LUKAS 23 - KABAR MAEH MA HANYU JANJI WAU

Yesus hang hadapan hi Pilatus

¹ Katuluh anggota sidang yiru minri, balalu nginsing Yesus ma hadapan hi Pilatus.

² Hang yiru here mulai nawa hanye. Here kaeau, “Kami kasasat ulun yiti nyantawang rakyat. Hanye nantiring ulun nampan ada bayar pajak ma Kaisar, daya eauni hanye Kristus, erang kaulun raja.”

³ Balalu hi Pilatus nunti ma Yesus, “Inun tuu hanyu raja ulun Yahudi?” Yesus nuing, “Kala yiru eaunu.”

⁴ Balalu eau Pilatus ma kawan imam kapala anri ulun rama yiru, “Aku puang kahaba sunah isa kahalaen hang ulun yiti nampan nukum hanye.”

⁵ Kude here magin mandasak lagi, “Makai ajaranni, hanye nantiring ulun hang litar Yudea; asalni hang Galilea, nelang itati haut hampe hang yiti.”

Yesus hang hadapan hi Herodes

⁶ Tawuk hi Pilatus karengei yiru hanye nunti, “Inun ulun yiti ulun Galilea?”

⁷ Dami nawara, Yesus baasal teka daerah sa naan hang kapit kuasa Herodes, hi Pilatus ngirim Yesus nunung hi Herodes, sa tawuk yiru naan pada hang Yerusalem.

⁸ Hi Herodes arai tuu tawuk kadinung Yesus, daya haut lawah hanye karengei neu hanye nelang sindi kadinung hanye. Hanye harap tau kaiyuh kadinung Yesus ngulah kaajaiban.

⁹ Daya yiru hi Herodes nyurung wahai tuntian ma hanye, kude Yesus budas puang nuing.

¹⁰ Kawan imam kapala anri kawan guru agama mangadap pada hang yiru nelang anri bahimat here nawa Yesus.

¹¹ Hi Herodes anri kawan anggota tantarani ngasese nelang mahina Yesus, balalu namu ma hanye pakaian kabesaran, udi yiru ngirim hanye mulek ma hi Pilatus.

¹² Hang anrau yiru pada hi Herodes anri hi Pilatus, sa dahuluni bapaut, balalu maeh pakat kamulek.

Yesus naputus hukuman mati

¹³ Hi Pilatus ngumpul kawan imam kapala, kawan pamimpin, anri rakyat,

¹⁴ balalu kaeau ma here, “Naun nginsing ulun yiti nunung aku nelang kaeau hanye nyantawang ulun rama. Itati hang hadapan naun aku haut mariksa hanye, kude aku budas puang kahaba sunah isa kejahatan sa manyu dawaan naun ma hanye.

¹⁵ Kala yiru pada pandapat Herodes, daya hanye pada haut ngirim Yesus yiru kamulek ma kami. Ulun yiti puang uweng sunah isa ulahanni sa patut nahukum anri hukuman mati.

¹⁶ Daya yiru aku sagar ngakasah hanye udi hie napas hanye.” [

¹⁷ Hang tiap parayaan Paskah, hi Pilatus harus napas erang kaulun tahanan ma rakyat.]

¹⁸ Katuluh ulun sa bakumpul hang yiru anri lengan mehet kaeau, “Wunu hanye! Lapas hi Barabas ma kami!” (

¹⁹ Hi Barabas napanjara daya gana pambaruntakan hang tumpuk nelang daya munu ulun.)

²⁰ Hi Pilatus hamen napas Yesus, daya yiru hanye bapaner hinra lagi ma ulun rama yiru.

²¹ Kude here anri lengan mehet kaeau, “Balasangar hanye! Balasangar hanye!”

²² Balalu ma katelu kalini hi Pilatus ikakehet pantane ma here, “Kude inun kahalaenni? Aku puang kahaba sunah isa kahalaen hang hanye sa patut nahukum anri hukuman mati! Aku sagar ngakasah hanye, balalu napas hanye.”

²³ Kude here magun bahimat ikakehet kaeau Yesus harus nabalasangar. Balalu akhirni lengan here bahasil.

²⁴ Balalu hi Pilatus nyanawu hukuman mati ma ambau Yesus manyu kabahumen ulun rama yiru,

²⁵ nelang napas ulun sa nalaku here, hanyeyiru ulun sa napanjara daya gana pambaruntakan nelang munu ulun. Udi yiru Yesus nasarahni ma here nampan here nampalus inun bahum here.

Yesus nabalasangar

²⁶ Yesus balalu nainsing here. Hang penah lalan, here panalu erang kaulun bangaran hi Simon, baasal teka Kirene, rahat masuk ma tumpuk. Here nyamba hanye, balalu maksa hanye ngatung kayu balasangar yiru hang wading wuku Yesus.

²⁷ Rama ulun umba takia hang wading wuku Yesus-teka here yiru naan pada papire kaulun wawei. Kawan wawei yiru nungkau nangis Yesus.

²⁸ Kude Yesus ikulik ma here palus kaeau, “Kawan wawei Yerusalem! Ada naun nangis aku. Tangisleh dirinu raerai anri kawan anak naun.

²⁹ Daya sagar naan wayahni ulun sagar kaeau, ‘Tuu leha untungni kawan wawei sa puang suah mihawuntung, sa puang suah bagenda nelang sa puang suah ngampumu genda!’

³⁰ Hang tawuk yiru ulun sagar kaeau ma kawan gunung, ‘Weat kami!’ Kamulek ma kawan bukit, ‘Salugup kami!’

³¹ Daya amun anri kayu sa welum, ulun haut ngulah kala yiti, diwi likan sa sagar naulah here anri kayu patei!”

³² Naan pada rueh kaulun panjahat sa nainsing here nampan nahukum mati sinrah anri Yesus.

³³ Tawuk hampe hang unengan sa naantuh “Kuruwangah”, here nyalib Yesus baya karueh panjahat yiru-erang kaulun hang tiba tuhi kawan. Erang kaulun lagi hang tuhi kawi Yesus.

³⁴ Balalu Yesus badoa, “Ambah, ampun here! Here puang karasa inun sa naulah here.”

³⁵ Hang yiru here babagi pakaian Yesus makai undian. Kawan ulun minri hang yiru manonton, tawuk kawan pamimpin Yahudi ngasese Yesus anri kaeau, “Hanye haut nyalamat ulun lain; suba itati hanye nyalamat dirini raerai, amun hanye tuu Raja Panyalamat sa napidi Alatalla!”

³⁶ Kawan tantara pada ngasese hanye. Here hawi balalu ngami anggur maasem ma hanye

³⁷ nelang kaeau, “Amun hanyu Raja ulun Yahudi, salamat dirinu!”

³⁸ Hang ambau balasangar Yesus, nasurat kawan lengan yiti: “Iti Raja Ulun Yahudi.”

³⁹ Erang kaulun panjahat sa nabalasangar hang yiru mahina Yesus. Hanye kaeau, “Angneh, hanyu Raja Panyalamat? Nah, salamat dirinu baya kami pada!”

⁴⁰ Kude panjahat saisa nagur hengauni yiru, eauni, “Inun hanyu puang takut ma Alatalla? Hanyu sameh nahukum mati kala hanye.

⁴¹ Kude hukuman tarueh samula satimpal manyu pagawian tareh. Kude hanye budas puang uweng kahalaen!”

⁴² Balalu hanye kaeau, “Yesus, itung aku, amun hanyu hawi yalah Raja!”

⁴³ “Parisayaleh,” eau Yesus ma hanye, “Anrau yiti hanyu sagar baya aku hang Firdaus.”

Pampatei Yesus

⁴⁴ Leu pukul dua walas penah anrau, mate anrau puang basahaya, nelang katuluh negeri yiru jari maieng tatuu hampe pukul telu kariwe.

⁴⁵ Tenda sa nasinsi hawuang Lewu Tuhan, sitat patuhi rueh.

⁴⁶ Balalu Yesus kaeau anri mehet, “Ambah! Mawuang tangannu aku nyarah diriku!” Udi kaeau kalayiru, hanye balalu matei.

⁴⁷ Tawuk komandan pasukan kadinung inun sa haut jari, hanye nawat Alatalla. Balalu hanye kaeau; “Kapinuuni hanye puang uweng kahalaen!”

⁴⁸ Ulun rama sa hawi ma yiru umba manonton, kadinung inun sa haut jari. Here katantuluh mudi anri atei sa tuu-tuu manyasal.

⁴⁹ Kamulek katantuluh kenalan Yesus, baya kawan wawei sa umba hanye teka Galilea, minri teka lawit ninung katuluhni yiru.

Yesus napasar

^50-51 Naan erang kaulun bangaran hi Yosef, baasal teka tumpuk Arimatea hang negeri Yudea. Hanye erang kaulun maeh sa nahormat daya ulun, nelang hanye rahat nganrei wayahni Alatalla mulai marentah yalah Raja. Biar hanye anggota Pangadilan Agama, kude hanye puang satuju anri kaputusan nelang anri tindakan pangadilan yiru.

⁵² Hi Yosef yiti tulak mangadap Pilatus palus ilaku nampan bangkai Yesus naami ma hanye.

⁵³ Udi yiru hanye ngului bangkai Yesus teka kayu balasangar balalu mungkusni makai kain kafan teka lena. Udi yiru hanye masar Yesus hawuang pasaran sa naulah hang bukit watu – pasaran yiru huan suah napakai.

⁵⁴ Anrau yiru anrau Jumahat; nelang anrau Sabat kai hampe.

⁵⁵ Kawan wawei sa hawi sinrah Yesus teka Galilea umba hi Yosef nelang kadinung pasaran yiru. Here kadinung pada kewangun bangkai Yesus napasar hawuang pasaran yiru.

⁵⁶ Udiyiru here mudi balalu natap kawan wunge baya minyak marauh enguh pakai nahalui ma bangkai Yesus. Hang anrau Sabat, here tarie bagawi nampan nampalus hukum agama.