LUKAS 22 - KABAR MAEH MA HANYU JANJI WAU

Komplotan ngunu munu Yesus

¹ Parayaan Rote Puang Baragi sa naantuh Paskah haut rite.

² Kawan imam kapala anri kawan guru agama rahat ngantara lalan nampan munu Yesus anri suni-suni, daya here takut ma ulun rama.

Hi Yudas satuju makhianat Yesus

³ Udiyiru Iblis masuk ma hi Yudas sa naantuh pada hi Iskariot, hanyeyiru erang kaulun teka kadua walas ulun sa umba Yesus.

⁴ Daya yiru hi Yudas tulak lepuh bagurayang anri kawan imam kapala anri kawan kapala panjaga Lewu Tuhan neu kala awe hanye kaiyuh nyarah Yesus ma here.

⁵ Here sanang tatuu nelang bajanji sagar ngami duit ma hanye.

⁶ Hi Yudas pada satuju balalu mulai ngantara kasampatan nampan nyarah Yesus ma here anri puang rasa ulun.

Natap kutaen Paskah

⁷ Hampe anrau Parayaan Rote Puang Baragi hang anrau yiru ulun munu babiri neu kutaen Paskah.

⁸ Balalu Yesus nunyu hi Petrus anri hi Yohanes, “Hulu sadia kutaen Paskah ma takam.”

⁹ “Hang awe hanyu hamen kami nyadiani?” tunti here.

¹⁰ Yesus nuing, “Tawuk naun masuk ma tumpuk, naun sagar panalu erang kaulun upu rahat nginsing isa kandi mahuang ranu. Apung hanye ma lewu sa naambaini,

¹¹ balalu eau ma ampun lewu yiru: Guru nunti, ‘Hang awe unenganku baya kawan ulun sa umba aku nguta kutaen Paskah?’

¹² Ampun lewu yiru sagar nutui ma naun isa kamar loteng hante, sukup anri kawan parabotni. Sadia katuluhni hang yaru.”

¹³ Hi Petrus anri hi Yohanes tulak, balalu kahaba katuluhni sameh kala sa naeau daya Yesus. Here balalu nyadia kutaen Paskah yiru.

Parjamuan Kudus

¹⁴ Dami haut hampe tawukni neu nguta kutaen Paskah yiru, Yesus maharung baya kawan ulun sa umba hanye hang unengan parjamuan.

¹⁵ Balalu hanye kaeau ma here, “Aku sindi tatuu nguta kutaen Paskah yiti baya anri naun kapihuan aku wuah kahanangen!

¹⁶ Daya, parisayaleh: Aku puang sagar nguta kutaen yiti lagi hampe arati teka kutaen yiti nalalea hang Dunia Wau Wat Alatalla.”

¹⁷ Udiyiru Yesus ngenat sangkir anggur, balalu badoa ngantuh tarima kasih ma Alatalla, udiyiru kaeau, “Alap yiti, nelang bagi;

¹⁸ daya wuah naun karasa: mulai teka itati aku puang sagar nguut anggur yiti lagi hampe Alatalla haut bakuasa penu hang ambau ala katantuluh.”

¹⁹ Udiyiru Yesus ngalap rote. Nelang udi badoa ngantuh tarima kasih, hanye miah rote yiru makai tanganni balalu ngami ma here, nelang kaeau, “Iti tengaku [sa nasarah ma naun. Ulah yiti pakai ngitung aku.”

²⁰ Kalayiru pada udi ikuta, hanye ngami sangkir anggur yiru ma here nelang kaeau, “Sangkir yiti hanyeyiru janji Alatalla sa wau, sa na santuhun makai iraku-ira sa nahalui ma naun].”

²¹ “Kude dinung! Ulun sa makhianat aku naan hang yiti baya anri aku!

²² Anak Murunsia samula sagar matei kala sa haut natukas daya Alatalla; kude silaka ulun sa makhianat hanye!”

²³ Balalu here mulai ipanunti sameh here, hie teka here sa sagar ngulah hal yiru.

Basual neu hie sa panga tamam

²⁴ Hang penah kawan ulun sa umba Yesus hulet pirawekan, here basual neu hie teka here sa harus naanggap panga tamam.

²⁵ Yesus kaeau ma here, “Raja-raja kawan bangsa sa puang kataru Alatalla nindas rakyatni, nelang kawan panguasani naantuh ‘Panyalindung Rakyat’.

²⁶ Kude naun puang iyuh kalayiru. Kabalikanni, ulun sa panga tamam hang penah naun harus jari kala sa panga hina, nelang pamimpin harus jari kala palayan.

²⁷ Hie sa diwi tamam: ulun sa maharung kuman nadap meja, atawa ulun sa malayanni hanye? Batantu ulun sa maharung yiru. Kude aku naan hang penah naun kala palayan.

²⁸ Hawuang kawan kasusahenku, naun saratang baya anri aku.

²⁹ Kala Ambah haut ngami ma aku kuasa neu marentah, kala yiru pada aku sagar ngami ma naun kuasa yiru.

³⁰ Anri kalayiru naun iyuh umba baya anri aku hang tawuk aku jari Raja, nelang naun sagar maharung hang kadua walas takhta nampan marentah kadua walas suku bangsa Israel.”

Tujum neu hi Petrus sagar ngidim Yesus

³¹ “Simon, Simon, rengei! Iblis haut naami ijin neu nguji naun; kala parei naiik natampisah balalu sa maeh tapisah teka ape.

³² Kude aku haut badoa ma hanyu, Simon, nampan imannu ada mawah. Nelang amun hanyu haut mulek nunung aku, hanyu harus ngampi kansing kawan pulaksanainu.”

³³ Hi Petrus nuing, “Tuhan, aku basadia masuk panjara nelang matei sinrah Tuhan!”

³⁴ “Parisaya, Petrus,” eau Yesus, “kapihuan manu nanru anrau yiti, hanyu hantelu kali ngidim aku.”

Dompet, kambut atawa pedang

³⁵ Udiyiru Yesus kaeau ma here, “Dahulu hie tawuk aku ngutus naun aku puang nunyu naun nginsing dompet, kambut atawa sapatu, inun naun kakurangen ala inun-inun?” “Puang!” tuing here.

³⁶ “Kude itati,” eau Yesus, “hie sa uweng dompet atawa kambut, harus nginsingni; nelang hie sa puang uweng pedang, harus ngari jubahni pakai midi pedang.

³⁷ Daya, parisayaleh, ayat Surat Barasis sa kaeau kala yiti, ‘Hanye naanggap kala erang kaulun panjahat,’ harus jari hang ambau diriku. Daya inun sa nasurat hawuang Surat Barasis neu aku rahat tulus itati.”

³⁸ “Tuhan,” eau kawan ulun sa umba Yesus, “dinung, hang yiti naan rueh pedang.” “Sukup!” tuing Yesus.

Yesus badoa hang Bukit Zaitun

³⁹ Yesus nanan tumpuk balalu tulak kala biasani hampi Bukit Zaitun, nelang ulun sa umba hanye pada tulak umba hanye.

⁴⁰ Tawuk hampe hang yiru, hanye kaeau ma here, “Ware naun badoa nampan naun ada badosa amun naun napurija.”

⁴¹ Udiyiru hanye tulak lawit butit teka here, leu tumbang wangkalung,

⁴² balalu ileku palus badoa. “Ambah,” eauni, “amun iyuh, sanawit teka aku kahanangen sa harus naingkamku yiti. Kude ada kabahumenku, malengkan kabahumen Ambah.” [

⁴³ Erang kaulun malekat hawi nunung hanye palus ngampi kansing hanye.

⁴⁴ Yesus nanggung kahanangen atei magin tamam, hampe hanye bahimat tatuu badoa. Lahikni kala ira metak ma tane.]

⁴⁵ Taduh badoa, Yesus mulek lagi ma kawan ulun sa umba hanye. Hanye kasasat here rahat manre daya bangat mahanang atei.

⁴⁶ Balalu hanye kaeau ma here, “Wuah inun naun manre? Ambuan balalu badoa nampan naun puang wuah purija.”

Yesus najamba

⁴⁷ Ganjah Yesus magun bapaner, hawi erang karombongan ulun. Here napimpin daya Yudas, erang kaulun teka ulun sa umba Yesus. Udiyiru hi Yudas tulak naripi Yesus balalu nyiuk hanye.

⁴⁸ Kude Yesus kaeau ma hanye, “Yudas, inun makai siuk yiru hanyu hamen makhianat Anak Murunsia?”

⁴⁹ Tawuk kawan ulun sa umba Yesus sa naan hang yiru kadinung ala sa sagar jari, here kaeau, “Tuhan, kami nyarang makai pedang!”

⁵⁰ Balalu erang kaulun teka here nampek walah imam hante makai pedang hampe siluni tuhi kawan witus.

⁵¹ Kude Yesus kaeau, “Mayu!” Balalu hanye manjamah silu ulun yiru palus nyamareni.

⁵² Udiyiru Yesus kaeau ma kawan imam kapala anri kawan parwira panjaga Lewu Tuhan, nelang kawan pamimpin Yahudi sa hawi ma yiru lepuh nyamba hanye, “Inun aku yiti panjahat, hampe naun hawi makai pedang anri gagada neu nyamba aku?

⁵³ Tiap anrau aku naan baya naun hang Lewu Tuhan, naun puang nyamba aku. Kude iti wayahni naun batindak, hang tawuk kuasa piieng negei kakuasaan.”

Hi Petrus ngidim Yesus

⁵⁴ Here nyamba Yesus palus nginsing hanye ma lewu imam hante. Hi Petrus ngapung teka lawit.

⁵⁵ Hang penah natat yiru apui simpuk pakai minrus haut naampilelap balalu hi Petrus tulak maharung baya kawan ulun sa maharung ngaliling apui yiru.

⁵⁶ Erang kaulun palayan wawei kadinung hi Petrus maharung hang rite apui unengan minrus yiru; balalu palayan wawei yiru mansinung hi Petrus, udiyiru kaeau, “Ulun yiti huni pada naan baya anri Yesus!”

⁵⁷ Kude hi Petrus puang mangaku. Hanye kaeau, “Aku budas puang kataru ulun yiru!”

⁵⁸ Puang lawah udiyiru, erang kaulun salain kadinung hi Petrus balalu kaeau, “Hanyu pada erang kaulun teka here!” Kude hi Petrus nuing, “Puang, lain aku!”

⁵⁹ Leu erang jam udiyiru, erang kaulun salain lagi kaeau anri lengan mehet, “Samula tuu ulun yiti ulun sa umba Yesus, daya hanye pada ulun Galilea!”

⁶⁰ Kude hi Petrus nuing, “Inun maksudnu, aku puang karasa!” Tawuk yiru pada, tawuk hi Petrus magun bapaner, manu nanru.

⁶¹ Yesus balalu ikulik palus nantau hi Petrus. Balalu hi Petrus kaitung Tuhan haut kaeau ma hanye, “Kapihuan manu nanru anrau yiti, hanyu hantelu kali ngidim aku.”

⁶² Balalu hi Petrus kaluar teka yiru nelang sirut-sirut nungkau.

Yesus nakasese nelang naweweh

⁶³ Kawan ulun sa rahat nyaga Yesus, ngasese nelang meweh hanye.

⁶⁴ Here nutup mateini balalu nunti ma hanye, “Suba tangguh hie sa meweh hanyu?”

⁶⁵ Wahai lagi kawan lengan hinaan sa natuju here ma hanye.

Yesus hang hadapan Pangadilan Agama

⁶⁶ Kaiyat anrauni, kawan pamimpin Yahudi, kawan imam kapala anri kawan guru agama bakumpul, balalu Yesus nainsing ma hadapan Pangadilan Agama here.

⁶⁷ “Wara ma kami,” eau here ma hanye, “inun hanyu yiti Raja Panyalamat?” Yesus nuing, “Amun aku iwara ma naun, naun sika puang sagar parisaya.

⁶⁸ Nelang amun aku nunti ma naun, naun sika puang sagar nuing.

⁶⁹ Kude mulai itati Anak Murunsia sagar maharung hang tiba kawan Alatalla sa Ang Uweng Tikas Kuasa.”

⁷⁰ Here katuluh kaeau, “Amun kalayiru, hanyu yiti Anak Alatalla?” Yesus nuing, “Kalayiru eau naun.”

⁷¹ Balalu here kaeau, “Puang parlu lagi saksi! Takam haut karengei teka mulutni raerai!”