LUKAS 18 - KABAR MAEH MA HANYU JANJI WAU

Rarapisan wawei walu anri hakim

¹ Udi yiru Yesus nyarita isa rarapisan pakai ngajar kawan ulun sa umba hanye nampan here saratang badoa nelang ada putus asa.

² Yesus kaeau, “Hang isa tumpuk naan erang kaulun hakim sa puang takut ma Alatalla, nelang puang paraduli anri hie-hie.

³ Hang tumpuk yiru naan pada erang kaulun wawei walu sa kakete mangadap hakim yiru ilaku pakarani nakarawah. ‘Karawah aku nadap musuhku,’ eau wawei walu yiru.

⁴ Papire tawuk lawahni hakim yiru puang hamen ngarawah wawei walu yiru. Kude akhirni hakim yiru bapikir, ‘Biar aku puang takut Alatalla nelang puang paraduli ma hie-hie,

⁵ kude daya wawei walu yiti eter nganggu aku, labis maeh aku ngarawah pakarani. Amun puang, hanye himat eter hawi nelang ngampi deruh aku.’ ”

⁶ Balalu Tuhan kaeau, “Pantaru inun sa naeau daya hakim sa puang adil yiru!

⁷ Nah, inun Alatalla puang sagar ngarawah pakara ulun pidianni raerai sa nanterau hanye kaanrau kamalem? Inun hanye sagar ngampambau waktu neu ngarawah here?

⁸ Parisayaleh: Hanye sagar hinang ngarawah pakara here! Kude amun Anak Murunsia hawi, inun magun naan kahaba ulun sa parisaya ma hanye hang dunia yiti?”

Rarapisan ulun Farisi anri panagis pajak

⁹ Yesus nyarita pada rarapisan yiti sa natuju ma ulun sa nganggap ulun lain randah, kude ngingkam dirini raerai sa maeh.

¹⁰ Eau Yesus, “Naan rueh kaulun tulak ma Lewu Tuhan lepuh badoa. Saisa ulun Farisi, sa lainni erang kaulun panagis pajak.

¹¹ Ulun Farisi yiru minri ngaraerai palus badoa, ‘U Alatalla, aku ngantuh tarima kasih ma hanyu, daya aku puang kala ulun lain, sa sarakah, sulas atawa ibela. Aku ngantuh syukur daya aku puang kala panagis pajak yiru.

¹² Aku puasa rueh kali erang minggu, nelang aku manyarah ma hanyu sapersapuluh teka katuluh iyuh-juatku.’

¹³ Kude panagis pajak yiru minri lawit-lawit, likan puang heei mihangut ma langit. Nelang ngurut dada hanye kaeau, ‘U Alatalla, palelu aku, ulun badosa yiti!’ ”

¹⁴ “Parisayaleh,” eau Yesus, “tawuk here mudi ma lewu, panagis pajak yiru sa natarime daya Alatalla puang ulun Farisi yiru. Daya tatiap ulun sa ngampambau dirini sagar nasanrandah; nelang tatiap ulun sa nyanrandah dirini sagar naampambau.”

Yesus mamberkat kawan iya

¹⁵ Naan kawan ulun nginsing kawan iya rumis nunung Yesus nampan hanye manjamah palus mamberkat here. Tawuk kawan ulun sa umba Yesus kadinung yiru, here nyangit kawan ulun yiru.

¹⁶ Kude Yesus nerau kawan iya yiru balalu kaeau ma kawan ulun sa umba hanye, “Elahni kawan iya hawi nunung aku! Ada nguring here, daya ulun samasam yiti sa jari ulun pidian wat Alatalla.

¹⁷ Itung! Ulun sa puang nadap Alatalla kala erang kaulun iya rumis, puang sagar jari ulun pidian wat Alatalla.”

Neu ulun tatau

¹⁸ Erang kaulun pamimpin Yahudi nunti ma Yesus, “Guru sa maeh, inun saharus naulahku nampan aku kaiyuh narime pamelum sajati palus ma kalalawah?”

¹⁹ “Wuah inun hanyu kaeau aku maeh?” tunti Yesus ma hanye. “Puang uweng sa maeh, sa lain teka Alatalla raerai.

²⁰ Hanyu haut karasa kawan parentah Alatalla: ‘Ada ibela, ada munu ulun, ada ngalat, ada ipusu, nelang hormat ambah anri inehnu.’ ”

²¹ “Katuluh parentah yiru haut natampalusku kalemah aku lagi iya,” tuing ulun yiru.

²² Karengei kalayiru Yesus kaeau, “Magun naan isa hal sa harus naulahnu: Ari katuluh miliknu, ami duitni ma ulun paua, balalu hanyu sagar kaiyuh harata hang surga. Udiyiru hawileh umba aku.”

²³ Kude tawuk ulun yiru karengei yiru, hanye mahanang atei daya hanye tatau tatuu.

²⁴ Yesus karasa ulun yiru mahanang atei, daya yiru hanye kaeau, “Mahadin tatuu ma ulun tatau jari ulun pidian wat Alatalla!

²⁵ Labis murah erang kaukui unta masuk luwang pilus, teka erang kaulun tatau masuk Dunia Wau Wat Alatalla!”

²⁶ Kawan ulun sa karengei Yesus kaeau kalayiru nunti, “Amun kalayiru, hie sa tau salamat?”

²⁷ Yesus nuing, “Sa puang tau pada ma murunsia, tau pada ma Alatalla!”

²⁸ Balalu hi Petrus kaeau, “Dinung! Kami haut nanan lewu rean nampan umba hanyu.”

²⁹ “Parisayaleh!” eau Yesus. “Ulun sa haut nanan lewuni, atawa daranganni, atawa pulaksanaini atawa ambah inehni atawa kawan anakni daya malayanni Alatalla,

³⁰ ulun yiru sagar nawaleh papire kali lipat hang wayah itati, nelang hang jaman udi ati hanye sagar naami pamelum sajati palus kalalawah.”

Yesus maner neu pampateini ma katelu kalini

³¹ Yesus ngumpul kadua walas kawan ulun sa umba hanye ngaraerai, balalu kaeau, “Rengei! Takam itati nuju Yerusalem. Hang yaru, katuluh sa nasurat kawan nabi neu Anak Murunsia, sagar tulus.

³² Hanye sagar nasarah ma kawan ulun puang Yahudi, sa sagar ngakiek, mahina, nelang nura hanye.

³³ Here sagar nyiksa palus munu hanye, kude hang anrau katelu, hanye sagar welum kamulek.”

³⁴ Katuluh yiru puang budas kawan ulun sa umba Yesus kataru. Arati teka kawan lenganni yiru narasia teka here. Here puang kataru neu inun sa napanerni yiru.

Yesus nyamare erang kaulun tukang sadakah sa pehe

³⁵ Tawuk Yesus kai hampe hang Yerikho, erang kaulun pehe rahat maharung laku sadakah hang iring lalan.

³⁶ Tawuk hanye karengei ulun rama yiru mitah, hanye nunti, “Naan inun?”

³⁷ “Yesus, ulun Nazaret yiru, mitah,” eau here ma hanye.

³⁸ Balalu ulun pehe yiru nerau, “Yesus, anak Dawid! Palelu aku!”

³⁹ Kawan ulun sa takia dahulu, nyangit hanye nelang nunyu hanye suni. Kude hanye nanterau magin mehet lagi, “Anak Dawid! Palelu aku!”

⁴⁰ Yesus tarie balalu nunyu ulun nginsing ulun pehe yiru nunung hanye. Tawuk hanye hampe, Yesus nunti,

⁴¹ “Inun sa nakabahumennu naulahku anri hanyu?” “Tuan,” tuing ulun pehe yiru, “Aku sindi kadinung.”

⁴² Balalu Yesus kaeau, “Amun kalayiru, dinungleh! Daya hanyu parisaya ma aku, hanyu ware.”

⁴³ Balalu sitaitu hanye tau kadinung, palus hanye umba Yesus nelang ngantuh tarima kasih ma Alatalla. Tawuk ulun rama yiru kadinung hal yiru, here katuluh nawat Alatalla.