LUKAS 4 - KABAR MAEH MA HANYU JANJI WAU

Yesus napurija daya Iblis

¹ Yesus mahuang Roh Alatalla hang tawuk hanye nanan Hungei Yordan. Roh Alatalla nganyak hanye ma padang gurun.

² Hang yiru hanye napurija daya Iblis epat pulu anrau lawahni. Salawah yiru, hanye puang uweng nguta inun-inun. Balalu hang akhirni hanye kaingkam kajuju.

³ Iblis kaeau ma hanye, “Angneh, hanyu Anak Alatalla? Hayu, huyu watu yiti jari rote.”

⁴ Yesus nuing, “Hawuang Surat Barasis nasurat, ‘Murunsia puang tau welum ekat teka rote.’ ”

⁵ Balalu Iblis nginsing Yesus ma unengan sa ambau, balalu erang kapangitup matei, Iblis nutui ma hanye katuluh karajaan hang dunia.

⁶ “Katuluh kakuasaan anri katatauen, yiti sagar nasarahku ma hanyu,” eau Iblis ma Yesus, “Daya katuluhni haut naami ma aku nelang aku tau ngamini ma hieleh sa aku hamen ngami.

⁷ Katuluh yiru sagar jari miliknu, amun hanyu ijuku nyambah aku.”

⁸ Yesus nuing, “Hawuang Surat Barasis nasurat, ‘sambah Tuhan Alatallanu nelang layanni hanye.’ ”

⁹ Balalu Iblis nginsing Yesus ma Yerusalem palus ngandak hanye hang ambau punsak Lewu Tuhan balalu kaeau ma hanye, “Angneh, hanyu Anak Alatalla? Hayu, itun teka yiti!

¹⁰ Daya hawuang Surat Barasis nasurat, ‘Alatalla sagar nunyu kawan malekatni nyaga hanyu mamaeh.’

¹¹ Nelang pada, ‘Kawan malekat sagar nyambut hanyu makai tangan here, nampan peenu sika puang pahantuk watu.’ ”

¹² Yesus nuing, “Hawuang Surat Barasis nasurat, ‘Ada murija Tuhan Alatallanu.’ ”

¹³ Dami udi Iblis taduh murija Yesus makai kawan masam sara, hanye nanan Yesus nelang nganrei tawuk sa maeh.

Yesus nuku pagawianni hang Galilea

¹⁴ Udi yiru Yesus miulek ma Galilea; balalu hanye nakuasai daya Roh Alatalla. Kabar neu dirini tasiar ma katuluh daerah yiru.

¹⁵ Hanye ngajar hang kawan lewu sumbayang, balalu katuluh ulun nawat hanye.

Yesus puang natarime hang Nazaret

¹⁶ Yesus tulak kamulek ma Nazaret, unengan nante-ngambau hanye. Hang anrau Sabat, manyu kabiasaanni hanye tulak ma lewu sumbayang. Hanye minri neu mambasa Surat Barasis,

¹⁷ balalu naami ma hanye buku Nabi Yesaya. Hanye nguka walunan buku yiru, balalu habani ayat yiti,

¹⁸ “Roh Tuhan naan hang aku, daya hanye haut mentahbis aku pakai mambarita Kabar Maeh ma ulun paua. Hanye ngutus aku pakai iwara kabebasan ma ulun tawanan nelang iwara ma ulun pehe here sagar ware; nampan mambebas ulun tatindas

¹⁹ nelang iwara haut hampe wayahni Tuhan nyalamat umatni.”

²⁰ Yesus malun buku yiru kamulek, palus ngampudini ma patugas, balalu maharung. Katuluh ulun hawuang lewu ibadat yiru ninung hanye.

²¹ Balalu Yesus mulai pantane ma here, kala yiti, “Kawan ayat Surat Barasis yiti hang anrau yiti haut tulus hang tawuk naun nyanrengeini.”

²² Kawan lengan sa naeauni maeh tatuu, hampe here mandam palus ngaruuh hanye. Here kaeau, “Angneh hanye yiti anak Yosef?”

²³ Balalu Yesus kaeau ma here, “Himat naun sagar makai paribasa yiti nadap aku, ‘Dokter, samare tenga dirinu raerai. Kaajaiban sa rengei kami naulahnu hang Kapernaum, ulah pada hang tumpuk natatnu raerai.’ ”

²⁴ Yesus kaeau kamulek, “Itung, puang uweng nabi sa nahormat hang tumpuk natatni raerai.

²⁵ Kude rengeileh: hang jaman Elia, tawuk puang uweng uran salawah telu satengah taun, balalu juju-lau tamam tuu hang litar daerah. Hang tawuk yiru rama kawan walu hang Israel.

²⁶ Biar kala yiru, Alatalla puang nunyu hi Elia tulak nunung sunah erang kaulun teka kawan walu yiru malengkan ekat nunung erang kaulun walu hang Sarfat hang daerah Sidon.

²⁷ Kala yiru pada hang jaman Nabi Elisa naan rama ulun hang Israel sa bakadan, kude puang sunah erang kaulun teka here sa nasamare, ekat hi Naaman ulun Siria yiru.”

²⁸ Katuluh ulun hang lewu sumbayang yiru sangit tuu tawuk karengei hal yiru.

²⁹ Here minri balalu ngusir Yesus ma luar tumpuk, palus nginsing hanye ma riring gunung, hang unengan tumpuk here nabangun. Here ngunu nyuun hanye mawuang geung.

³⁰ Kude Yesus ikalihik hang penah ulun rama yiru balalu tulak.

Ulun sa karasukan roh jahat

³¹ Udi yiru Yesus tulak ma tumpuk Kapernaum hang Galilea. Hang yaru hanye ngajar kawan ulun hang anrau Sabat.

³² Here mandam kadinung sarani ngajar, daya hanye bapaner anri bapangaruh.

³³ Hang yiru hang lewu sumbayang naan erang kaulun sa nakuasai daya roh jahat. Ulun yiru ikakehet nerau,

³⁴ “U Yesus, ulun Nazaret, inun sa hamen naulahnu ma kami? Hanyu hawi lepuh ngabinasa kami? Aku karasa hie hanyu: hanyu utusan sa barasis teka Alatalla!”

³⁵ “Suni!” pisuh Yesus ma roh jahat yiru, “Kaluar teka ulun yiti!” balalu roh jahat yiru manting ulun yiru hang hadapan here katuluh, udi yiru hanye kaluar teka ulun yiru anri puang ngahanangen hanye.

³⁶ Katuluh ulun wauh, palus kaeau anri sameh here, “Tuu tamam kawan lenganni. Daya makai pangaruh anri kuasa, hanye marentah kawan roh jahat kaluar, balalu here pada kaluar!”

³⁷ Balalu kabar neu Yesus tasiar litar hang wilayah yiru.

Yesus nyamare rama ulun

³⁸ Yesus nanan lewu sumbayang yiru, balalu tulak ma lewu Simon. Kasian Simon sa wawei ganjah mekum, balalu kawan ulun yiru iwara hal yiru ma Yesus.

³⁹ Yesus tulak ma unengan paanrean ulun yiru, balalu ngusir ekumni yiru. Ekum yiru wawai, balalu kasian Simon sa wawei yiru palus ambuan balalu malayanni here.

⁴⁰ Tawuk mate anrau haut leteng, katuluh ulun hawi nunung Yesus nginsing kawan pulaksanaini sa ngaret kawan masam panyakit. Yesus hanrapak tanganni hang ambau here tiap tenga here palus nyamare here.

⁴¹ Kawan roh jahat pada kaluar teka rama ulun, nelang anri lengan mehet kaeau, “Hanyu Anak Alatalla!” Kude Yesus misuh here nelang puang kalewa here bapaner, daya here karasa samula hanye Raja Panyalamat.

Yesus bakhotbah hawuang kawan lewu sumbayang

⁴² Hang tawuk mate anrau mulai hulet Yesus nanan tumpuk yiru balalu tulak ma isa unengan suni. Ulun rama mulai ngantara hanye, balalu here panalu hanye, here ngulah akal nampan hanye puang nanan here.

⁴³ Kude Yesus kaeau, “Kabar Maeh neu kala awe Alatalla marentah harus aku iwara pada hang kawan tumpuk lain, daya neu yiru Alatalla ngutus aku ma dunia.”

⁴⁴ Daya sabab yiru Yesus bakhotbah hawuang kawan lewu sumbayang hang litar tane Yudea.