KOLOSE 4 - KABAR MAEH MA HANYU JANJI WAU

¹ Kawan pulaksanai sa jari tuan! Ware naun nampalus ma kawan walah naun anri bujur nelang adil. Itung naun pada uweng erang kaulun ampu hang surga.

Kawan patitah

² Ware naun badoa anri sagalis atei nelang tatap sadia, nelang ngantuh tarima kasih ma Alatalla.

³ Badoa pada ma kami nampan Alatalla ngami ma kami kasampatan sa maeh nampan iwara kabar neu rasia Kristus. Daya gana hal yiru hampe itati aku naan hawuang panjara.

⁴ Badoa nampan aku tau manarang rasia yiru anri jelas kewangun sabujurni.

⁵ Neu wangun hubungan naun anri kawan ulun sa puang parisaya, wuah naun welum maharati nelang makai tiap kasampatan anri samaeh-maehni.

⁶ Ware kawan hal sa napantane naun saratang ngampi sanang atei nelang maka sindi. Wuah naun karasa kalaawe saharusni naun nuing kawan tuntian ulun.

Panutup surat anri tabe

⁷ Tikhikus, pulaksanai takam sa nasinta, sagar iwara ma naun kawan ala katulun neu aku. Hanye satia bagawi baya kami ma Tuhan.

⁸ Aku ngutus hanye nunung naun anri tujuan nampan naun karasa kaadaan kami nelang naun parariu.

⁹ Hi Onesimus sagar tulak sinrah anri hi Tikhikus; hanye erang kaulun teka babuhan naun. Hanye ulun sa satia, nelang kami sinta hanye. Hanye anri hi Tikhikus sagar iwara ma naun kawan ala katantuluh sa jari hang unenganku yiti.

¹⁰ Hi Aristarkhus, sa naan hawuang panjara baya aku, ngirim tabe ma naun. Kalayiru pada hi Markus, sahinraan Barnabas. (Ma naun haut nakirim kabar nampan nyambut hanye amun hanye hawi nunung naun.)

¹¹ Tabe pada teka hi Yesus sa bangaran pada Yustus. Teka kawan ulun Yahudi sa haut parisaya ma Tuhan Yesus, ekat here telu sa itati bagawi baya anri aku neu nampalus tugas teka Alatalla. Here tuu-tuu bahimat ngarawah aku.

¹² Tabe teka hi Epafras. Hanye pada teka babuhan naun. Hanye walah Kristus Yesus, sa saratang badoa anri sagalis atei ma naun. Hanye ilaku tatuu ma Alatalla nampan kaharapen naun jari mansing nelang naun tuu-tuu dewasa, nampan naun anri paruna ngalut nuu ma kabahumen Alatalla.

¹³ Aku raerai haut kadinung hanye haut bagawi bahimat ma naun nelang ma kawan ulun sa hang Laodikia anri Hierapolis.

¹⁴ Dokter Lukas, sa nasinta takam, anri hi Demas ngirim tabe ma naun.

¹⁵ Hampe tabe kami ma kawan pulaksanai Kristen hang Laodikia; pada ma hi Nimfa, nelang ma ungkup sa sumbayang hang lewuni.

¹⁶ Udi surat yiti nabasa ma naun, antara lalan nampan yiru nabasa pada ma ungkup sa hang Laodikia. Kalayiru pada naun raerai harus mambasa surat sa sagar nakirim teka Laodikia ma naun.

¹⁷ Nelang wara ma hi Arkhipus, “Sanuput tugas sa naami ma hanyu neu malayanni Tuhan.”

¹⁸ Tabe teka aku, hi Paulus. Aku raerai sa nyurat bagian yiti. Ada ang kaitung aku magun hawuang panjara! Mudahan Tuhan mamberkat naun. Hormat kami, Paulus