LUKAS 20 - KABAR MAEH MA HANYU JANJI WAU

Tuntian neu hak Yesus

¹ Hang hinra anrau, tawuk Yesus ganjah ngajar nelang iwara Kabar Maeh teka Alatalla ma kawan ulun hawuang Lewu Tuhan. Kawan imam kapala, kawan guru agama, baya kawan pamimpin Yahudi, hawi

² palus kaeau ma Yesus, “Suba wara ma kami makai dasar inun hanyu ngulah katuluhni yiti? Hie sa ngami hak yiru ma hanyu?”

³ Yesus nuing, “Aku hamen nunti. Wara ma aku,

⁴ Hi Yohanes mambaptis makai hak hie? Alatalla atawa murunsia?”

⁵ Here balalu bagurayang, “Amun takam kaeau, ‘Makai hak Alatalla,’ hanye sagar kaeau, ‘Amun kalayiru, wuah inun naun puang parisaya ma hanye?’

⁶ Kude amun takam kaeau, ‘Makai hak murunsia,’ katuluh ulun sagar medak takam makai watu, daya here parisaya hi Yohanes erang kaulun nabi,”

⁷ Balalu here nuing, “Kami puang karasa.”

⁸ Balalu Yesus kaeau ma here, “Amun kalayiru aku pada puang sagar iwara ma naun makai hak hie aku ngulah katuluhni yiti.”

Rarapisan neu kawan ulun ngakarun kabun anggur

⁹ Yesus nyarita ma kawan ulun yiru, rarapisan kalayiti, “Naan erang kaulun ngamule anggur hang erang kalamar kabun. Hanye pisewa kabun yiru ma papire kaulun ngakarun balalu tulak ma negeri lain nelang lawah muneng hang yaru.

¹⁰ Tawuk haut wayah mutik wua anggur, ampun kabun yiru ngirim palayanni ma kawan ulun ngakarun yiru nampan narime bagianni. Kude kawan ulun ngakarun yiru ngahanangen palayan yiru palus nunyu hanye mudi anri wawelang.

¹¹ Balalu ampun kabun yiru ngirim lagi erang kaulun palayan sa lain; kude palayan yiru pada nakahanangen nelang nahina daya kawan ulun ngakarun yiru, balalu nahuyu mudi anri wawelang.

¹² Udi yiru ampun kabun yiru ngirim palayan sa katelu. Kude palayan yiru pada nakahanangen daya kawan ulun ngakarun yiru palus naumpe maluar kabun yiru.

¹³ Akhirni ampun kabun yiru kaeau, ‘Inun lagi sa harus naulahku? Aku sagar ngirim anakku raerai sa nasintaku. Himat hanye sagar nahormat!’

¹⁴ Kude tawuk kawan ulun ngakarun kabun yiru kadinung anak ampun kabun yiru, here kaeau sameh here, ‘Iti hanye ahli warisni. Hayu takam munu hanye, nampan takam kaiyuh warisanni.’

¹⁵ Balalu here nyujut hanye ma luar kabun yiru palus munu hanye.” Balalu Yesus nunti, “Nah, amun ampun kabun yiru mudi, inun sa sagar naulahni anri kawan ulun ngakarun yiru?

¹⁶ Himat hanye sagar hawi palus munu kawan ulun ngakarun yiru, balalu nyarah kabun yiru ma kawan ulun ngakarun sa lain.” Karengei yiru, kawan ulun yiru kaeau ma Yesus, “Himat puang!”

¹⁷ Yesus maneneng here balalu kaeau, “Amun kalayiru, inun aratini ayat Surat Barasis yiti? ‘Watu sa puang tapakai daya tukang bangunan, haut jari watu sa mambatang.’

¹⁸ Katuluh ulun sa lawu ma watu yiru sagar hansur; nelang hie sa katekan watu yiru sagar tapipis jari habu.”

Neu bayar pajak

¹⁹ Kawan guru agama anri kawan imam kapala kataru himat rarapisan yiru natuju Yesus ma here. Daya yiru here ngunu nyamba hanye tawuk yiru jua, kude here takut ma ulun rama.

²⁰ Balalu here ngantara kasampatan sa maeh. Here nyuruk ulun nampan kala wangun ulun sa bujur atei, palus nunyu kawan ulun yiru hanjabak Yesus makai kawan tuntian, nampan here kaiyuh nyarah hanye ma kawajiban nelang kakuasaan gubernur.

²¹ Balalu kawan ulun sa haut nasuruk yiru kaeau ma Yesus, “Guru, kami karasa kawan sa naeau nelang naajar dayanu yiru bujur. Kami karasa pada hanyu ngajar anri tarus tarang neu kabahumen Alatalla ma murunsia, daya hanyu puang ninung wangun ulun.

²² Daya yiru suba hanyu iwara ma kami, manurut aturan agama takam, inun iyuh bayar pajak ma Kaisar atawa puang?”

²³ Kude Yesus karasa akal here. Daya yiru hanye kaeau,

²⁴ “Suba tantarang ma aku erang kadiki duit perak. Gambar nelang ngaran hie yiti?” “Kaisar!” tuing here.

²⁵ “Amun kalayiru,” eau Yesus ma here, “ami ma Kaisar, inun sa wat Kaisar nelang ma Alatalla, inun sa wat Alatalla.”

²⁶ Batantu tuu hang hadapan ulun rama yiru here puang tau kahaba sunah isa kahalaen hang Yesus. Here balalu suni nelang mandam daya lengan tuingni yiru.

Neu kaelanen teka pampatei

²⁷ Papire kaulun teka golongan Saduki hawi nunung Yesus. (Here hanyeyiru golongan sa kaeau himat ulun matei puang sagar welum mulek.) Here nunti ma Yesus,

²⁸ “Guru, hi Moses nyurat hukum yiti ma takam: Amun erang kaulun upu matei nelang hanye puang uweng anak, balalu pulaksanaini harus narangan waluni nampan kaiyuh katurunan ma ulun sa haut matei yiru.

²⁹ Suah naan pitu kaulun ipulaksanai. Sa taraulu narangan, balalu matei anri puang uweng anak.

³⁰ Udi hie sa karueh narangan waluni, kude hanye pada matei anri puang uweng anak.

³¹ Hal sa sameh kalayiru pada anri pulaksanaini sa katelu nelang palus pada hampe sa kapitu.

³² Akhirni wawei yiru matei pada.

³³ Hang anrau ulun matei naele kamulek, darangan hie wawei yiru? Daya kapapituni haut narangan hanye.”

³⁴ Yesus nuing, “Kawan ulun sa welum itati narangan,

³⁵ kude kawan ulun sa patut neu naele nasamelum kamulek teka pampatei nelang welum hang jaman udi ati, here puang narangan.

³⁶ Kaadaan here kala malekat, nelang puang tau matei. Here hanyeyiru kawan anak Alatalla, daya here haut naele welum kamulek teka pampatei.

³⁷ Hi Moses raerai tarang tuu iwara neu ulun matei sagar naele welum mulek. Hawuang suratni neu jubut sa malelap yiru hanye ngeau Tuhan yalah ‘Alatalla Abraham, Alatalla Ishak nelang Alatalla Yakub’.

³⁸ Nah, Alatalla yiru puang Alatalla ulun matei! Hanye Alatalla kawan ulun sa welum! Daya ma Alatalla, ulun katuluh welum.”

³⁹ Papire guru agama kaeau, “Lengan tuing Guru maeh tatuu.”

⁴⁰ Daya yiru here puang heei lagi nunti inun heneng ma Yesus.

Neu Raja Panyalamat

⁴¹ Yesus nunti ma here, “Inun tau naantuh Raja Panyalamat yiru katurunan Dawid?

⁴² Padahal hi Dawid raerai kaeau hawuang buku Mazmur, ‘Tuhan kaeau ma Tuhanku: Harung hang tiba kawanku,

⁴³ hampe aku ngulah kawan musuhnu manyarah talau ma hanyu.’

⁴⁴ Jadi amun hi Dawid ngeau Raja Panyalamat yiru ‘Tuhan’, kewangun hanye katurunan Dawid?”

Paringatan nampan bahati-hati nadap kawan guru agama

⁴⁵ Ganjah kawan ulun rama nyanrengei Yesus bapaner, hanye kaeau ma kawan ulun sa umba hanye,

⁴⁶ “Mamaeh nadap kawan guru agama. Here katuju pasiar makai jubah sa ambau, nelang katuju nahormat hang kawan pasar. Here katuju kawan unengan tahormat hawuang lewu sumbayang anri hang kawan pesta.

⁴⁷ Here nipu ngakal kawan walu-randa nelang hanrampas lewuni. Nelang pakai nutup kajahaten here yiru, here badoa ambau-ambau! Hukuman here hanrian maweat!”