁶ “Puang uweng ulun sa nuntun palita balalu nutupni makai gantang, atawa ngandakni hang kapit unengan manre. Hanye sagar ngandak palita yiru hang unengan sa ambau, nampan ulun sa masuk tau kadinung raaini.

¹⁷ Puang uweng sa padina sa puang sagar dinung; nelang puang uweng sa narasia sa puang sagar tabungkar palus lalea rasa.

¹⁸ Daya yiru pantaru mamaeh inun sa rengei naun. Daya ulun sa watni haut naan, sagar naami labis wahai lagi; kude ulun sa watni puang uweng, butit sa magun naan hang hanye sagar naalap pada.”

Ineh anri kawan pulaksanai Yesus

¹⁹ Ineh anri kawan pulaksanai Yesus hawi nunung hanye, kude puang kaiyuh manalu hanye daya ulun rama tatuu.

²⁰ Balalu naan erang kaulun kaeau ma Yesus, “Guru, ineh baya kawan pulaksanainu naan hang luar. Here hamen panalu anri hanyu.”

²¹ Kude Yesus kaeau ma here, “Kawan ulun sa nyanrengei lengan Alatalla nelang nampalusni, here yiru ineh anri kawan pulaksanaiku.”

Yesus nyantaduh riwut barat

²² Hang hinra anrau Yesus baya kawan ulun sa umba hanye sungkat jukung. “Hayu takam tulak ma sabarang danau,” eau Yesus ma here. Balalu here palus tulak.

²³ Tawuk here ganjah balayar, Yesus saanre. Salenga hawi barat mehet nampuh danau yiru. Ranu mulai masuk mawuang jukung, hampe mambahaya here katuluh.

²⁴ Kawan ulun sa umba Yesus tulak nunung hanye balalu ngele hanye. Here kaeau, “Guru, Guru, takam silaka!” Yesus ambuan balalu misuh barat anri galumbang sa ganjah igangulun yiru. Barat anri galumbang yiru taduh balalu danau ranai tuu.

²⁵ Balalu Yesus kaeau ma kawan ulun sa umba hanye, “Wuah inun naun puang parisaya ma aku?” Here balalu wauh nelang takut. Balalu here kaeau anri sameh tenga here, “Hie satuuni ulun yiti hampe ngami parentah ma barat anri galumbang, nelang riwut barat anri galumbang nuu lenganni!”

Yesus nyamare ulun naasuk roh jahat

²⁶ Yesus anri kawan ulun sa umba hanye palus balayar hampe ma daerah Gerasa hang sabarang Danau Galilea.

²⁷ Tawuk Yesus mambai ma pampang, erang kaulun upu sa asuk roh jahat hawi nunung hanye. Ulun yiru teka tumpuk. Hanye haut lawah puang hakun bapakaian nelang puang hakun muneng hang lewu. Hanye hamen muneng hang kawan liang watu unengan pasaran.

²⁸ Tawuk kadinung Yesus, hanye nantiak balalu ileku hang hadapan Yesus nelang anri lengan mehet kaeau, “Yesus, Anak Alatalla Sa Pangaambau! Inun sa sagar naulahnu ma aku yiti? Aku laku ada hanyu nyiksa aku!”

²⁹ Ulun yiru kaeau kala yiru daya Yesus marentah roh jahat yiru kaluar teka hanye. Haut gaha hanye nakuasai daya roh jahat yiru biar hampe kewangun tangan anri peeni haut nahuruk makai rantai nelang hanye najaga bahimat, rantai yiru sika iyuhni nyamitus nelang roh jahat yiru nginsing hanye ma padang pasir.

³⁰ Yesus nunti ma ulun yiru, “Hie ngarannu?” “Ngaranku hi ‘Legiun,’ ” tuing ulun yiru-daya rama roh jahat sa haut masuk mawuang tengani.

³¹ Roh jahat yiru ilaku bahimat nampan Yesus ada ngumpe here mawuang Labak Pampatei.

³² Rite unengan yiru naan rama tuu iwek rahat ngantilau anakuta hang leba bukit. Kawan roh jahat yiru ilaku tatuu ma Yesus nampan nuyu here masuk mawuang kawan iwek yiru. Yesus balalu satuju.

³³ Balalu kawan roh jahat yiru kaluar teka ulun yiru palus masuk mawuang kawan iwek yiru. Balalu kawan iwek yiru nempat palus mitun teka iring pampang ambau mawuang danau, udi yiru balalu leteng.

³⁴ Dami kawan panyaga iwek yiru kadinung inun sa haut jari. Here nempat balalu iwara kabar yiru hang tumpuk nelang hang desa anri hang sakitarni.

³⁵ Balalu kawan ulun rama kaluar neu ninung inun sa jari. Here hawi nunung Yesus, balalu hang yiru here panalu anri ulun sa haut lapas teka kawan roh jahat yiru rahat maharung rite pee Yesus. Hanye haut bapakaian nelang pikiranni haut waras. Here balalu takut.

³⁶ Here sa kadinung kajadian yiru nyarita ma ulun rama kala awe sarani ulun yiru nasamare.

³⁷ Balalu katuluh panduduk daerah Gerasa yiru ilaku tatuu nampan Yesus nanan unengan yiru, daya here katuluh takut tatuu. Balalu Yesus sungkat majukung ngunu mudi.

³⁸ Ulun sa haut lapas teka kawan roh jahat yiru ilaku ma Yesus nampan hanye iyuh umba hanye. Kude Yesus nunyu hanye tulak mudi,

³⁹ eauni, “Hulu hanyu mudi palus wara inun sa haut naulah Alatalla ma hanyu.” Balalu ulun yiru tulak ma litar tumpuk lepuh iwara, inun sa haut naulah Yesus ma hanye.

Anak Yairus – Wawei sa ngawir Yesus

⁴⁰ Tawuk Yesus hampe mulek hang sabarang danau, hanye natahalu anri kaaraien daya kawan ulun daya here rahat nganrei pihawianni.

⁴¹ Balalu hawi erang kaulun kapala lewu sumbayang ma unengan yiru. Ngaranni hi Yairus. Hanye ileku hang hadapan Yesus nelang ilaku tatuu nampan Yesus hawi ma lewuni,

⁴² daya anakni ekat isa wawei sa baumur dua walas taun kai matei. Parahatan Yesus takia ma lewu Yairus, ulun rama mipi hanye teka awe-awe ngawariung hanye.

⁴³ Hang penah here yiru naan pada erang kaulun wawei haut dua walas taun sakit kaluar ira sa naan hubungan anri haidni. Hanye haut nangalis kawan milikni pakai baobat anri dokter, kude puang uweng isa tau nyamare hanye.

⁴⁴ Wawei yiru nyanrite Yesus teka tiba wukuni, balalu ngawir hujung jubahni. Hang tawuk yiru pada wawei yiru taduh kaluar ira.

⁴⁵ Yesus nunti, “Hie ngawir aku?” Katuluh ulun puang mangaku. Balalu hi Petrus kaeau, “Guru, ulun rama tuu ngaliling hanyu; here mipi hanyu!”

⁴⁶ Yesus kaeau, “Kude naan ulun ngawir aku. Aku karasa yiru, daya naan kakuaten sa kaluar teka aku.”

⁴⁷ Wawei yiru karasa pagawianni haut rasa ulun. Balalu hanye hawi anri neter balalu ileku hang hadapan Yesus. Palus hanye nyarita hang hadapan ulun katuluh, wuah inun hanye ngawir Yesus, balalu panyakitni ware hang tawuk yiru jua.

⁴⁸ Yesus kaeau ma hanye, “Anakku, daya hanyu parisaya ma aku hanyu ware. Hulu tulak anri salamat.”

⁴⁹ Tawuk Yesus rahat magun bapaner, hawi erang kaulun pasuruh teka lewu Yairus. Hanye kaeau ma hi Yairus, “Anak wawei Tuan haut matei. Puang usah Tuan ngampi rara Guru lagi.”

⁵⁰ Tawuk Yesus karengei yiru, hanye kaeau ma hi Yairus, “Ada takut. Parisayaleh anaknu sagar ware.”

⁵¹ Dami hampe hang lewu Yairus, Yesus nguring puang sunah erang kaulun masuk baya hanye kasuali hi Petrus, hi Yohanes, hi Yakobus anri ineh ambah iya yiru.

⁵² Katuluh ulun rahat nangis nungkau daya iya yiru matei. Kude Yesus kaeau, “Ada nungkau. Iya yiru puang matei, hanye ekat manre!”

⁵³ Here kakihi Yesus, daya here karasa iya wawei yiru haut matei.

⁵⁴ Udi yiru Yesus negei tangan iya yiru nelang kaeau, “Ambuan, Nak!”

⁵⁵ Hewuk iya yiru miulek ma iya yiru, palus hang tawuk yiru pada hanye balalu ambuan. Udi yiru Yesus nunyu here ngami iya yiru kuman.

⁵⁶ Ulun matueh iya yiru wauh tatuu. Kude Yesus nguring here iwara kajadian yiru mahie-hie.