LUKAS 1 - KABAR MAEH MA HANYU JANJI WAU

Pandahuluan

¹ Teofilus sa maeh budi, Rama ulun haut ngakali nyurat anri taatur neu kawan kajadian sa haut jari hang penah takam.

² Here nyurat sameh kala sa nasarita ma takam daya kawan ulun sa kadinung raerai kawan kajadian yiru teka pamulaanni, balalu iwara kabar yiru.

³ Udi aku anri bahimat nyalidik katuluhni yiru teka pamulaanni, aku nganggap patut nampan nyurat isa laporan sa tasusun maeh ma hanyu.

⁴ Aku ngulah yiru, nampan hanyu karasa batantu inun sa haut naajar ma hanyu samula kapinuu.

Iwara neu hi Yohanes Pambaptis sagar nakayaan

⁵ Tawuk hi Herodes jari raja daerah Yudea, naan erang kaulun imam bangaran hi Zakaria. Hanye tamasuk babuhan kawan imam Abia. Daranganni bangaran hi Elizabet, pada katurunan imam.

⁶ Pamelum here rueh pana darangan yiru ngampi sanang atei Alatalla. Kararuehni nampalus katuluh parentah nelang hukum Tuhan anri sagalis-galisni.

⁷ Here puang uweng anak daya hi Elizabet tamanang nelang here kararuehni haut matueh.

⁸ Hang hinra anrau, tawuk babuhan Abia kaiyuh giliran, hi Zakaria nampalus tugas kala imam hang hadapan Alatalla.

⁹ Makai undian, kala biasa naulah daya kawan imam, hi Zakaria natutui neu masuk mawuang Lewu Tuhan balalu nutung kamanyan.

¹⁰ Parahatan upasara nutung kamanyan natampalus, ulun rama badoa hang luar.

¹¹ Hang tawuk yiru malekat Tuhan nantarang tengani ma hi Zakaria. Malekat yiru minri hang tiba tuhi kawan meja unengan nutung kamanyan.

¹² Tawuk hi Zakaria kadinung malekat yiru, hanye embah nelang takut.

¹³ Kude malekat yiru kaeau, “Ada takut, Zakaria! Alatalla haut nyanrengei doanu. Darangannu hi Elizabet sagar ngayaan erang kaulun iya upu. Hanyu harus ngampungaran hanye hi Yohanes.

¹⁴ Hanyu sagar arai tatuu nelang rama ulun sagar mihewu-miharui amun iya yiru yati nakayaan!

¹⁵ Hanye sagar jari ulun hante manyu paninungan Tuhan, nelang hanye puang sagar nguut anggur atawa minuman keras. Nuku hengka nakayaan hanye sagar mahuang Roh Alatalla.

¹⁶ Rama ulun Israel sagar naayakni mulek nunung Alatalla, Tuhan here.

¹⁷ Hanye sagar jari saruhan Tuhan sa mansing nelang bakuasa kala hi Elia. Hanye sagar ngampi damai nangkaeh ambah anri anak, nelang ulun sa puang ngalut nuu sagar napimpin dayani mulek ma lalan pikiran sa mawitu bujur. Anri kala yiru hanye nyadia isa umat sa patut ma Tuhan.”

¹⁸ “Kala awe aku tau karasa hal yiru sagar jari?” tunti Zakaria ma malekat yiru. “Aku haut matueh, nelang daranganku pada haut matueh.”

¹⁹ Malekat yiru nuing, “Aku yiti hi Gabriel. Aku malayanni Alatalla nelang hanye sa nunyu aku nampe kabar yiti ma hanyu.

²⁰ Inun sa naeauku, sagar jari hang tawukni. Kude daya hanyu puang parisaya, hanyu die puang tau pantane; hanyu sagar muna hampe inun sa naeauku yiti tulus.”

²¹ Hang tawuk yiru ulun rama magun nganrei hi Zakaria. Here wauh wuah inun hanye kala yiru lawahni hawuang Lewu Tuhan.

²² Tawuk hanye kaluar, hanye puang tau pantane lagi anri here. Hanye santar ngami isyarat makai tanganni, nelang tatap muna. Balalu ulun rama kataru himat hanye haut kadinung isa paninungan hawuang Lewu Tuhan.

²³ Dami haut galis tawuk tugasni hang Lewu Tuhan, hi Zakaria balalu mudi ma lewuni.

²⁴ Puang hampe lawah udi yiru, hi Elizabet daranganni mihawuntung, balalu bakurung hang lewu dime wulan lawahni.

²⁵ Hanye kaeau, “Akhirni Tuhan ngarawah aku nelang muhut pihinaku.”

Waraan neu Yesus sagar nakayaan

²⁶ Tawuk hi Elizabet haut mihawuntung enem wulan, Alatalla nunyu malekat Gabriel tulak ma Nazaret, isa tumpuk hang daerah Galilea.

²⁷ Gabriel nautus nunung erang kaulun wawei bujang paruna, bangaran hi Maria. Wawei bujang paruna yiru haut batunangan anri kaulun bangaran hi Yosef, turunan Raja Dawid.

²⁸ Malekat yiru hawi nunung hi Maria palus kaeau, “Tabe, hanyu sa naberkat Tuhan anri sara sa istimewa! Tuhan baya anri hanyu!”

²⁹ Karengei lengan malekat yiru hi Maria embah, hampe hanye itunti hawuang ateini inun maksud lengan tabe yiru.

³⁰ Maka malekat yiru kaeau ma hanye, “Ada takut, Maria, daya hanyu nakatujuen atei Alatalla.

³¹ Hanyu sagar mihawuntung nelang ngayaan erang kaulun iya, sa harus hanyu ngampungaranni Yesus.

³² Hanye sagar jari hante mulia nelang sagar naantuh Anak Alatalla sa Panga Ambau. Tuhan Alatalla sagar ngulah hanye jari raja kala Raja Dawid, datu-ninini.

³³ Hanye sagar marentah kala raja hang ambau katurunan Yakub hampe kalalawahni. Karajaanni puang sagar jumpuh.”

³⁴ “Kude aku magun bujang paruna,” eau Maria ma malekat yiru, “kala awe hal yiru tau jari?”

³⁵ Malekat yiru nuing, “Roh Alatalla sagar hawi ma hanyu, nelang kuasa Alatalla sagar nyalehup hanyu. Yiru sababni iya sa sagar nakayaan yiru sagar naantuh barasis, Anak Alatalla.

³⁶ Ingat: hi Elizabet, kula waraganu yiru haut mihuwuntung enem wulan, biar hanye haut matueh nelang ulun kaeau hanye tamanang.

³⁷ Daya ma Alatalla puang uweng sa mustahil.”

³⁸ Balalu hi Maria kaeau, “Aku yiti walah Tuhan; mara jari hang aku kala sa naeau dayanu.” Balalu malekat yiru tulak nanan hi Maria.

Hi Maria ganta hi Elizabet

³⁹ Puang lawah udi yiru, hi Maria tulak ma isa tumpuk hang Yudea hang daerah pagunungan.

⁴⁰ Hanye tulak ma lewu Zakaria, tawuk hanye masuk, hanye nampe tabe ma hi Elizabet.

⁴¹ Dami hi Elizabet karengei lengan tabe Maria, iya hawuang wuntung Elizabet yiru bagarak. Balalu hi Elizabet nakuasai daya Roh Alatalla,

⁴² balalu nerau, “Hanyu sa panga naberkat hengka katuluh kawan wawei! Naberkat iya sa sagar nakayaan dayanu yiru!

⁴³ Hie aku yiti hampe ineh Tuhan hawi nunung aku?

⁴⁴ Kala yiru aku karengei lengan tabenu, iya hawuang wuntungku bagarak arai mihewu.

⁴⁵ Sanang marauh hanyu, daya parisaya inun sa naeau Tuhan ma hanyu yiru sagar tulus!”

Hi Maria ngantuh tarima kasih

⁴⁶ Hi Maria kaeau, “Ateiku nawat Tuhan,

⁴⁷ nelang amirueku mihewu-miharui daya Alatalla Panyalamatku.

⁴⁸ Hanye kaitung aku walahni sa hina! Mulai teka itati katuluh bangsa ngantuh aku sanang marauh.

⁴⁹ Daya Alatalla sa ang Uweng Tikas Kuasa nampalus kawan hal sa hante ma aku. Barasis ngaranni.

⁵⁰ Turun-tamurun Tuhan saratang malelo miahi ma ulun sa takut anri hanye.

⁵¹ Makai tanganni sa mansing hanye ngampi pasai ulun sakah sumbung, nelang ngampi sabak ransana here.

⁵² Kawan raja naampinauni teka takhta nelang ulun hina naenat naampambau.

⁵³ Ulun kajuju naampiwisingni makai kawan pikaeh, sa tatau nausir anri tangan lawang.

⁵⁴ Hanye ngarawah Israel walahni, manyu janji sa naulahni anri datu nini takam.

⁵⁵ Tuhan puang ngubah janjini, hanye maeh atei anri hi Abraham nelang anri katurunanni hampe kalalawahni.”

⁵⁶ Leu telu wulan lawahni hi Maria muneng baya hi Elizabet, wau hanye mudi ma lewuni.

Hi Yohanes Pambaptis nakayaan

⁵⁷ Dami hampe wayahni ma hi Elizabet kayaan. Hanye ngayaan erang kaulun iya upu.

⁵⁸ Kawan tatangga anri kula waragani karengei tuu leha kaehni Tuhan anri hi Elizabet, balalu here pada umba arai baya hanye.

⁵⁹ Tawuk iya yiru baumur walu anrau, here hawi neu nyunat hanye. Here hamen ngampi ngaran iya yiru hi Zakaria ngalut kala ngaran Ambahni,

⁶⁰ kude inehni kaeau, “Puang! Hanye harus naampingaran hi Yohanes.”

⁶¹ “Puang sunah erang kaulun teka kula waraganu bangaran kala yiru,” eau here ma hanye.

⁶² Balalu makai isyarat, here nunti ma hi Zakaria manyu bahumni, hie ngaran anakni yiru.

⁶³ Hi Zakaria laku isa batu tulis balalu nyurat, “Ngaranni hi Yohanes.” Here katuluh mandam.

⁶⁴ Hang tawuk yiru jua hi Zakaria tau pantane lagi palus nawat Alatalla.

⁶⁵ Kawan tatanggani uras takut, nelang kabar yiru tasiar ma katuluh daerah pagunungan Yudea.

⁶⁶ Katuluh ulun sa karengei hal yiru itunti hawuang ateini, “Jari inun iya yiru yati?” Daya Tuhan nyinrah hanye.

Hi Zakaria nampe kabar teka Tuhan

⁶⁷ Hi Zakaria, ambah iya yiru, nakuasai daya Roh Alatalla hampe hanye nampe pesen teka Tuhan. Hanye kaeau,

⁶⁸ “Mara takam nawat Tuhan, Alatalla bangsa Israel! Hanye haut hawi ngarawah umatni nelang nyanepah here.

⁶⁹ Hanye ngami ma takam panyalamat sa mansing, turunan Dawid, walahni.

⁷⁰ Sadi hurap itetei kawan nabi pidianni, Tuhan haut ngami janjini

⁷¹ neu nyalamat takam teka musuh takam nelang teka kuasa kawan ulun sa muar takam.

⁷² Pakai nantarang pikaeh ateini ma laluhur takam, janjini sa barasis yiru sagar natampalusni.

^73-74 Hanye basumpah anri hi Abraham ambah takam, nelang bajanji neu nyalamat takam teka musuh takam, nampan takam anri puang takut malayanni hanye

⁷⁵ saratang ngampu hanye nelang ngampi sanang ateini salawah umur takam welum.

⁷⁶ Hanyu, u anakku, sagar naantuh nabi Alatalla sa Panga Ambau. Hanyu nautus nahuluan Tuhan pakai nawah lalan ma hanye,

⁷⁷ pakai iwara ma umatni here sagar nasalamat, amun Alatalla haut ngampun kawan dosa here.

⁷⁸ Tuhan takam maeh atei nelang pamiahi; pakai nyalamat takam hanye hawi. Kala mate anrau hulet hang kaiyat anrau,

⁷⁹ kala yiru hanye ngami piraaini ma katuluh ulun sa welum hang piieng nelang katakuten. Hanye nganyak takam hang lalan sa nuju kadamaian.”

⁸⁰ Anak Zakaria yiru batambah hante nelang batambah kuat rohni. Hanye muneng hang padang gurun, hampe wayahni hanye nantarang tengani ma bangsa Israel.