LUKAS 3 - KABAR MAEH MA HANYU JANJI WAU

Kabar Yohanes Pambaptis

¹ Hang taun kalima walas teka pamarentahan Kaisar Tiberius, Pontius Pilatus jari gubernur hang Yudea, nelang hi Herodes marentah hang Galilea. Hi Filipus, pulaksanai wat Herodes marentah hang wilayah Iturea anri Trakhonitis, nelang hi Lisanias marentah hang Abilene.

² Sa manjabat jari imam hante hanyeyiru hi Hanas anri hi Kayafas. Hang taun yiru Alatalla bapaner anri hi Yohanes, anak Zakaria hang padang gurun.

³ Balalu hi Yohanes tulak maawe-awe hang litar daerah Hungei Yordan nelang nampe kabar teka Alatalla. Hi Yohanes nanterau, “Ware batobat teka kawan dosa naun nelang naun harus nabaptis, nampan Alatalla ngampun naun.”

⁴ Yiru manyu kala sa nasurat hawuang buku Nabi Yesaya: “Naan ulun naterau-terau hang padang gurun, ‘Sadia lalan ma Tuhan, sanrata lalan ma hanye.

⁵ Tatiap leba patut natimbuk, tatiap gunung anri wungkur nasanrata. Lalan sa eluk-ekul patut nakawitu, nelang lalan sa geung-munggu nasanrata.

⁶ Kawan ulun hang litar dunia sagar kadinung Alatalla nyalamat murunsia!’ ”

⁷ Rama ulun hawi nunung hi Yohanes nampan nabaptis. Hi Yohanes kaeau ma here, “Naun ulun jahat! Hie sa kaeau naun tau lapas teka hukuman Alatalla udi ati?

⁸ Tantarang makai pagawian naun sa naun tuu haut batobat teka kawan dosa naun! Ada naun ngunu kaeau hi Abraham hanyeyiru datu nini naun. Itung: Teka kawan watu yiti Alatalla sika sanggup ngulah katurunan ma hi Abraham!

⁹ Kapak haut nasadia pakai neweng kakau wua hampe ma kawan wakatni. Tatiap kakau sa puang bahasil mua maeh sagar nateweng palus naumpe mawuang matei apui.”

¹⁰ “Jari, inun sa harus naulah kami?” tunti kawan ulun yiru ma hi Yohanes.

¹¹ Hi Yohanes nuing, “Ulun sa uweng rueh kalamar baju, harus ngami erang kalamar ma sa puang uweng baju nelang sukat ulun sa uweng anakuta, harus mambagini.”

¹² Kawan tukang tagis pajak pada hawi nunung hi Yohanes nampan nabaptis. Here nunti, “Guru, inun sa harus naulah kami?” Hi Yohanes nuing,

¹³ “Ada nagis labis wahai teka ala sa haut natukas.”

¹⁴ Naan pada parajurit nunti, “Kala awe anri kami? Inun sa harus naulah kami?” Hi Yohanes nuing, “Ada nipu ngakal hie-hie nelang ada hanrampas duit anri ngulah dawaan palasu. Sukupleh anri gajehnu!”

¹⁵ Hang tawuk yiru ulun rama mulai itunti, inun hi Yohanes Raja Panyalamat sa naanrei here?

¹⁶ Daya yiru hi Yohanes kaeau ma here katuluh, “Aku mambaptis naun makai ranu, kude die sagar hawi sa labis hante teka aku. Pakai nguka tadi sapatuni aku sika puang patut. Hanye sagar mambaptis naun makai Roh Alatalla nelang apui.

¹⁷ Hang tanganni naan daharu pakai ngitap katuluh pareini hampe barasis. Parei sagar nakumpulni hawuang wirang, kude katuluh ape sagar natutungni hawuang apui sa puang tau pare!”

¹⁸ Kala yiru hi Yohanes ngami nasehat ma ulun rama makai wahai masam sara, tawuk hanye iwara Kabar Maeh.

¹⁹ Kude hi Herodes, panguasa hang Galilea, natagur daya Yohanes neu parkawinanni anri hi Herodias, darangan pulaksanaini, nelang neu katuluh kajahaten lain sa haut naulahni.

²⁰ Kude hi Herodes likan nambah kawan kajahatenni anri namasuk hi Yohanes mawuang panjara.

Yesus nabaptis

²¹ Dami udi katuluh ulun yiru nabaptis, Yesus pada nabaptis. Tawuk hanye rahat badoa, langit pauka,

²² nelang Roh Alatalla minau ma ambau hanye sarupa kala wurung dara. Balalu naan rengei lengan Alatalla kaeau, “Hanyu anakku sa nasintaku. Hanyu ngampi sanang ateiku.”

Daftar datu nini Yesus

²³ Hang tawuk Yesus nuku pagawianni, hanye baumur leu telumpulu taun. Manyu eau ulun, hanye anak Yosef, anak Eli,

²⁴ anak Matat, anak Lewi, anak Malkhi, anak Yanai, anak Yosef,

²⁵ anak Matica, anak Amos, anak Nahum, anak Hesli, anak Nagai,

²⁶ anak Maat, anak Matica, anak Simei, anak Yosekh, anak Yoda,

²⁷ anak Yohanan, anak Resa, anak Zerubabel, anak Sealtiel, anak Neri,

²⁸ anak Malkhi, anak Adi, anak Kosam, anak Elmadam, anak Er,

²⁹ anak Yesua, anak Eliezer, anak Yorim, anak Matat, anak Lewi,

³⁰ anak Simeon, anak Yehuda, anak Yosef, anak Yonam, anak Elyakim,

³¹ anak Melea, anak Mina, anak Matata, anak Natan, anak Dawid,

³² anak Isai, anak Obed, anak Boas, anak Salmon, anak Nahason,

³³ anak Aminadab, anak Admin, anak Arni, anak Hezron, anak Peres, anak Yehuda,

³⁴ anak Yakub, anak Ishak, anak Abraham, anak Terah, anak Nahor,

³⁵ anak Serug, anak Rehu, anak Peleg, anak Eber, anak Salmon,

³⁶ anak Kenan, anak Arpakhsad, anak Sem, anak Nuah, anak Lamekh,

³⁷ anak Metusalah, anak Henokh, anak Yared, anak Mahalaleel, anak Kenan,

³⁸ anak Enos, anak Set, anak Adam, anak Alatalla.