LUKAS 10 - KABAR MAEH MA HANYU JANJI WAU

Yesus ngutus pitumpulu kaulun ulun sa umba hanye

¹ Udi yiru Yesus midi pitumpulu kaulun ulun sa umba hanye lagi, balalu ngutus here barueh-barueh dahulu teka hanye ma tiap tumpuk anri kawan unengan sa hamen natunungni.

² “Wasian sa sagar nawasi wahai,” eauni ma here, “kude ulun tukang masini puang rama. Daya yiru, laku ma sa ampun ume nampan hanye ngirim ulun pakai masi hasil tanamanni.

³ Nah, hulu tulak! Aku ngutus naun kala babiri ma penah-penah sarigala.

⁴ Ada nginsing dompet atawa kambut sadakah, atawa sapatu. Ada tarie hang helang lalan neu nabe hie-hie.

⁵ Amun naun masuk ma isa lewu, eau dahulu, ‘Mudah-mudahan damai hawuang lewu yiti.’

⁶ Amun hang yiru naan ulun sa sindi damai, tabe damai naun yiru sagar muneng hang hanye; amun puang, tarik kamulek tabe damainu yiru.

⁷ Uneng leh hang isa lewu. Tarime inun sa nasarungan hang yiru ma naun, daya ulun sa bagawi naan hak narime upani. Ada bapindah teka isa lewu ma lewu sa lain.

⁸ Amun naun hawi ma isa tumpuk nelang hang yaru naun natarime anri maeh, kutaleh inun sa nasarunganni hang yiru ma naun.

⁹ Samare kawan ulun sa sakit hang tumpuk yiru, nelang wara ma kawan ulun hang yiru, ‘Alatalla puang lawah lagi sagar mulai marentah yalah Raja hang penah-penah naun.’

¹⁰ Kude amun naun hawi ma isa tumpuk kude hang yiru naun puang natarime, kaluar ma lalan palus eau,

¹¹ ‘Kawan habu tumpuk naun sa ireket hang pee kami, nakebas kami neu paringatan ma naun. Kude patut naun karasa himat haut rite wayahni Alatalla mulai marentah yalah Raja hang penah naun!’

¹² Itung, hang anrau kiamat, ulun Sodom sagar labis murah naampun daya Alatalla teka ulun tumpuk yiru!”

Kawan tumpuk sa puang parisaya

¹³ “Silaka naun, Korazim! Nelang silaka naun, Betsaida! Atikala kawan kaajaiban sa naulah hang penah-penah naun yiru haut naulah hang tumpuk Tirus anri Sidon, himat kawan ulun hang yaru haut lawah miubah teka kawan dosa here, balalu makai pakaian mahanang atei nelang ngimpeh habu hang ambau ulu here.

¹⁴ Hang anrau kiamat, kawan ulun Tirus anri Sidon sagar labis murah naampun daya Alatalla teka naun.

¹⁵ Nelang naun, Kapernaum! Naun minda, naun sagar nainrik hampe ma surga? Puang! Likan naun sagar naumpe ma naraka!”

¹⁶ Balalu Yesus kaeau ma kawan ulun sa umba hanye, “Ulun sa nyanrengei naun, nyanrengei aku. Ulun sa puang narime naun, puang narime aku. Nelang ulun sa puang narime aku, pada puang narime hanye sa nunyu aku.”

Pitumpulu kaulun ulun sa umba Yesus hawi kamulek

¹⁷ Kapitumpulu kaulun ulun sa umba hanye yiru hawi kamulek anri arai tatuu. “Tuhan,” eau here, “kawan roh jahat sika ngalut nuu ma kami amun kami marentah here makai ngaran Tuhan!”

¹⁸ Yesus nuing, “Aku kadinung Iblis lawu teka langit yalah kelat.

¹⁹ Wuah naun karasa! Aku haut ngami kuasa ma naun nampan naun tau narah anipe anri alimangu nelang nyantepu kawan kakuaten musuh, hampe puang uweng isa tau nyilaka naun.

²⁰ Kude biar kala yiru ada arai daya kawan roh jahat ngalut nuu ma naun. Labis maeh naun arai daya ngaran naun nasatat hang surga.”

Yesus arai

²¹ Hang tawuk yiru pada, Yesus arai gana nakuasai daya Roh Alatalla. Yesus kaeau, “Ambah, Tuhan sa nguasa langit anri tane! Aku batarima kasih ma hanyu daya katuluhni yiru narasianu teka kawan ulun sa pandai nelang bailmu, kude natantarangnu ma kawan ulun sa puang tapalajar. Yirulah sa ngampi sanang atei Ambah.

²² Ala katantuluh haut na sarah Ambah ma aku. Puang sunah erang kaulun kataru Anak salain teka Ambah. Puang uweng pada sakataru Ambah salain teka Anak; anri kawan ulun sa ma hanye Anak yiru hamen iwara Ambah.”

²³ Balalu Yesus ikulik ma kawan ulun sa umba hanye, udi hie kaeau ma here raerai, “Bauntung naun daya haut kadinung sa dinung naun itati.

²⁴ Itung naun: Rama nabi anri raja sindi ninung sa dinung naun itati kude here puang kadinung yiru. Here sindi karengei sa rengei naun itati kude here puang karengei yiru.”

Rarapisan ulun Samaria sa maeh atei

²⁵ Udi yiru erang kaulun guru agama hawi lepuh hanjabak Yesus. Hanye nunti, “Guru, inun sa harus naulahku nampan aku tau narime pamelum sajati palus ma kalalawah?”

²⁶ Yesus nuing, “Inun sa nasurat hawuang Surat Barasis? Kala awe manurut hanyu neu hal yiru?”

²⁷ Ulun yiru nuing, “ ‘Sinta Tuhan Alatallanu anri sagalis ateinu, anri sagalis amiruenu, anri katuluh kakuatennu, nelang anri katuluh akalnu,’ nelang ‘Sinta sasamehnu kala hanyu sinta tenga dirinu raerai.’ ”

²⁸ “Tuingnu yiru bujur,” eau Yesus. “Ulah yiru, himat hanyu sagar welum.”

²⁹ Kude guru agama yiru hamen ngampi bujur dirini. Hanye nunti, “Hie sasamehku yiru?”

³⁰ Yesus nuing, “Naan erang kaulun upu minau teka Yerusalem ma Yerikho. Hang helang lalan hanye nasarang parampok, katuluh milikni narampas, hanye nakahanangen bilang matei, balalu natanan ripu hang lalan anri tunrung tamam.

³¹ Kabalujuran erang kaulun imam takia pada hang lalan yiru. Tawuk hanye kadinung ulun yiru, hanye basingkir ma sabarang lalan, balalu palus takia.

³² Kala yiru pada anri erang kaulun Lewi sa takia hang yiru: tawuk hanye kadinung ulun yiru, hanye nyanriteni neu mantaruni. Kude hanye pada basingkir masabarang lalan balalu palus takia.

³³ Kude udi yiru erang kaulun Samaria sa rahat hang pakiaan, mitah pada hang yiru. Tawuk hanye kadinung ulun yiru, ateini lenuh daya paahi.

³⁴ Balalu hanye nyanrite ulun yiru balalu ngabarasis kawan batanni makai anggur palus naobatni makai minyak, udi yiru kawan batan yiru nababatni. Udi yiru hanye ngenat ulun yiru maambau kaledaini, balalu nginsing hanye ma isa losmen palus marawat hanye.

³⁵ Kaiyat anrauni hanye ngalap rueh kadiki duit perak palus ngamini ma pamilik panginapan yiru nelang kaeau, ‘Rawat hanye, nelang amun naan kawan ongkos lain, yati sagar aku bayar amun aku haut mulek ma yati.’ ”

³⁶ Udi yiru Yesus nyanuput saritani yiru makai tuntian kala yiti, “Teka katelu ulun yiru sa awe, manurut hanyu sa batindak jari sasameh murunsia teka ulun sa wuah rampuk yiru?”

³⁷ Guru agama sa natunti yiru nuing, “Ulun sa haut ngarawah ulun yiru.” “Nah, hulu tulak nelang ulah kala yiru pada!” eau Yesus.

Yesus ganta hi Marta anri hi Maria

³⁸ Udi yiru Yesus baya kawan ulun sa umba hanye nampalus pakiaan, balalu hampe isa desa. Hang yiru erang kaulun wawei, bangaran hi Marta, manerau hanye ma lewuni.

³⁹ Hi Marta uweng pulaksanai wawei bangaran hi Maria. Hi Maria yiti maharung rite Tuhan Yesus nyanrengei kawan ajaranni.

⁴⁰ Kude hi Marta sibuk tuu anri pagawian lewu reanni. Hanye tulak naripi Yesus balalu kaeau, “Tuhan, inun Tuhan puang paraduli hi Maria maladar aku bagawi raerai? Huyu hanye ngarawah aku!”

⁴¹ “Marta, Marta!” tuing Tuhan. “Hanyu khawatir nelang sibuk mamikir iru inai;

⁴² padahal sa penting ekat isa. Nelang hi Maria haut midi sa maeh, sa puang sagar naalap teka hanye.”