LUKAS 24 - KABAR MAEH MA HANYU JANJI WAU

Kaelanen Yesus

¹ Hang anrau Minggu, kaiyat subuh tatuu, kawan wawei yiru tulak ma pasaran nginsing kawan wunge sa haut nasadia here.

² Hang pasaran, here kadinung watu panutup pasaran haut pasasar.

³ Balalu here masuk mawuang pasaran yiru, kude puang kahaba bangkai Tuhan Yesus hang yiru.

⁴ Ganjah here minri hang yiru nelang bingung mamikir hal yiru, salenga rueh kaulun makai pakaian mamilau minri rite here.

⁵ Here takut tatuu, balalu ileku hampe tane, tawuk yiru rueh kaulun yiru kaeau ma here, “Wuah inun naun ngantara ulun welum hang padang ulun matei?

⁶ Hanye puang uweng hang yiti. Hanye haut welum mulek! Itung inun sa haut naeauni ma naun tawuk hanye magun hang Galilea,

⁷ samula ‘Anak Murunsia harus nasarah ma ulun badosa, balalu nabalasangar, kude hang anrau sa katelu hanye sagar welum mulek.’ ”

⁸ Balalu kawan wawei yiru kaitung neu kawan lengan Yesus.

⁹ Udi here mudi teka pasaran yiru, here nyarita katuluh kajadian yiru ma kasawalas rasul anri katuluh kawan ulun sa umba Yesus sa lainni.

¹⁰ Kawan wawei sa iwara katuluhni yiru ma kawan ulun sa umba Yesus, hanyeyiru: Hi Maria Magdalena, hi Yohana anri hi Maria ineh Yakobus, anri kawan wawei lainni sa sinrah anri here.

¹¹ Kude kawan rasul yiru minda kawan wawei yiru ekat nyarita hal sa ang mangkaranah. Here puang parisaya sarita kawan wawei yiru.

¹² Kude hi Petrus ambuan palus nempat ma pasaran. Nelang ijuku hanye naniuh mawuang, balalu kadinung ekat naan kain kafan hang yiru. Hi Petrus wauh tuu, balalu mudi anri wahai tuntian hawuang ateini neu inun sa haut jari.

Hang tawuk pakiaan hampi Emaus

¹³ Hang anrau yiru pada, rueh kaulun ulun sa umba Yesus rahat takia ma isa tumpuk sa bangaran Emaus, leu sawalas kilometer lawitni teka Yerusalem.

¹⁴ Nelang takia here bapaner neu kawan kajadian sa haut jari yiru.

¹⁵ Rahat here bapaner nelang bagurayang, Yesus salenga hawi palus takia sinrah here.

¹⁶ Here kadinung Yesus, kude naan sa ngulah here puang kataru hanye.

¹⁷ Balalu Yesus kaeau, “Inun napaner naun hang penah lalan yiti?” Here suni anri wangun uruwawa kala ulun mahanang atei.

¹⁸ Balalu erang kaulun teka here, bangaran hi Kleopas, nunti ma Yesus, “Inun ekat hanyu raerai ulun pandatang hang Yerusalem sa puang karasa kajadian sa jari hang yaru wau-wau yiti?”

¹⁹ “Kajadian inun?” tunti Yesus. “Kajadian sa neu Yesus, ulun teka Nazaret yiru,” tuing here. “Hanye nabi. Kawan lenganni anri kawan ulahanni bakuasa tatuu-hau manurut pandangan Alatalla hau manurut pandangan ulun katuluh.

²⁰ Kawan imam kapala anri kawan pamimpin bangsa takam manyarah hanye nampan nahukum mati, balalu here nyalib hanye!

²¹ Sabujurni kami samula baharap tatuu hanye sa sagar mambebas Israel! Anrau yiti anrau katelu udi kajadian yiru.

²² Kamulek, papire kaulun wawei kawan hengau kami haut ngulah kami embah. Kaiyat subuh tatuu here hampi pasaran,

²³ kude puang kahaba bangkaini hang yaru. Balalu here mulek palus kaeau himat Yesus yiru welum.

²⁴ Papire kaulun teka kami balalu tulak ma pasaran balalu ninung inun sa naeau daya kawan wawei yiru uras kapinuu, ekat here puang kadinung Yesus.”

²⁵ Balalu Yesus kaeau ma here, “Naun tuu puang kataru! Kajut unte naun parisaya katuluh sa haut naeau daya kawan nabi!

²⁶ Angneh Raja Panyalamat harus kaingkam kahanangen yiru dahulu, aruai kaiyuh kamuliaanni?”

²⁷ Udiyiru Yesus manarang ma here inun sa nasurat hawuang katuluh Surat Barasis neu dirini, nuku teka kawan buku Moses anri buku kawan nabi.

²⁸ Tawuk yiru here haut rite tumpuk natuju here. Yesus ngulah kala wangun hamen palus,

²⁹ kude here nangke hanye. “Amalem hang unengan kami,” eau here ma hanye, “itati haut kai kamalem nelang haut nuku maieng.” Balalu Yesus masuk neu amalem hang unengan here.

³⁰ Hang tawuk maharung kuman baya here, Yesus ngalap rote, ngantuh tarima kasih ma Alatalla, miah nuhi rote yiru makai tanganni balalu ngamini ma here.

³¹ Udiyiru wau here kataru hanyeyiru Yesus. Kude hanye wawai teka paninungan here.

³² Eau here anri sameh here, “Angneh nanam atei takam kala newe, tawuk hanye bapaner anri takam hang penah lalan, nelang manarang isi Surat Barasis ma takam?”

³³ Tawuk yiru pada here minri balalu mulek ma Yerusalem. Hang yaru here panalu anri kasawalas kaulun ulun sa umba Yesus rahat bakumpul baya here sa lain.

³⁴ Here yiru kaeau, “Samula tuu Tuhan haut welum kamulek! Hanye haut nantarang tengani ma hi Simon!”

³⁵ Karueh kaulun ulun sa umba Yesus sa wau hawi yiru balalu nyarita pangalaman here hentek hang pakiaan, nelang kala awe here kataru Tuhan hang tawuk hanye miah nuhi rote.

Yesus nantarang tengani ma kawan ulun sa umba hanye

³⁶ Ganjah here magun basarita, salenga Yesus minri hang penah here palus kaeau, “Salamat naun!”

³⁷ Here embah nelang takut, daya minda here kadinung alah.

³⁸ Kude Yesus kaeau, “Wuah inun naun takut? Wuah inun hulet kabembangen hawuang atei naun?

³⁹ Dinung tanganku nelang dinung peeku. Patut naun karasa, kapinuuni aku yiti Yesus! Kama nelang taniuh, daya alah puang uweng daging atawa taulang, kala sa dinung naun hang aku.”

⁴⁰ Yesus kaeau kalayiru nelang nantarang ma here tangan anri peeni.

⁴¹ Tawuk here magun huan tau parisaya, daya here arai tatuu nelang wauh, Yesus nunti ma here, “Inun naun naan anakuta hang yiti?”

⁴² Here ngami ma hanye erang kasayat kenah bagoreng.

⁴³ Yesus ngalap kenah yiru, balalu ngutani hang hadapan here.

⁴⁴ Udiyiru hanye kaeau ma here, “Iti kawan hal sa haut nawaraku ma naun tawuk aku magun baya anri naun: himat tiap hal sa nasurat neu aku hawuang kawan Buku Moses, Buku Kawan Nabi, anri Mazmur, harus tulus.”

⁴⁵ Udi hie Yesus nguka pikiran here nampan kataru maksud Surat Barasis.

⁴⁶ Balalu hanye kaeau ma here, “Hawuang Surat Barasis nasurat neu Raja Panyalamat harus wuah kahanangen, nelang harus kaelan welum mulek teka pampatei hang anrau sa katelu.

⁴⁷ Pada bawilah hawuang ngaran Raja Panyalamat yiru harus nawara ma katuluh bangsa, murunsia harus batobat, nelang himat Alatalla ngampun dosa. Nelang kabar yiru harus nawara mulai teka Yerusalem.

⁴⁸ Naun kawan saksi teka katuluhni yiru.

⁴⁹ Nelang aku raerai sagar ngirim ma naun inun sa haut najanji daya Ambah. Kude naun harus tatap nganrei hang tumpuk yiti hampe kuasa teka Alatalla penu hang naun.”

Yesus naenat ma surga

⁵⁰ Udiyiru Yesus nginsing here ma luar tumpuk hampe ma Betania. Hang yaru hanye ngenat tanganni, balalu mamberkat here.

⁵¹ Rahat hanye ngulah yiru, hanye paenat ma surga balalu tapisah teka here.

⁵² Here ileku nyambah hanye, udiyiru mudi ma Yerusalem anri atei sa arai tatuu,

⁵³ nelang saratang nawat nante Alatalla hang Lewu Tuhan.