LUKAS 13 - KABAR MAEH MA HANYU JANJI WAU

Amun puang batobat teka dosa, die binasa

¹ Hang tawuk yiru ulun nyarita ma Yesus neu papire ulun Galilea sa nawunu daya Pilatus, tawuk here rahat nyarah parapah ma Alatalla.

² Karengei sarita yiru, Yesus kaeau, “Daya kawan ulun Galilea yiru nawunu kalayiru, naun minda yiru buktini here diwi badosa teka katuluh ulun Galilea sa lain?

³ Budas puang! Kude itungleh: amun naun puang batobat teka kawan dosa naun, naun katuluh pada sagar matei, kala here.

⁴ Pada kalaawe anri walu walas kaulun sa matei hang Siloam, tawuk manara yiru meat here? Naun minda yiru manunjuk here diwi badosa teka katuluh kawan ulun lain sa muneng hang Yerusalem?

⁵ Budas puang! Hinra lagi aku kaeau: Amun naun puang batobat teka kawan dosa naun, katuluh naun pada sagar matei kala here.”

Rarapisan kakau ara sa puang mua

⁶ Udi yiru Yesus nyarita pada rarapisan yiti, “Naan erang kaulun uweng kakau ara hang kabun anggurni. Hang hinra anrau hanye tulak ngantara wua ara yiru, kude puang kahaba sunah erang kawua.

⁷ Balalu, hanye kaeau ma tukang kabunni, ‘Dinung, haut telu taun aku hawi ngantara wua ara hang kakau ara yiti, kude aku puang kahaba sunah erang kawua. Teweng kakau ara yiru! Mamus hanye welum hang ambau tane yiti ekat nangalis tenak teka tane!’

⁸ Kude tukang kabun yiru nuing, ‘Elahni hanye welum erang taun lagi, Tuan. Aku sagar nyangkul tane hang kalilingni nelang namur pupuk.

⁹ Gere taun hadap hanye mua. Kude amun puang, iyuh Tuan nunyu newengni.’ ”

Yesus nyamare erang kaulun wawei bungkuk hang anrau Sabat

¹⁰ Hang hinra anrau Sabat, Yesus ngajar hang isa lewu sumbayang.

¹¹ Hang yiru naan erang kaulun wawei haut walu walas taun sakit, daya naan roh jahat hawuang tengani. Wawei yiru bungkuk nelang budas puang tau minri mawitu.

¹² Tawuk Yesus kadinung wawei yiru, Yesus nerau hanye, “Ineh, panyakitnu haut ware!”

¹³ Balalu Yesus hanrapak tanganni hang ambau wawei yiru, palus hang tawuk yiru pada hanye minri mawitu balalu nawat Alatalla.

¹⁴ Pamimpin lewu sumbayang yiru sangit, daya Yesus nyamare ulun hang anrau Sabat, daya yiru hanye kaeau ma kawan ulun, “Naan enem anrau pakai bagawi; hawileh hang kawan anrau yiru nampan nasamare, ada hang anrau Sabat!”

¹⁵ Tuhan nuing, “Naun yiti pura-pura! Hang anrau Sabat katuluh ulun nyanepah sapi atawa kaledai teka kandang palus nginsing kaluar nampan nguut ranu.

¹⁶ Nah, hang yiti itati naan erang kaulun wawei turunan Abraham, sa haut walu walas taun lawahni tahuruk daya Iblis. Inun hanye puang iyuh nalapas teka hurukan yiru hang anrau Sabat?”

¹⁷ Lengan tuing Yesus yiru ngulah kawan ulun sa nawan Yesus umangan tatuu; kude katuluh kawan ulun sa lain sanang kadinung kawan katuluh kaajaiban sa naulah Yesus.

Rarapisan diki sasawi

¹⁸ Yesus nunti, “Amun Alatalla marentah, kalaawe kaadaanni? Anri inun aku tau mambandingni?

¹⁹ Kaadaanni kala rarapisan yiti. Erang kadiki sasawi naalap daya erang kaulun balalu naamule hang kabunni. Diki yiru welum palus jari kakau, balalu kawan wurung ngulah hanaini hang kawan raan kakau yiru.”

Rarapisan ragi

²⁰ Hinra lagi Yesus nunti, “Amun Alatalla marentah, anri inun aku tau mambanding kaadaanni?

²¹ Kaadaanni kala ragi sa naalap daya erang kaulun wawei balalu nakalut anri epat pulu liter tepung, hampe kamer katuluhni.”

Wanawang sa hipit

²² Hawuang pakiaan ma Yerusalem, Yesus mitah kawan tumpuk anri desa nelang ngajar.

²³ Balalu naan ulun itunti ma hanye, “Guru, inun ekat butit ulun sa sagar nasalamat?” Yesus nuing,

²⁴ “Ware naun ngakali masuk mitah wanawang hipit. Daya, itung! Rama ulun ngakali masuk kude puang kaiyuh.

²⁵ Hang tawuk ampun lewu ambuan palus nutup wanawangni, naun minri hang luar balalu mulai nalitik nelang kaeau, ‘Tuan, uka wanawang ma kami!’ Tuan yiru sagar nuing, ‘Aku puang karasa teka awe naun!’

²⁶ Naun sagar nuing, ‘Kami haut ikuta baya tuan, nelang tuan haut ngajar pada hang kawan lalan hang tumpuk kami!’

²⁷ Kude tuan yiru sagar kaeau lagi, ‘Aku puang karasa teka awe naun. Hulu tulak teka yiti, naun sa ngulah kajahaten!’

²⁸ Hang tawuk naun kadinung hi Abraham, hi Ishak anri hi Yakub anri katuluh nabi arai mihewu hawuang Dunia Wau Wat Alatalla, naun sagar nungkau nelang ngaret kahanangen daya naun raerai nausir ma luar!

²⁹ Ulun rama sagar hawi teka timur nelang teka barat, teka utara nelang teka selatan, palus sagar arai mihewu hawuang Dunia Wau Wat Alatalla.

³⁰ Kapinuuni, naan ulun sa pangahanrianni sa sagar jari ulun sa pangadahuluni, nelang naan ulun sa pangadahuluni sagar jari ulun sa pangahanrianni.”

Yesus maahi ma Yerusalem

³¹ Hang tawuk yiru pada, naan papire ulun Farisi hawi nunung Yesus balalu kaeau, “Ada muneng hang yiti! Hulu ma unengan lain, daya hi Herodes ngaheng munu hanyu.”

³² Yesus nuing, “Hulu wara ma ulun sa puang bariran yiru, ‘Anrau yiti nelang kaiyat uni aku ngusir roh jahat palus nyamare ulun sakit, kude hang anrau katelu, aku sagar nyanyumpuh pagawianku.’

³³ Biar kalayiru aku harus nampalus pada pakiaanku anrau yiti, kaiyat uni anri karuan, daya puang maeh erang kaulun nabi nawunu hang luar Yerusalem.

³⁴ Yerusalem, Yerusalem! Kawan nabi nawununu! Kawan utusan Alatalla pedaknu makai watu hampe matei! Haut pire kali aku ngaheng ngaeh maluk katuluh panduduknu kala manu paunan nyalindung kawan anakni hang kapit elatni, kude hanyu puang hamen!

³⁵ Daya yiru Alatalla puang lagi nyinrah hanyu. Patut hanyu karasa, mulai teka itati hanyu puang sagar kadinung aku lagi, hampe hanyu kaeau, ‘Naberkat hanye sa hawi hawuang ngaran Tuhan.’ ”